Esekiel 33:1-33
33 Reh kata Jahwe man bangku nina,
2 “O anak manusia, kataken bagenda man bangsandu,+“‘Bicara Kuserang sada negri,+ janah kerina kalak si lit bas negri e milih sekalak dilaki guna jadi penjaga.
3 Dung e idah penjaga e reh musuh ku negri e, jenari embusna trompet tanduk janah persingetina kalak e.+
4 Adi lit kalak si megi sora trompet tanduk e tapi la patuhina persinget e+ jenari reh musuh janah bunuhna ia, si mate e si ertanggung jawap man kematenna.+
5 Begina sora trompet tanduk e, tapi la patuhina persinget e. Emaka ia si ertanggung jawap man kesalahenna. Adi patuhina persinget e, selamatkenna geluhna.
6 “‘Tapi adi idah penjaga e reh musuh janah la embusna trompet tanduk,+ kalak si lit i je la dat persinget, jenari reh musuh janah bunuhna salah sada arah kalak e. Kalak si mate e mate perban kesalahenna sendiri, tapi Kupindo pertanggung jawapen arah penjaga e.’+
7 “O anak manusia, Kupilih kam jadi penjaga man kalak Israel, sanga begindu kata-kata si Kubelasken, arus persingetindu kalak e.+
8 Adi Kukataken man kalak jahat, ‘O kalak jahat, pasti kam mate!’+ tapi la persingetindu ia gelah robah arah perbahanenna, ia mate selaku kalak jahat perban kesalahenna,+ tapi pasti Kupindo pertanggung jawapenndu kerna kematenna e.
9 Tapi adi persingetindu kalak jahat gelah robah ia arah perbahanenna janah la ia nggit robah, pasti ia mate perban kesalahenna,+ tapi enggo selamatkenndu geluhndu.+
10 “O anak manusia, kataken man kalak Israel, ‘Ning kena, “Latih akap kami perban pemberontaken ras dosa kami si mbelin,+ banci denga kin kami tetap nggeluh?”’+
11 Kataken man kalak e, ‘Nina Jahwe Tuhan Si Meganjangna, “Aku, Dibata si nggeluh ersumpah, labo Kuakap meriah ngidah kalak jahat mate,+ tapi meriah Kuakap adi kalak jahat robah arah perbahanenna+ janah tetap ia nggeluh.+ O kalak Israel, robahlah, robahlah kena arah perbahanen kena si jahat.+ Engkai maka pangen akap kena mate?”’+
12 “O anak manusia, kataken man bangsandu, ‘Adi lit kalak si benar mberontak, perbahanenna si benar e labo nelamatken ia.+ Tapi adi lit kalak jahat si robah, perbahanenna si jahat e labo erban ia mate.+ Bage ka pe kalak si benar, sanga lakokenna dosa, perbahanenna si benar ndai labo erban ia tetap nggeluh.+
13 Sanga Kukataken man kalak si benar, “Pasti kam tetap nggeluh,” janah kenca si e lakokenna kai si salah*+ perban akapna perbahanenna si benar sedekah enda banci nelamatken ia. Labo pagi iinget sada pe perbahanenna si benar e, pasti ia mate perban kesalahenna e.+
14 “‘Sanga Kukataken man kalak jahat, “Pasti kam mate,” tapi kenca si e robah ia arah dosana nari janah lakokenna kai si adil ras benar,+
15 ulihken kalak jahat e barang jaminen si enggo buatna,+ galarina kai si enggo rampokna,+ dalankenna ka peraturen-peraturen si mereken kegeluhen, janah la lakokenna kai si salah. Pasti ia tetap nggeluh,+ labo ia mate.
16 Sada pe dosana e lanai iinget.+ Pasti ia tetap nggeluh perban lakokenna kai si adil ras benar.’+
17 “Tapi nina bangsandu e, ‘Perbahanen Jahwe la adil,’ situhuna perbahanen kalak e nge si la adil.
18 “Adi tadingken kalak si benar perbahanenna si benar janah lakokenna kai si salah, pasti ia mate.+
19 Tapi adi lit kalak jahat si robah arah perbahanenna si jahat, janah lakokenna kai si adil ras benar, pasti ia tetap nggeluh.+
20 “Tapi ning kena, ‘Perbahanen Jahwe la adil.’+ O kalak Israel, Kuhakimi pagi kena masing-masing menurut perbahanen kena.”
21 Dungna bas tahun si pe-12-ken, bulan si pe-10-ken, wari si pelimaken bas bulan e, kenca kami itaban, lit sekalak dilaki si kiam arah Jerusalem reh ndahi aku+ janah nina, “Kota e enggo italuken!”+
22 Bas berngi sope lenga dilaki ndai reh, kuasa* Jahwe reh ku aku janah bukaNa babahku. Emaka paginna sanga reh dilaki ndai ndahi aku paksa erpagi-pagi, enggo banci aku ngerana janah lanai aku bisu.+
23 Kenca si e ngerana ka Jahwe man bangku,
24 “O anak manusia, nina kalak si tading bas reruntuhen+ e kerna negri Israel, ‘Abraham sekalak ngenca tapi banci idatna negri enda jadi warisen.+ Negri e pasti jadi jangta perban kita enterem.’
25 “Emaka kataken man kalak e, ‘Nina Jahwe Tuhan Si Meganjangna, “Pan kena daging ras darehna,+ tek kena man berhala-berhala kena si erban ciga ate,* janah lalap kena munuh.+ Cocok kin kena ndatken negri e?
26 Andalken kena pedang kena,+ lakoken kena kai si erban ciga ate, janah erhubungen seks kena ras diberu kalak.+ Cocok kin kena ndatken negri e?”’+
27 “Arus bagenda nindu man kalak e, ‘Nina Jahwe Tuhan Si Meganjangna, “Aku, Dibata si nggeluh ersumpah, kalak si tading bas reruntuhen mate pagi ban pedang. Kalak si tading bas taneh si mbelang janah peren, Kubereken pagi jadi pangan binatang buas. Kalak si lit bas tembok ras gua, mate pagi perban penakit.+
28 Kuban pagi negri e jadi gersang janah la iingani.+ Kupengadi pagi kesombongenna. Gunung-gunung Israel lanai pagi iingani+ janah lanai lit kalak si lewat arah je.
29 Teh kalak e pagi maka Aku kap Jahwe sanga Kuban negri e jadi gersang janah lanai iingani+ perban kerina si erban ciga ate si lakoken kalak e.”’+
30 “O anak manusia, kalak sada bangsandu enggo ncakapken kam i deher tembok-tembok ras pintu-pintu rumah.+ Masing-masing kalak e ngataken man seninana, ‘Ota, mari sibegiken kai nina Jahwe.’
31 Enterem pagi kalak e pulung i lebe-lebendu selaku umatKu janah begiken kalak e katandu, tapi la lakokenna.+ Biber kalak e muji kam, tapi ukurna merangap guna ndatken untung si la jujur.
32 Menurut kalak e kam bagi kalak si mejile sorana, si beluh main alat musik si ersenar, si ngendeken lagu kerna ate ngena. Begiken kalak e katandu, tapi sada pe la lakokenna.
33 Kata-katandu pasti terjadi. Sanga terjadi pagi si e, teh kalak maka lit kepe nabi i tengah-tengah kalak e.”+
Cataten i teruh
^ Ntah “la adil.”
^ As. “tan.”
^ Kata enda bas bahasa Heber banci jadi lit hubungenna ras kata “tai” guna ncidahken perasan ciga ate.
