Esekiel 25:1-17
25 Ngerana ka Jahwe man bangku, nina,
2 “O anak manusia, alakenlah ku kalak Ammon,+ ernubuatlah kam kerna kalak e.+
3 Kerna kalak Ammon, bagendalah nindu, ‘Begiken kai nina Jahwe Tuhan Si Meganjangna. Bagenda nina Jahwe Tuhan Si Meganjangna, “Perban meriah akapndu ngidah inganKu si badia iban jadi najis, meriah akapndu ngidah negri Israel itadingken janah lanai iingani, meriah ka akapndu ngidah kalak Juda ibaba lawes jadi tabanen,
4 emaka Kuserahken pagi kam man kalak Timur. Ban kalak e pagi perkemahenna ras tenda-tendana i tengah-tengahndu. Pan kalak e pagi hasil jumandu janah inem kalak e pagi susu asuh-asuhenndu.
5 Kuban pagi Raba+ jadi mbalmbal man unta-unta, janah negri kalak Ammon jadi ingan istrahat man asuh-asuhen. Teh kena pagi maka Aku kap Jahwe.”’”
6 “Bagenda nina Jahwe Tuhan Si Meganjangna, ‘Perban ertepuk tan+ kam janah lompat-lompat alu ermeriah ukur perban kai si terjadi bas negri Israel, ras nokoh kam man kalak e,+
7 Kuangkat pagi tanKu ngelawan kam janah Kuserahken kam man bangsa-bangsa, gelah jarahna pagi kam. Kukernepken pagi kam arah bangsa-bangsa bage pe arah kerina negri.+ Kukernepken pagi kam janah tehndu pagi maka Aku kap Jahwe.’
8 “Nina Jahwe Tuhan Si Meganjangna, ‘Perban bagenda nina Moap+ ras Seir,+ “Kalak Juda bagi bangsa-bangsa si deban,”
9 Kupediat pagi perbatasen Moap iserang, termasuk kota-kota si mejile* si lit bas negrina, eme Bet Jesimot, Baalmeon, seh ku Kiriataim.+
10 Kuserahken pagi kalak Ammon radu ras si ndai kerina man kalak Timur,+ alu bage kalak Ammon lanai iinget i tengah bangsa-bangsa.+
11 Kuhukum pagi kalak Moap,+ teh kalak e pagi maka Aku kap Jahwe.’
12 “Bagenda nina Jahwe Tuhan Si Meganjangna, ‘Edom enggo balas dendam man Juda janah enggo salah kel ia perban balasna kalak e.+
13 Emaka bagenda nina Jahwe Tuhan Si Meganjangna, “Kuangkat pagi tanKu ngelawan kalak Edom janah Kubunuh pagi manusia ras asuh-asuhen si lit i je, Kuban pagi ingan e lanai iingani.+ Mulai Teman nari seh ku Dedan, ibunuh pagi kalak e alu pedang.+
14 ‘Alu tan umatKu kalak Israel, Kubalas pagi Edom.+ Ban kalak e pagi Aku nembeh ras merawa man Edom. Emaka gejapken kalak e pagi pembalasenKu,’+ nina Jahwe Tuhan Si Meganjangna.”’
15 “Bagenda nina Jahwe Tuhan Si Meganjangna, ‘Lalap segat ate kalak Pilisti man kalak Israel, alu jahat daramina cara gelah banci balas dendam man kalak e janah kernepkenna atena kalak e.+
16 Emaka nina Jahwe Tuhan Si Meganjangna, “Kuangkat pagi tanKu ngelawan kalak Pilisti+ janah Kubunuh pagi kalak Kereti,+ jenari Kukernepken pagi kalak si nggeluh denga si lit i tepi laut.+
17 Kubalas pagi kalak e janah Kubereken hukumen si seh kel beratna. Sanga Kubalas kalak e, teh kena pagi maka Aku kap Jahwe.”’”
Cataten i teruh
^ Ntah “ihiasi.”
