Esekiel 30:1-26
30 Ngerana ka Jahwe man bangku, nina,
2 “O anak manusia, ernubuatlah kam, bagendalah nindu, ‘Nina Jahwe Tuhan Si Meganjangna,
“Nderkuhlah kam, kataken, ‘Andiko, reh me wari e!’
3 Sebap wari e enggo ndeher, wari Jahwe enggo ndeher.+
Bas wari e gelap embunna,+ wari e enggo itentuken man bangsa-bangsa.+
4 Reh pagi pedang nyerang Mesir. Mbiar pagi kalak Etiopia ngidah kalak si terbunuh ndabuhen i Mesir.
Ibuat pagi kebayakenna, hancur pagi pondasina.+
5 Mate pagi kalak Etiopia,+ kalak Put,+ kalak Lud, ras kalak arah erbage bangsa,Bage pe kalak Kub ras keturunen arah negri si enggo erban perjanjin.*
Kalak e mate perban pedang.”’
6 Bagenda nina Jahwe,
‘Kalak si ndukung Mesir pe mate pagi.
Janah runtuh kuasa si banggakenna.’+
“‘Bas negri e, mate pagi kalak e perban pedang, mulai Migdol+ nari seh ku Aswan,’*+ nina Jahwe Tuhan Si Meganjangna.
7 ‘Negri kalak e jadi negri si melungenna kel pagi, janah kota-kotana jadi kota si hancurna.+
8 Teh kalak e pagi maka Aku kap Jahwe, sanga Kututung Mesir janah sanga Kuhancurken kerina si kerja sama ras Mesir.
9 Bas wari e, Kukirim utusen alu kapal-kapal gelah Etiopia si percaya diri e nggirgir. Mbiar pagi kalak e bas wari Mesir kena masalah, perban wari e pasti reh.’
10 “Bagenda nina Jahwe Tuhan Si Meganjangna, ‘Kukernepken pagi kalak Mesir alu tan Nebukadnesar* raja Babilon.+
11 Ia ras pasukenna eme bangsa si kejamna.+ Hancurken kalak e pagi negri e. Pedarat kalak e pagi pedangna janah dem pagi ban kalak e mayat bas negri e.+
12 Kuban pagi anak-anak Lau Nil+ jadi taneh si kerah janah idayaken pagi negri e ku tan kalak jahat. Kalak asing pagi Kuban si erban negri e ras kerina isina la iingani.+ Aku Jahwe si enggo ngatakenca.’
13 “Bagenda nina Jahwe Tuhan Si Meganjangna, ‘Kuhancurken ka pagi berhala-berhala si erban ciga ate* bage pe dibata-dibata si la erguna si lit i Nop.*+ Lanai pagi lit peminpin i Mesir, Kuban pagi Mesir mbiar.+
14 Kuban pagi Petros+ la iingani, Kututung pagi Soan, janah Kuhukum No.*+
15 Kusehken pagi rawaku man Sin, eme tembok Mesir. Kukernepken pagi penduduk No.
16 Kututung pagi Mesir, mbiar pagi Sin, iruntuhken pagi No, janah iserang pagi Nop* bas ciger wari!
17 Anak perana bas On* ras Bubastis* mate pagi perban pedang, janah penduduk kota-kota e itaban pagi.
18 Sanga Kupenggelken kayu pasangen* Mesir i Tahpanhes, gelap pagi wari i je.+ Lanai pagi lit kuasa si banggakenna.+ Tutupi embun pagi ia, penduduk si tading i kota-kotana pe itaban.+
19 Kuhukum pagi Mesir janah teh kalak e pagi maka Aku kap Jahwe.’”
20 Bas wari si pe-11-ken, bulan si pertama, wari si pepituken bas bulan e, reh kata Jahwe man bangku, nina,
21 “O anak manusia, Kupenggelken pagi tan raja Mesir. La pagi ibaluti tanna janah la iiket. Emaka la ia malem janah la megegeh ngangkat pedang.”
22 “Bagenda nina Jahwe Tuhan Si Meganjangna, ‘Kulawan pagi raja Mesir+ janah Kupenggelken pagi tanna, eme tanna si megegeh ras tanna si penggel e.+ Kuban pagi ndabuh pedang si lit bas tanna.+
23 Kenca si e, Kumerapken pagi kalak Mesir ku tengah bangsa-bangsa ras ku erbage negri.+
24 Kuban pagi megegeh tan* raja Babilon+ janah Kutama pedangKu ku tanna.+ Kupenggelken pagi tan raja Mesir, megang pagi sorana ndehereng i lebe-lebena,* bagi kalak si nandangi mate.
25 Kuban pagi megegeh tan raja Babilon tapi tan raja Mesir Kuban lemah. Teh kalak e pagi maka Aku kap Jahwe sanga Kutama pedangKu ku tan raja Babilon janah pakena e guna nyerang Mesir.+
26 Kumerapken pagi kalak Mesir ku tengah bangsa-bangsa bage pe ku erbage negri,+ teh kalak e pagi maka Aku kap Jahwe.’”
Cataten i teruh
^ Mungkin kalak Israel si kerja sama ras Mesir.
^ Ntah “Siene.”
^ As. “Nebukadresar,” penggelaren si deban.
^ Ntah “Mempis.”
^ Kata enda bas bahasa Heber banci jadi lit hubungenna ras kata “tai” guna ncidahken perasan ciga ate.
^ Maksudna, Tebes.
^ Ntah “Mempis.”
^ Maksudna, Heliopolis.
^ Ntah “Pibeset.”
^ Pasangen eme alat si biasa itama ku kuduk manusia ntah pe binatang guna maba baban.
^ Ntah “kuasa.”
^ Maksudna, i lebe-lebe raja Babilon.
