Esekiel 23:1-49
23 Ngerana ka Jahwe man bangku, nina,
2 “O anak manusia, lit dua diberu si ersenina si sada mamak.+
3 Mulai kin ia nguda denga ia enggo jadi pelacur i Mesir.+ I je, lakoken kalak e perbahanen seks si salah, i je me kalak e lanai perawan.*
4 Sintua gelarna Ohola,* adekna Oholiba.* Kalak e jadi jangKu, dung e lahirken kalak e anak dilaki ras diberu. Ohola eme Samaria,+ Oholiba eme Jerusalem.
5 “Sanga Ohola jadi jangKu,+ ia enggo mulai jadi pelacur. Galang kel napsuna ngayaki rondong-rondongna,+ eme kalak Assur tetanggana.+
6 Kalak e eme gubernur-gubernur ras wakil penguasa si erbaju biru. Kerina kalak e dilaki si ganteng si nangkih kuda.
7 Lalap ia jadi pelacur man kerina kalak Assur si terkenal. Najis banna dirina+ alu berhala-berhala si erban ciga ate* si seh kel ia merhatna.
8 La tadingkenna perbahanenna sanga ia jadi pelacur i Mesir, perban mulai ngudana nari enggo erhubungen seks kalak e ras ia, ban kalak e ia lanai perawan. Galang kel napsu kalak e erhubungen seks ras ia.+
9 Emaka Kuserahken ia ku tan rondong-rondongna si ernapsu kel ia ngayakisa eme kalak Assur.+
10 Tilanjangi kalak e ia,+ rampas kalak e anak-anakna si dilaki ras si diberu,+ bunuh kalak e ia alu pedang. Diberu e itandai diberu si la erguna i antara diberu-diberu, janah ihukum kalak e ia.
11 “Sanga idah Oholiba adekna kerna si e, Oholiba reh jahatna, pelacuren si lakokenna keleken asangken kakakna.+
12 Galang kel napsuna man tetanggana eme kalak Assur,+ kalak e gubernur-gubernur ras wakil penguasa si make baju si mewah ras si nangkih kuda. Kerina kalak e dilaki si ganteng.
13 Seh kel najisna perbahanen Oholiba, bali najisna ras kakakna.+
14 Reh dekahna reh parahna perbahanenna bas ngelakoken pelacuren. Nenna gambar dilaki-dilaki kalak Kaldea si iukir bas tembok si megara warnana.
15 Ukiren-ukiren e ndai eme ukiren kalak Babilon si lahir i negri Kaldea, si make ikat pinggang ras penutup takal si gedang. Ukiren e bagi prajurit-prajurit.
16 Sanga idahna ukiren e, minter galang napsuna man kalak e, kirimna pesan man kalak e i Kaldea.+
17 Emaka rehen kalak Babilon ku ingan medemna, erhubungen seks kalak e. Najis ban kalak e ia alu napsuna si galang. Kenca najis ban kalak e ia, tadingkenna kalak e perban enggo ciga ate kalak e ngidah ia.
18 “Sanga lalap lakokenna pelacuren si la meteh mela janah tilanjangina bana,+ ciga ateKu ngidah ia, Kutadingken ka ia bagi Aku nadingken kakakna perban ciga ateKu.+
19 Reh dekahna reh parahna perbahanenna bas ngelakoken pelacuren.+ Ingetna sanga ia nguda denga jadi pelacur i Mesir.+
20 Galang kel napsuna bagi napsu gundik arah dilaki si seh kel galangna napsuna si bagi kelede ras kuda.
21 Tedeh atendu perbahanenndu si la meteh mela sanga kam nguda denga i Mesir,+ sanga kalak e ngelakoken perbahanen seks si salah ras kam sanga kam nguda denga.*+
22 “Emaka, bagenda nina Jahwe Tuhan Si Meganjangna, ‘O Oholiba, rondong-rondongndu+ si enggo tadingkenndu perban ciga atendu, Kuban pagi lawan kalak e kam bas kerina arah,+
23 eme kalak Babilon+ ras kerina kalak Kaldea,+ kalak Pekod,+ Soa, Koa, radu ras kerina kalak Assur. Kerina kalak e dilaki si ganteng si nangkih kuda, kalak e eme gubernur-gubernur, wakil penguasa, prajurit-prajurit, ras kalak si terkenal.*
24 Serang kalak e pagi kam alu melala gereta perang, pasukenna si mbelin, perisaina* si galang ras si kitik,* bage pe pelindung takal. Kepung kalak e pagi kam, Kupediat pagi hukum kalak e kam. Rate-ate pagi kalak e sanga hakimina kam.+
25 Kusehken pagi rawaKu man bandu, merawa pagi kalak e ngukum kam. Potong kalak e pagi igungndu ras cupingndu. Kalak si nggeluh denga si lit i tengah-tengahndu bunuh kalak e pagi alu pedang. Buatna pagi anak-anakndu si dilaki ras si diberu, tutungna pagi kalak si nggeluh denga si lit i tengah-tengahndu.+
26 Tangtangi kalak e pagi bajundu,+ rampas kalak e perhiasenndu si mejile.+
27 Kupengadi pagi perbahanenndu si la meteh mela e bage pe pelacurenndu+ si mulaindu i negri Mesir.+ Lanai pagi idahndu kalak e, lanai pagi ingetndu Mesir.’
28 “Bagenda nina Jahwe Tuhan Si Meganjangna, ‘Kuserahken pagi kam man kalak si segat atendu, eme kalak si tadingkenndu perban ciga atendu.+
29 Perban segat atena kam, la mehuli perbahanenna man bandu. Rampasna pagi kerina hasil kerja kerasndu.+ Tilanjangina kam pagi, pediatna la erbaju. Teridah pagi perbahanenndu si la meteh mela bage pe pelacurenndu.+
30 Si e terjadi man bandu perban ayakindu bangsa-bangsa bagi pelacur,+ sebap najis banndu dirindu alu berhala-berhalana si erban ciga ate.+
31 Ikutkenndu perbahanen kakakndu,+ Kutama pagi cangkirna ku tanndu.’+
32 “Bagenda nina Jahwe Tuhan Si Meganjangna,
‘Arah cangkir kakakndu kam pagi minem.+
Cangkir e mbages janah galang. Isina dem alu kata hinan ras isak-isak si alokenndu pagi.+
33 Inemndu pagi isi cangkir kakakndu eme Samaria seh asa keri.
Mabuk pagi kam, ceda kel ukurndu.
Mbiar pagi kam janah itadingken.
34 Arus inemndu e seh asa keri,+ kenca si e karatindu pecah-pecahen cangkir si iban arah taneh liat e.
Jenari cigatkenndu buah dadandu.
“Perban Aku si enggo ngatakenca,” nina Jahwe Tuhan Si Meganjangna.’
35 “Emaka bagenda nina Jahwe Tuhan Si Meganjangna, ‘Perban lupakenndu Aku janah tuhu-tuhu lanai diatendu Aku,+ nanamindu pagi akibat arah perbahanenndu si la meteh mela e bage pe arah pelacurenndu e.’”
36 Nina Jahwe man bangku, “O anak manusia, umumkenndu nge penghukumen man Ohola ras Oholiba,+ katakenndu nge man kalak e perbahanenna si erban ciga ate?
37 Erlua-lua* kalak e,+ lit dareh bas tan kalak e. Labo saja erlua-lua kalak e ras berhala-berhalana si erban ciga, tapi tutungna ka anakna si dilaki si lahirkenna man bangKu jadi pangan berhala-berhala kalak e.+
38 Enda si lakoken kalak e man bangKu: Najis ban kalak e inganKu si badia, najis ban kalak e SabatKu.
39 Bas wari e, kenca ibunuh kalak e anak-anakna si dilaki guna ikorbanken man berhala-berhalana si erban ciga ate,+ masuk ka kalak e ku inganKu si badia, banna ingan e jadi najis.+ Bage me si lakoken kalak e bas rumahKu.
40 Suruh kalak e ka utusen ngirim pesan man kalak bas ingan si ndauh gelah reh kalak e.+ Kenca reh kalak e, ridi kam, banndu celak matandu, hiasindu dirindu alu perhiasen.+
41 Kenca si e, kundul kam bas ingan kundul si mewah+ si i lebe-lebena lit meja.+ I je tamakenndu kemenyanKu+ ras minakKu.+
42 I je, terbegi sora enterem dilaki si ersenang-senang. I tengah-tengah kalak e lit pemabuk si reh arah taneh mesawang.* Pakeken kalak e gelang ku tan diberu e duana bage pe mahkota ku takalna.
43 “Kenca si e, bagenda ningKu kerna diberu si enggo latih kapna erlua-lua e, ‘Amin pe bage, teruskenna denga ngelakoken pelacuren.’
44 Emaka lalap rehen kalak e ndahi ia, bagi kalak si reh ndahi pelacur. Bage me kalak e reh ndahi Ohola ras Oholiba, diberu si perbahanenna la meteh mela e.
45 Tapi kalak benar pagi si mereken hukumen man bana eme hukumen si patut ialoken kalak si erlua-lua+ ras munuh,+ perban enggo erlua-lua kalak e janah lit dareh bas tanna.+
46 “Bagenda nina Jahwe Tuhan Si Meganjangna, ‘Lit pagi pasuken reh ndahi kalak e. Ban kalak e duana diberu ndai jadi jarahen, ise pe si ngidah kalak e ngeri pagi kapna.+
47 Benteri pasuken e pagi kalak e alu batu,+ bunuhna kalak e alu pedang. Bunuh pasuken e pagi anak-anakna si dilaki ras si diberu+ jenari tutung kalak e rumahna.+
48 Kupengadi pagi perbahanen si la meteh mela bas negri e, e jadi pelajaren man kerina diberu, gelah la ikutken kalak e perbahanen kena si la meteh mela e.+
49 Ban pasuken e pagi nanami kena akibat arah perbahanen kena si la meteh mela e, bage pe akibat arah dosa-dosa kena ras berhala-berhala kena si erban ciga ate. Iteh kena pagi maka Aku kap Jahwe Tuhan Si Meganjangna.’”+
Cataten i teruh
^ As. “buah dada kalak e ijemak-jemak, bage pe dadana si perawan denga.”
^ Ertina “Kemahna.”
^ Ertina “KemahKu Lit bas Ia.”
^ Kata enda bas bahasa Heber banci jadi lit hubungenna ras kata “tai” guna ncidahken perasan ciga ate.
^ As. “sanga jemak-jemak kalak e dadandu, eme buah dadandu sanga kam nguda denga.”
^ Ntah “penting.”
^ Ntah “ampang-ampangna.”
^ Biasana enda perisai si ibaba sekalak pemanah.
^ Maksudna, erlua-lua secara rohani.
^ Taneh si mbelang si jarang iingani.
