Esekiel 28:1-26
28 Ngerana ka Jahwe man bangku, nina,
2 “O anak manusia, kataken man peminpin Tirus, ‘Bagenda nina Jahwe Tuhan Si Meganjangna,
“Perban enggo meganjang ukurndu,+ lalap katakenndu kam dibata.
Katakenndu ka maka kundul kam bas tahta dibata i tengah laut.+
Tapi kam manusia kap ngenca, labo dibata,Amin gia bas pusuhndu akapndu kam dibata.
3 Pentaren kam asangken Daniel.+
La lit rahasia si ibuniken arah kam nari.
4 Bayak kam perban pentar ras erpengangka,Terus pepulungndu emas ras pirak bas ingan nimpan ertandu.+
5 Perban kam beluh erdagang, bayak kel kam,+Janah perban kebayakenndu e, reh ganjangna ukurndu.”’
6 “‘Emaka bagenda nina Jahwe Tuhan Si Meganjangna,
“Perban akapndu kam dibata,
7 Kuban pagi reh kalak asing eme bangsa si kejamna arah bangsa-bangsa guna ngelawan kam,+Pedarat kalak e pagi pedangna guna ngancurken kai si mejile si datndu arah kepentarenndu,Janah najis pagi banna kemulianndu.+
8 Babana pagi kam ku kuburen,Janah ngeri pagi permatendu i tengah laut.+
9 Tetap denga nge katakenndu kam dibata man kalak si munuh kam?
Manusia biasa kap kam, labo kam dibata bas tan kalak si erban kam najis.”’
10 ‘Bas tan kalak asing, mate pagi kam bagi kematen kalak si la isunat,Aku kap si ngatakenca,’ nina Jahwe Tuhan Si Meganjangna.”
11 Ngerana ka Jahwe man bangku, nina,
12 “O anak manusia, endekenlah lagu ceda ate* kerna raja Tirus, kataken man bana, ‘Bagenda nina Jahwe Tuhan Si Meganjangna,
“Kam kap contoh kesempurnan,Dem kam alu kepentaren+ janah sempurna jilendu.+
13 Mbarenda kam lit bas Eden, taman Dibata.
Kam ihiasi erbage-bage batu si merga,Eme batu mirah,* topas, jaspis, batu krisolit, oniks, giok, sapir, turkuois,+ ras zamrud,Janah kerina batu e ileketken bas alas si iban arah emas nari.
Kerina e isikapken bas wari kam iciptaken.
14 Kupilih kam jadi kerubim guna erjaga.
Mbarenda kam i gunung si badia Dibata,+ erdalan kam i tengah batu-batu si gara.
15 La lit perbahanenndu si salah mulai kin kam iciptaken,Seh ngasa lakokenndu kai si la benar.+
16 Perban lalana bisnisndu,+Dungna dem kam alu kekerasen, janah mulai kam erdosa.+
Emaka lanai kam Kuanggap badia, Kupelawes kam arah gunung Dibata jenari Kukernepken kam,+O kerubim si erjaga, Kupelawes kam arah batu-batu si gara.
17 Perban jilendu, meganjang ukurndu.+
Kemulianndu erban kam lanai pentar.+
Kubenterken pagi kam ku doni.+
Kuban pagi kam jadi tontonen raja-raja.
18 Kesalahenndu si mbelin ras bisnisndu si la jujur erban inganndu si badia jadi najis.
Kuban pagi gara api i tengah-tengahndu, keri pagi kam tutungna.+
Kuban pagi kam jadi abu bas taneh i lebe-lebe kerina kalak si ngidah kam.
19 Kerina kalak arah bangsa-bangsa si nandai kam, kemamangen pagi ngidah kam.+
Rempet pagi terjadi kedungenndu janah seh kel ngerina,Lanai pagi kam lit seh rasa lalap.”’”+
20 Reh ka kata Jahwe man bangku, nina,
21 “O anak manusia, alakenlah ku Sidon,+ ernubuatlah kerna ia.
22 Katakenlah bagenda, ‘Nina Jahwe Tuhan Si Meganjangna,
“O Sidon, Kuhukum kam janah imuliaken pagi Aku i tengah-tengahndu.
Teh kalak pagi maka Aku kap Jahwe sanga Kuhukum kam, jenari ipebadia pagi Aku arah kam.
23 Kuban pagi reh wabah penakit man bandu janah maler pagi dareh bas dalan-dalanndu.
Sanga reh pedang ngelawan kam arah kerina arah, ndabuhen pagi kalak si ibunuh si lit i tengah-tengahndu.
Teh kalak e pagi maka Aku kap Jahwe.+
24 “‘“Alu bage kalak Israel lanai itokohi kalak si lit i sekelilingna, eme kalak si bagi peren duri si erban mesui+ ras si ncucuki kalak e. Teh kerina kalak pagi maka Aku kap Jahwe Tuhan Si Meganjangna.”’
25 “‘Bagenda nina Jahwe Tuhan Si Meganjangna, “Sanga Kupepulung pagi kalak Israel arah tengah bangsa-bangsa ingan kalak e imerapken,+ ipebadia pagi Aku i tengah-tengah kalak e i lebe bangsa-bangsa.+ Tading pagi kalak e bas negrina+ eme negri si Kubereken man pelayanKu Jakup.+
26 Aman pagi akap kalak e tading i je.+ Bangun kalak e rumah janah iban kalak e kebun anggur.+ Aman pagi akap kalak e sanga Kuhukum kalak si lit i sekelilingna eme kalak si nokohi kalak e.+ Teh kalak e pagi maka Aku kap Jahwe, Dibata kalak e.”’”
