Esekiel 34:1-31
34 Ngerana ka Jahwe man bangku, nina,
2 “O anak manusia, ernubuatlah kerna permakan-permakan Israel. Ernubuatlah janah kataken man permakan-permakan e, ‘Bagenda nina Jahwe Tuhan Si Meganjangna, “O permakan-permakan kalak Israel,+ cilaka me kam, dirindu ngenca berendu man! La kin arusna biri-biri nge si ibere permakan man?+
3 Pan kena lemak biri-biri e, ban kena mbuluna jadi baju kena, geleh kena binatang si mburna,+ tapi biri-biri e la bere kena man.+
4 La pegegehi kena si lemah. La tambari kena si sakit. La baluti kena si luka. La baba kena mulih si papak. La darami kena si bene.+ Kejam ras kasar perbahanen kena man biri-biri e.+
5 Emaka merap biri-biri e perban la lit permakanna.+ Merap ia kerina jadi pangan binatang buas.
6 Papak biri-biriKu bas gunung-gunung bage pe bas tiap bukit si meganjang. Biri-biriKu merap i belang-belang doni, la lit si ndaramisa janah la lit si erusaha ndatkenca.
7 “‘“Emaka o permakan-permakan, begiken kai nina Jahwe,
8 ‘“Aku, Dibata si nggeluh ersumpah,” nina Jahwe Tuhan Si Meganjangna, “perban biri-biriKu jadi mangsa binatang buas jenari ipanna biri-biriKu e perban la lit permakanna, la darami permakanKu biri-biriKu e, dirina saja ngenca si terus berena man tapi biri-biriKu la berena man,”’
9 emaka o permakan-permakan, begikenlah kai nina Jahwe.
10 Bagenda nina Jahwe Tuhan Si Meganjangna, ‘Kulawan permakan-permakan e, janah Kubuat biri-biriKu arah kalak e.* Lanai pagi Kupediat kalak e si ngurus* biri-biriKu+ janah permakan-permakan e lanai pagi mbesuri dirina saja. Kuselamatken pagi biri-biriKu arah kalak e nari, biri-biriKu lanai pagi jadi pangan kalak e.’”
11 “‘Bagenda nina Jahwe Tuhan Si Meganjangna, “Aku, Aku pagi si ndarami biri-biriKu, Aku si mperdiateken kalak e.+
12 Kuurus pagi biri-biriKu bagi permakan si ndatken biri-birina si merap janah berena man.+ Kuselamatken pagi biri-biri e arah kerina ingan biri-biri e merap bas wari si embunna mbiring janah mekapal.+
13 Kubaba pagi biri-biri e ndarat arah tengah-tengah bangsa-bangsa nari janah Kupepulung arah erbage negri. Kubaba biri-biri e ku negrina janah Kubere man i gunung-gunung Israel,+ i deher lau maler, janah i bas daerah si iingani bas negri e.
14 Kubereken pagi biri-biri e man bas mbalmbal si mbur dukutna janah nggagat pagi ia i gunung-gunung Israel si meganjang.+ Medem-medem pagi ia i je bas mbalmbal si mbur dukutna,+ janah panna pagi dukut si mejilena si lit bas gunung-gunung Israel.”
15 “‘“Aku pagi si mere man biri-biriKu,+ Kubereken pagi inganna ngadi-ngadi,”+ nina Jahwe Tuhan Si Meganjangna.
16 “Si bene Kudarami,+ si papak Kubaba mulih, si luka Kubaluti, janah si lemah Kupegegehi. Tapi si mbur ras si megegeh Kukernepken. Kuhakimi pagi kalak e janah Kubereken hukumen si patut man bana.”
17 “‘O biri-biriKu, bagenda nina Jahwe Tuhan Si Meganjangna, “Aku si jadi hakim antara sada biri-biri ras biri-biri si debanna, bage pe antara biri-biri jantan ras kambing jantan.+
18 Lenga kin bias akap kena man bas mbalmbal si mejilena? Arus ka kin dedehi kena mbalmbal si deban? Kenca inem kena lau si jernihna, arus kin kotori kena launa alu merjakisa?
19 Arus kin biri-biriKu man bas mbalmbal si enggo perjaki kena janah minem arah lau si enggo kotor ban nahe kena?”
20 “‘Emaka bagenda nina Jahwe Tuhan Si Meganjangna man kalak e, “Aku, Aku pagi si jadi hakim antara biri-biri si mbur ras biri-biri si kertang.
21 Alu dagingndu ras tandukndu, terus sorongndu ras tandukndu kerina si sakit seh ngasa merap kalak e ku darat.
22 Aku pagi si nelamatken biri-biriKu, lanai pagi kalak e jadi mangsa.+ Aku pagi si jadi hakim i tengah biri-biriKu.
23 Kupilih pagi sekalak permakan man kalak e,+ eme pelayanKu Daud.+ Berena pagi kalak e man. Payo, ia pagi si mere kalak e man janah ia jadi permakanna.+
24 Aku Jahwe jadi Dibatana pagi,+ pelayanKu Daud jadi peminpin kalak e.+ Aku Jahwe si enggo ngatakenca.
25 “‘“Kuban pagi perjanjin dame ras kalak e,+ Kupelawes pagi binatang buas arah negri e.+ Emaka aman pagi akap kalak e tading bas taneh mesawang* bage pe medem bas kerangen.+
26 Kuban pagi kalak e ras daerah si lit i sekeliling bukitKu jadi pasu-pasu.+ Kupenusur pagi udan bas waktu si tepat. Reh pagi pasu-pasu bagi udan.+
27 Erbuah pagi batang kayu si lit i juma janah taneh mereken hasilna.+ Aman pagi akap kalak e tading bas negri e. Teh kalak e pagi maka Aku kap Jahwe sanga Kupenggelken kayu pasangen*+ kalak e, janah Kuselamatken kalak e arah kalak si erban ia jadi budak.
28 Lanai pagi kalak e jadi mangsa bangsa-bangsa, binatang buas si lit i doni lanai pagi mangani kalak e. Aman pagi akap kalak e tading i je, la lit si erban kalak e mbiar.+
29 “‘“Kuban pagi terkenal juma kalak e, lanai pagi kalak e mate perban kelihen bas negri e.+ Lanai pagi kalak e ihina bangsa-bangsa.+
30 ‘Teh kalak e pagi maka Aku kap Jahwe Dibata kalak e, Aku si nemani kalak e. Kalak Israel eme umatKu,’+ nina Jahwe Tuhan Si Meganjangna.”’
31 “‘O biri-biriKu,+ biri-biri si enggo Kuurus, kena manusia kap ngenca, Aku Dibata kena,’ nina Jahwe Tuhan Si Meganjangna.”
Cataten i teruh
^ Ntah “janah Kupindo pertanggung jawapen kalak e kerna biri-biriKu.”
^ Ntah “mere man.”
^ Taneh si mbelang si jarang iingani.
^ Pasangen eme alat si biasa itama ku kuduk manusia ntah pe binatang guna maba baban.
