Esekiel 29:1-21
29 Bas tahun si pe-10-ken, bulan si pe-10-ken, wari si pe-12-ken bas bulan e, reh kata Jahwe man bangku, nina,
2 “O anak manusia, alakenlah ku raja Mesir, ernubuatlah kerna ia ras kerina Mesir.+
3 Bagendalah nindu, ‘Nina Jahwe Tuhan Si Meganjangna,
“O raja Mesir, Kulawan kam.+
Kam kap raksasa si medem-medem bas aliren-aliren Lau Nil,*+Si ngataken, ‘Jangku kap Lau Nil e.
Aku si erbanca guna bangku.’+
4 Tapi Kupasang pagi pengkawit bas isangndu janah Kuban pagi ikan si lit bas Lau Nilndu e leket bas sisikndu.
Kupedarat pagi kam arah Lau Nilndu e radu ras kerina ikan si lit i je, si leket bas sisikndu.
5 Kutadingken pagi kam bas gurun pasir, kam bage pe kerina ikan si lit bas Lau Nilndu e.
Mate pagi kam i je. Mayatndu la pagi ipepulung ntah pe ikuburken.+
Kuban pagi kam jadi pangan binatang buas i doni ras perik-perik i langit.+
6 Kenca si e, teh penduduk Mesir pagi maka Aku kap Jahwe,Sebap kalak e bagi nggala,* lanai dukung kalak e keturunen Israel.+
7 Sanga jemak kalak Israel tanndu, hancur kam,Penggel banndu bara kalak e.
Sanga tertande kalak e man bandu, penggel kam,Janah banndu mugur-ugur nahe kalak e.”+
8 “‘Nina Jahwe Tuhan Si Meganjangna, “Kuban pagi reh pedang man bandu,+ Kubunuh pagi manusia ras binatang-binatangndu.
9 Hancur pagi negri Mesir janah lanai iingani.+ Teh kalak e pagi maka Aku kap Jahwe, sebap nindu,* ‘Jangku kap Lau Nil e, aku si erbanca.’+
10 Emaka Kulawan pagi kam ras Lau Nilndu. Kuban pagi negri Mesir hancur, kerah, janah lanai iingani,+ mulai Migdol+ nari seh ku Aswan*+ ras seh ku perbatasen Etiopia.
11 Manusia ntah pe binatang la lewat arah je.+ Negri e la iingani 40 tahun dekahna.
12 Kuban pagi negri Mesir jadi negri si melungenna, kota-kotana pe jadi kota si melungenna 40 tahun dekahna.+ Merap pagi Kuban kalak Mesir ku tengah bangsa-bangsa ras ku erbage negri.”+
13 “‘Nina Jahwe Tuhan Si Meganjangna, “Kenca 40 tahun, Kupepulung pagi mulihi kalak Mesir arah bangsa-bangsa ingan kalak e imerapken.+
14 Kubaba pagi kalak Mesir si itaban mulih ku Petros+ eme negri asal kalak e. Jadi kerajan si la erguna pagi kalak e i je.
15 Mesir jadi kerajan si lemahen asangken kerajan si debanna janah lanai pagi kuasaina bangsa si deban.+ Kuban pagi ia kitik seh asa lanai banci talukenna bangsa si deban.+
16 Lanai pagi andalken kalak Israel ia,+ tapi e ngingetken kalak Israel kerna kesalahenna sanga pindo kalak e penampat man kalak Mesir. Teh kalak e pagi maka Aku kap Jahwe Tuhan Si Meganjangna.”’”
17 Bas tahun si pe-27-ken, bulan si pertama, wari si pertama bas bulan e, reh kata Jahwe man bangku, nina,
18 “O anak manusia, Nebukadnesar*+ raja Babilon enggo nuruh pasukenna kerja keras nyerang Tirus.+ Kerina takal kalak e enggo botak, janah bara kalak e enggo megusgus. Tapi ia ras pasukenna la dat upah perban kerja kerasna ngelawan Tirus.
19 “Emaka bagenda nina Jahwe Tuhan Si Meganjangna, ‘Kuserahken pagi Mesir man Nebukadnesar* raja Babilon.+ Buatna pagi kebayaken Mesir janah rampasna melala ertana. Enda pagi si jadi upah man pasukenna.’
20 “‘Enggo kerja keras ia ngelawan Tirus, emaka Kubereken pagi Mesir man bana perban pendahin si enggo lakokenna man bangKu,’+ nina Jahwe Tuhan Si Meganjangna.
21 “Bas wari e pagi, Kuban turah tanduk man kalak Israel,*+ janah Kubereken kesempaten man bandu ngerana i tengah-tengah kalak e. Teh kalak e pagi maka Aku kap Jahwe.”
Cataten i teruh
^ Bas ayat enda ras ayat seterusna, “Lau Nil” maksudna, Lau Nil si galang bage pe anak-anak launa.
^ Ntah “jerami.” As. “buluh.”
^ As. “nina.” Mungkin maksudna raja Mesir.
^ Ntah “Siene.”
^ As. “Nebukadresar,” penggelaren si deban.
^ As. “Nebukadresar,” penggelaren si deban.
^ Ntah “Kupegegehi kalak Israel.”
