Esekiel 35:1-15
-
Nubuat kerna pegunungen Seir (1-15)
35 Ngerana ka Jahwe man bangku, nina,
2 “O anak manusia, alakenlah ku daerah pegunungen Seir+ janah ernubuatlah kerna ia.+
3 Kataken man bana, ‘Bagenda nina Jahwe Tuhan Si Meganjangna, “O daerah pegunungen Seir, Kulawan kam janah Kuangkat tanKu ngelawan kam. Kuban pagi kam jadi taneh si gersang ras la iingani.+
4 Kuban pagi kota-kotandu jadi reruntuhen. Kuban pagi negrindu jadi gersang janah la iingani.+ Tehndu pagi maka Aku kap Jahwe.
5 Lalap segat atendu man kalak Israel.+ Pediatndu kalak e ibunuh sanga kalak e kena masalah, eme sanga kalak e ndatken hukumen si terakhir.”’+
6 “Nina Jahwe Tuhan Si Meganjangna, ‘Aku, Dibata si nggeluh ersumpah, enggo Kutetapken kematenndu, janah la kam banci kiam arah e nari.+ Perban segat atendu dareh si amburkenndu, iayaki kematen pagi kam.+
7 Kuban pagi daerah pegunungen Seir gersang janah la iingani.+ Kubunuh pagi kalak si lewat arah je nari bage pe kalak si mulihken ku je.
8 Dem pagi kalak si terbunuh bas gunung-gunungndu. Amparen pagi kalak si mate perban pedang bas bukit-bukitndu, bas lembah-lembahndu, bage pe bas kerina lau malerndu.
9 Kuban pagi kam gersang seh rasa lalap janah kota-kotandu la iingani.+ Tehndu pagi maka Aku kap Jahwe.’
10 “Perban nindu, ‘Dua bangsa enda ras dua negri enda jadi jangku, jadi jangta pagi e duana,’+ padahal Jahwe lit i je,
11 emaka nina Jahwe Tuhan Si Meganjangna, ‘Aku, Dibata si nggeluh ersumpah, Kuban pagi man bandu bagi rawa ras cian ate si cidahkenndu man kalak e perban segat atendu kalak e.+ Sanga Kuhakimi kam, teh kalak e pagi ise Aku.
12 Tehndu pagi maka Aku, Jahwe, enggo megi kerina kata-kata si kurang ajar si belaskenndu kerna gunung-gunung Israel. Nindu, “Gunung-gunung e enggo ipediat la iingani. Enggo ibere kesempaten man banta guna ngancurkenca.”
13 Sombong kena ngerana kerna Aku, janah la erngadi-ngadi hina kena Aku.+ Kubegi kerina e.’
14 “Bagenda nina Jahwe Tuhan Si Meganjangna, ‘Sanga Kuban kam gersang ras la iingani, ermeriah ukur belang-belang doni.
15 Perban meriah ukurndu sanga taneh warisen Israel la iingani, bage pagi Kuban man bandu.+ O daerah pegunungen Seir eme kerina daerah Edom,+ jadi reruntuhen si la iingani pagi kam. Teh kalak pagi maka Aku kap Jahwe.’”
