Esekiel 27:1-36
-
Lagu ceda ate man kapal Tirus si gedap (1-36)
27 Nina Jahwe ka man bangku,
2 “O anak manusia, endekenlah lagu ceda ate* kerna Tirus,+
3 janah kataken man Tirus,‘Kam si tading i gerbang-gerbang laut,Si erdagang ras bangsa-bangsa arah erbage pulau,Bagenda nina Jahwe Tuhan Si Meganjangna,
“O Tirus, nindu sempurna kel jilendu.+
4 Daerah-daerahndu i tengah-tengah laut,Tukang bangunenndu erban jilendu reh sempurnana.
5 Kerina papanndu ban kalak e arah batang kayu juniper Senir nari,+Buat kalak e batang kayu aras arah Libanon jadi tiang kapalndu.
6 Dayung-dayungndu ban kalak e arah batang kayu si galang* si lit i Basan,Bagin si arah lebe kapalndu iban arah kayu cemara si ilapisi gading arah kepulauan Kitim.+
7 Layarndu iban arah linen si warna-warni arah Mesir nari,Tenda kapalndu iban arah benang biru ras benang wol ungu arah kepulauan Elisah.*+
8 Penduduk Sidon ras Arwad+ jadi tukang dayungndu.
O Tirus, kalak si beluh si lit i tengah-tengahndu jadi anak buah bas kapalndu.+
9 Kalak Gebal+ si beluh ras si erpengalamen nutupi kai si bocor bas kapalndu.+
Kerina kapal si lit i laut bage pe pelaut-pelautna reh ndahi kam guna erdagang.
10 Prajuritndu eme kalak Persia, Lud, ras Put,+ si erperang man bandu.
Gantungken kalak e perisai* ras pelindung takalna bas kam, janah ban kalak e kam mulia.
11 Kalak Arwad si lit bas pasukenndu erjaga i sekeliling tembok-tembokndu,Kalak si perpang ngawasi menara-menarandu.
Gantungken kalak e perisai-perisaina si kibul i sekeliling tembokndu,Banna sempurna jilendu.
12 “‘“Tarsis+ erdagang ras kam perban melala kel ertandu.+ Bereken kalak e pirak, besi, timah putih, ras timah hitam guna itukar ras barang-barangndu.+
13 Jawan, Tubal,+ ras Mesek+ erdagang ras kam. Dayaken kalak e budak-budak+ bage pe barang-barang si iban arah tembaga nari guna itukar ras barang-barang si bisniskenndu.
14 Bereken keturunen Togarma+ kuda-kuda, kuda perang, ras bagal* guna itukar ras barang-barangndu.
15 Kalak Dedan+ erdagang ras kam. Pebisnis arah erbage pulau banndu jadi sierdahinndu. Bere kalak e tanduk gading+ ras kayu si mbiring jadi upeti.*
16 Edom erdagang ras kam perban melala kel barang-barangndu. Bereken kalak e batu turkuois, wol ungu, kain si isulam si warna-warni, kain halus, batu si merga arah laut nari,* ras batu mirah* guna itukar ras barang-barangndu.
17 “‘“Juda ras negri Israel erdagang ras kam, berekenna gandum arah Minit nari,+ pangan si mejilena, madu,+ minak, ras minak balsem*+ guna itukarken ras barang-barangndu.+
18 “‘“Damaskus+ erdagang ras kam perban melala barang-barangndu ras ertandu. Tukarna e alu anggur arah Helbon ras wol arah Sahar nari.*
19 Wedan ras Jawan arah Usal nari mereken barang-barang arah besi, lawang,* ras jerangau* guna itukar ras barang-barangndu.
20 Bereken Dedan+ man bandu kain pelana* guna itukar ras barang-barangndu.
21 Banndu kalak Arab ras kerina peminpin Kedar+ jadi sierdahinndu. Bisnisken kalak e anak biri-biri, biri-biri jantan, ras kambing.+
22 Pebisnis arah Syeba ras Raama+ erdagang ras kam. Bereken kalak e erbage-bage minak wangi si mejilena, batu si merga, ras emas guna itukar ras barang-barangndu.+
23 Kalak Haran,+ kalak Kane, kalak Eden,+ pebisnis arah Syeba,+ arah Assur,+ ras arah Kilmad erdagang ras kam.
24 Bas inganndu erbinaga, bisnisken kalak e uis si mejile, jubah arah kain biru, kain si isulam si warna warni, ras karpet warna warni. Kerina e iiket alu nali.
25 Baba kapal-kapal Tarsis+ barang-barang si bisniskenndu,Emaka dem kel ertandu ras melala babanndu* i tengah laut.
26 Baba tukang dayungndu kam ku laut si ergelombang.
Ban angin timur kam hancur i tengah laut.
27 Ertandu, barang-barangndu, kai si bisniskenndu, pelaut-pelautndu, anak buah kapalndu,Kalak si mpehuli si bocor bas kapalndu, si erdagang ras kam,+ ras kerina si erperang man bandu,+Kerina si lit bas kam,Kerina pagi gedap bas tengah laut sanga kam ndabuh.+
28 Sanga serko anak buah kapalndu, nggirgir pagi daerah si i pinggir laut.
29 Kerina tukang dayung, pelaut, ras anak buah kapalNusur pagi arah kapalna janah tedis kalak e i daraten.
30 Perban kam, serko pagi kalak e, tangis pagi kalak e perban getemna pusuhna,+Janahna namaken abu taneh ku takalna ras guling-guling ia bas abu.
31 Botaki kalak e pagi takalna janah pakena kain guni.
Tangis pagi kalak e perban getemna pusuhna janah nderkuh ia perban kam.
32 Sedih kel kalak e ngendeken lagu ceda ate janah nina,
‘Lit kin si bagi Tirus, si gundari enggo sinik bas tengah laut?+
33 Sanga barang-barangndu reh arah laut, puas banndu bangsa-bangsa.+
Ertandu si melala ras barang binaganndu erban raja-raja bas doni jadi bayak.+
34 Gundari kam enggo karam i tengah laut si mbages.+
Kerina barang binaganndu ras anak buahndu gedap radu ras kam.+
35 Mamang ate kerina penduduk pulau-pulau ngidah kam,+Nggirgir raja-raja kalak e perban biarna.+ Arah ayona teridah maka mbiar kel kalak e.
36 Ihina pebisnis si lit bas tengah bangsa-bangsa pagi kam perban kai si terjadi man bandu.
Rempet pagi terjadi kedungenndu janah ngeri kel,Lanai pagi kam lit seh rasa lalap.’”’”+
Cataten i teruh
^ Ntah “lagu perngandungen.”
^ Ntah “batang kayu ek.”
^ Ntah “Kiprus.”
^ Ntah “ampang-ampang.”
^ Keturunen kelede jantan ras kuda beruna.
^ Batu si merga e maksudna koral.
^ Ntah “batu rubi; ruby.”
^ Minak si merim si iban arah sinuan-sinuan ntah pe batang kayu tertentu. E ipake guna jadi tambar ntah pe parfum.
^ Ntah “wol si warnana abu-abu megara.”
^ Eme batang kayu si sejenis ras batang kayu manis.
^ Sinuan-sinuan si merim.
^ Ntah “kain si isulam jadi pelana.”
^ Ntah banci saja “ras kemulianndu.”
