Esekiel 32:1-32
32 Bas tahun si pe-12-ken, bulan si pe-12-ken, bas wari si pertama bas bulan e, ngerana ka Jahwe man bangku, nina,
2 “O anak manusia, endekenlah lagu ceda ate* kerna raja Mesir, kataken man bana,‘Kam bagi singa si megegeh i tengah bangsa-bangsa,Tapi kam enggo ipesinik.
Kam bagi raksasa laut+ si ngamuk bas kerina lau malerndu,Nahendu erban lau maler* megembur ras melket.’
3 Bagenda nina Jahwe Tuhan Si Meganjangna,
‘Kugunaken melala bangsa ngkimbangken jalaKu ku kam,Tangkap kalak e pagi kam bas jalaKu.
4 Kutadingken pagi kam bas daraten.
Kubenterken pagi kam ku taneh si mbelang.
Kuban pagi kerina perik i langit ringan bas kam,Kuban pagi puas akap binatang buas i belang-belang doni perban dagingndu.+
5 Kubenterken pagi dagingndu ku pegunungen,Dem pagi lembah-lembah alu bangkendu.+
6 Litap pagi taneh seh ku pegunungen perban mamburen darehndu,Dem pagi anak-anak lau alu darehndu.’
7 ‘Sanga kam ikernepken, Kututupi pagi langit janah bintang-bintang lanai terang.
Kututupi pagi matawari alu embun,Ras bulan lanai ersinar.+
8 Gelap pagi Kuban kerina si ersinar i langit perban kam,Kututupi pagi negrindu alu kegelapen,’ nina Jahwe Tuhan Si Meganjangna.
9 ‘Kuban pagi melala bangsa sakit hati sanga Kubaba kam jadi tabanen ku bangsa si deban,Eme ku negri si la tandaindu.+
10 Kuban pagi melala bangsa kemamangen,Sanga Kuayunken pedangKu i lebe-lebe kalak e, nggirgir pagi raja kalak e ban biarna perban kam.
Bas wari kam ndabuh,Lalap pagi kalak e nggirgir, perban kerina kalak e mbiar mate.’
11 Bagenda nina Jahwe Tuhan Si Meganjangna,
‘Reh pagi pedang raja Babilon ngelawan kam.+
12 Kuban pagi pasukenndu maten perban pedang prajurit si megegeh,Kerina kalak e bangsa si seh kel kejamna.+
Rendahken kalak e pagi kai si ibanggaken Mesir, janah kerina pasukenna ikernepken pagi.+
13 Kukernepken pagi kerina asuh-asuhenna si lit i tepi lau si melala e,+Lanai pagi megembur lau e perban nahe manusia ras nahe asuh-asuhen.’+
14 ‘Sanga si e, Kuban pagi lau kalak e bersih,Kuban pagi lau maler kalak e bagi minak,’ nina Jahwe Tuhan Si Meganjangna.
15 ‘Sanga Kuban Mesir jadi negri si gersang, la iingani, janah lanai lit isina,+Sanga Kuserang kerina penduduk si lit i je,Teh kalak e pagi maka Aku kap Jahwe.+
16 Enda me lagu ceda ate, pasti pagi endeken kalak.
Anak-anak si diberu arah bangsa-bangsa pagi si ngendeken lagu e.
Endeken kalak e pagi lagu kerna Mesir ras kerna kerina pasukenna,’ nina Jahwe Tuhan Si Meganjangna.”
17 Kenca si e bas tahun si pe-12-ken, wari si pe-15-ken bas bulan e, reh kata Jahwe man bangku, nina,
18 “O anak manusia, tangisilah pasuken Mesir janah babalah ia ku teruh taneh, ia ras anak-anak si diberu arah bangsa-bangsa si megegeh, radu ras kalak si nusur ku kuburen.
19 “‘Akapndu kin jilen kam asangken kalak si deban? Nusurlah kam, janah amparlah kam ras kalak si la isunat!’
20 “‘Mate pagi kalak e radu ras kalak si ibunuh alu pedang.+ Iserahken pagi kalak e man pedang. Isaren pagi kalak e radu ras kerina pasukenna.
21 “‘Arah Kuburen* si mbages, ngerana pagi kalak si megegehna man bana* bage pe man si nampati ia. Pasti pagi kalak e nusur janah ampar bagi kalak si la isunat si ibunuh alu pedang.
22 Assur lit i je ras kerina pasukenna. Kalak e ibunuh alu pedang, janah kuburen kalak e engkelilingi ia.*+
23 Kuburen-kuburenna lit bas lubang* si mbages. Kuburennna ikelilingi pasukenna si mate perban pedang, perban sanga nggeluh kalak e, mbiar banna kalak.
24 “‘Elam+ lit i je, janah kuburenna ikelilingi kerina pasukenna si mate perban pedang. Kalak e la isunat janah kalak e enggo nusur ku teruh taneh. Kalak e eme kalak si sanga ia nggeluh mbiar banna kalak. Gundari pasti mela akap kalak e bage pe kalak si nusur ku kuburen.
25 Ban kalak e ingan medemna i tengah-tengah kalak si ibunuh, janah kelilingi kuburen pasukenna ia. Kerina kalak e kalak si la isunat, eme kalak si ibunuh alu pedang, perban sanga nggeluh kalak e, mbiar banna kalak. Mela akap kalak e bage pe kalak si nusur ku kuburen. Elam enggo itamaken ras kalak si ibunuh.
26 “‘Mesek ras Tubal+ bage pe kerina pasukenna lit i je, janah kuburen-kuburen kalak e lit i sekelilingna. Kerina kalak e la isunat ras itebak pedang, perban sanga nggeluh kalak e, mbiar banna kalak.
27 Ampar pagi kalak e radu ras prajurit si megegeh si la isunat si enggo ibunuh si nusur ku Kuburen,* radu ras senjata perang kalak e. Tama kalak e pagi pedangna i teruh takalna* ras dosa-dosana i datas tulan-tulanna, perban sanga nggeluh prajurit si megegeh e, mbiar banna kalak.
28 Ihancurken pagi kam i tengah-tengah kalak si la isunat janah ampar pagi kam radu ras kalak si ibunuh alu pedang.
29 “‘Edom+ pe lit i je ras rajana bage pe kerina peminpinna. Amin gia kalak e megegeh, ampar pagi kalak e radu ras kalak si ibunuh alu pedang. Kalak e pe ampar radu ras kalak si la isunat+ bage pe ras kalak si nusur ku kuburen.
30 “‘I je pe lit peminpin-peminpin arah utara radu ras kalak Sidon.+ Amin gia mbarenda banna kalak mbiar perban gegehna, nusur kalak e ku teruh janah mela akapna bage pe kalak si ibunuh. Kalak e la isunat janah ampar radu ras kalak si ibunuh alu pedang. Mela pagi akap kalak e bage pe kalak si nusur ku kuburen.
31 “‘Idah raja Mesir pagi kerina e, malem pagi atena perban kai si terjadi man pasukenna.+ Raja Mesir ras kerina pasukenna ibunuh pagi alu pedang,’ nina Jahwe Tuhan Si Meganjangna.
32 “‘Perban sanga nggeluh raja Mesir, mbiar banna kalak, ia ras kerina pasukenna mate pagi radu ras kalak si la isunat, kerina kalak e radu ras ibunuh alu pedang,’ nina Jahwe Tuhan Si Meganjangna.”
Cataten i teruh
^ Ntah “lagu perngandungen.”
^ As. “lau maler kalak e.”
^ Mungkin maksudna raja Mesir.
^ Mungkin maksudna raja Assur.
^ Ntah “kuburen.”
^ Mungkin maksudna, prajurit si ndatken kehamaten janah ikubur ras pedang kalak e.
