Esekiel 26:1-21
26 Bas tahun si pe-11-ken, bas wari si pertama bas bulan e, reh kata Jahwe man bangku, nina,
2 “O anak manusia, perban meriah akap Tirus ngidah kai si terjadi man Jerusalem+ janah nina, ‘Gerbang bangsa-bangsa enggo ihancurken!+ Gundari kap kesempatenku, bayak pagi aku perban ia ihancurken.’
3 Emaka bagenda nina Jahwe Tuhan Si Meganjangna, ‘O Tirus, Kulawan pagi kam, Kuban melala bangsa ngelawan kam bagi gelombang laut.
4 Hancurken kalak e pagi tembok-tembokndu bage pe menara-menarandu,+ keri pagi Kukiskis tanehndu janah Kuban pagi kam jadi batu si kerah.
5 Jadi ingan ngkerahken jaring pagi kam i tengah laut.’+
“‘Aku kap si enggo ngerana,’ nina Jahwe Tuhan Si Meganjangna, ‘ijarah bangsa-bangsa pagi kam.
6 Penduduk si tading i kuta-kuta ibunuh pagi alu pedang, teh kalak pagi maka Aku kap Jahwe.’
7 “Bagenda nina Jahwe Tuhan Si Meganjangna, ‘Kuban pagi gelah Tirus iserang Nebukadnesar* raja Babilon arah utara nari.+ Ia raja arah kerina raja.+ Lit kuda-kudana,+ gereta-gereta perangna,+ pasukenna si erkuda, ras enterem prajuritna.
8 Bunuhina pagi penduduk si tading i kuta-kuta alu pedang, bangunna pagi tembok pengepungen. Pegun-gunna pagi taneh janah babana perisai* si galang guna ngelawan kam.
9 Runtuhkenna pagi tembok-tembokndu alu alat ngeruntuhken, runtuhkenna pagi menara-menarandu alu kapak.*
10 Melala kel kuda-kudana si lewat si erban kam itutupi abu, mugur-ugur pagi tembok-tembokndu perban sora pasuken si erkuda, roda-roda, bage pe gereta-gereta perang sanga masuk ia ku gerbangndu, bagi pasuken si nyerang kota si tembokna enggo runtuh.
11 Perjaki kuda-kudana pagi dalan-dalanndu.+ Bunuhina pagi pendudukndu alu pedang, tiang-tiangndu si paguh runtuh pagi seh ku taneh.
12 Rampasi kalak e pagi ertandu bage pe barang si dayakenndu.+ Runtuhken kalak e pagi tembok-tembokndu bage pe rumah-rumahndu si mejile. Buatna pagi batundu, kayundu, bage pe tanehndu jenari benterkenna ku lau.’
13 “‘Kupengadi pagi sora ende-endenndu, lanai pagi terbegi sora harpandu.*+
14 Kuban pagi kam jadi batu si kerah. Kuban pagi kam jadi ingan ngkerahken jaring.+ Lanai pagi kam ibangun, sebap Aku Jahwe si enggo ngatakenca,’ nina Jahwe Tuhan Si Meganjangna.
15 “Bagenda nina Jahwe Tuhan Si Meganjangna man Tirus, ‘La kin nggirgir pulau-pulau sanga terbegi sora keruntuhenndu, sanga serko kalak si nandangi mate, janah sanga kalak si lit bas tengah-tengahndu ibunuhi?+
16 Nusur pagi kerina peminpin-peminpin laut arah tahtana jenari bukana jubahna bage pe bajuna si isulam. Nggirgir pagi kalak e perban biarna. Kundul pagi kalak e i taneh janahna nggirgir. Mamang pagi atena ngidah kam.+
17 Endeken kalak e pagi lagu ceda ate*+ kerna kam, janah nina man bandu,
“O kota si ipuji-puji,+ si pendudukna arah laut nari, gundari kam enggo kernep.
Mbarenda kam ras pendudukndu nguasai laut,+Janah mbiar kerina penduduk doni!
18 Nggirgir pagi pulau-pulau bas wari keruntuhenndu,Kuatir pagi pulau-pulau si lit i laut sanga kam kernep.”’+
19 “Bagenda nina Jahwe Tuhan Si Meganjangna, ‘Sanga Kuhancurken pagi kam bagi kota-kota si la lit pendudukna, sanga Kututupi kam alu lau si seh kel buena seh ngasa kam gedap,+
20 Kubaba pagi kam radu ras kalak si debanna nusur ku kuburen eme ingan kalak si enggo ndekah mate. Kuban pagi kam tading bas ingan si mbagesna kel, bagi ingan si enggo ndekah ihancurken, radu ras kalak si enggo nusur ku kuburen, emaka lanai pagi kam iingani.+ Kenca si e, Kumuliaken* pagi negri kalak si nggeluh.
21 “‘Rempet pagi terjadi man bandu kejadin si ngeri, kernep pagi kam.+ Darami kalak pagi kam, tapi la datna,’ nina Jahwe Tuhan Si Meganjangna.”
Cataten i teruh
^ As. “Nebukadresar,” penggelaren si deban.
^ Ntah “ampang-ampang.”
^ Ntah “pedang.”
^ Harpa eme alat musik si ersenar bagi gitar, tapi bentukna beda.
^ Ntah “lagu perngandungen.”
^ Ntah “Kuhiasi.”
