Esekiel 36:1-38
36 “O anak manusia, ernubuatlah kerna gunung-gunung Israel janah kataken, ‘O gunung-gunung Israel, begiken kai nina Jahwe.
2 Bagenda nina Jahwe Tuhan Si Meganjangna, “Nina musuh kerna kam, ‘Cocok kel! Ingan-inganna si meganjang si lit mbarenda nari pe jadi jangta!’”’+
3 “Emaka ernubuatlah janah kataken, ‘Bagenda nina Jahwe Tuhan Si Meganjangna, “Perban ban kalak e kam lanai iingani janah iserang arah erbage arah, emaka kam jadi jang bangsa-bangsa si lit denga i sekelilingndu. Kam lalap ipitnah janah jadi cakap.+
4 Emaka o gunung-gunung Israel, begiken kai nina Jahwe Tuhan Si Meganjangna! Bagenda nina Jahwe Tuhan Si Meganjangna man gunung-gunung ras bukit-bukit, man lau maler ras lembah-lembah, man reruntuhen si la iingani,+ man kota-kota si itadingken, ijarah, ras itokohi bangsa-bangsa si lit denga i sekeliling kalak e.+
5 Janah man si e kerina nina Jahwe Tuhan Si Meganjangna, ‘Bas rawaKu si gara bagi api,+ ngerana Aku ngelawan bangsa-bangsa e ras kerina daerah Edom, eme kalak si nokoh ras meriah ukurna+ sanga rebutna tanehKu jadi jangna, guna njarahsa ras muat mbalmbalna.’”’+
6 “Emaka ernubuatlah kerna negri Israel, kataken man gunung-gunung ras bukit-bukit, man lau maler ras man lembah-lembah, ‘Bagenda nina Jahwe Tuhan Si Meganjangna, “Ngerana pagi Aku bas rawaKu bage pe bas pernembeh ateKu, perban kam ihina bangsa-bangsa.”’+
7 “Emaka bagenda nina Jahwe Tuhan Si Meganjangna, ‘Kuangkat pagi tanKu guna ersumpah, maka mela pagi akap bangsa-bangsa si lit i sekeliling kena.+
8 Tapi o gunung-gunung Israel, ercabang pagi kena janah erbuah man umatKu Israel,+ perban ntisik nari mulih kalak e.
9 Sebap Aku ras kena, Kuperdiateken pagi kena mulihi, iperjumai pagi kena ras isuani alu benih.
10 Kuban pagi rakyat kena eme kerina kalak Israel reh teremna. Iingani pagi kota-kota kena+ janah reruntuhenna ibangun pagi mulihi.+
11 Kuban pagi rakyat kena ras asuh-asuhen+ kena reh buena, rakyat kena terus pagi reh teremna janah asuh-asuhen kena terus reh buena. Kuban pagi kena iingani mulihi bagi si mbarenda.+ Kuban pagi kena bayaken asangken mbarenda.+ Teh kena pagi maka Aku kap Jahwe.+
12 Kusuruh pagi umatKu Israel erdalan-dalan i datas kena janah kena jadi jang kalak e.+ Kena jadi warisen man kalak e, lanai pernah iban kena kalak e kebenen anakna.’”+
13 “Bagenda nina Jahwe Tuhan Si Meganjangna, ‘Perban ning kalak e man kena, “Kam negri si mangani jelma ras si erban bangsandu kebenen anakna,”’
14 ‘emaka lanai pagi panganindu jelma janah lanai banndu bangsandu kebenen anakna,’ nina Jahwe Tuhan Si Meganjangna.
15 ‘Lanai pagi Kupediat kam ihina bangsa-bangsa ntah pe itokohi kalak.+ Lanai pagi banndu bangsandu jadi reruntuhen,’ nina Jahwe Tuhan Si Meganjangna.”
16 Ngerana ka Jahwe man bangku, nina,
17 “O anak manusia, sanga tading kalak Israel bas negrina, najis ban kalak e negri e perban lagu langkah ras perbahanenna.+ Perbahanenna e bali Kuakap najisna bagi diberu si sangana haid.+
18 Emaka Kucurcurken pagi rawaKu man kalak e perban dareh si amburken kalak e bas negri e,+ bage pe perban najis ban kalak e negri e alu berhala-berhalana si erban ciga ate.*+
19 Emaka Kumerapken pagi kalak e ku tengah bangsa-bangsa bage pe ku erbage negri.+ Kuhakimi pagi kalak e menurut lagu langkah ras perbahanenna.
20 Tapi sanga lawes pagi kalak e ku bangsa-bangsa e, najis ban kalak si deban gelarKu si badia+ alu ngataken kerna kalak e, ‘Kalak enda umat Jahwe tapi terpaksa tadingken kalak e negriNa.’
21 Emaka Kubuktiken pagi maka Kuperdiateken gelarKu si badia, si najis ban kalak Israel i tengah bangsa-bangsa ingan kalak e lawes.”+
22 “Emaka kataken man kalak Israel, ‘Bagenda nina Jahwe Tuhan Si Meganjangna, “O kalak Israel, Kubaba kena mulih labo guna kena, tapi guna gelarKu si badia si najis ban kena i tengah bangsa-bangsa ingan kena lawes.”’+
23 ‘Pasti Kupebadia gelarKu si mbelin,+ si najis i tengah bangsa-bangsa, si najis ban kena i tengah-tengah kalak e. Teh bangsa-bangsa e pagi maka Aku kap Jahwe+ sanga ipebadia Aku i tengah-tengah kena i lebe-lebe kalak e,’ nina Jahwe Tuhan Si Meganjangna.
24 ‘Kubaba pagi kena arah bangsa-bangsa, Kupepulung pagi kena arah erbage negri jenari Kubaba kena ku negri kena.+
25 Kupercikken pagi lau si bersih man kena jenari bersih me kena.+ Kubersihken pagi kena arah kerina si najis+ si lit bas kena bage pe arah kerina berhala-berhala kena si erban ciga ate.+
26 Kubereken pagi pusuh+ ras perukuren si mbaru man kena.+ Kuambekken pagi pusuh si bagi batu+ arah daging kena janah Kubereken man kena pusuh si lembut.*
27 Kutamaken pagi kesah si badiaKu man kena. Kuban pagi gelah dalanken kena peraturen-peraturenKu+ ras patuhi kena janah lakoken kena undang-undangKu.
28 Kenca si e, tading pagi kena bas negri si Kubereken man nini bulang kena. Kena jadi umatKu, Aku jadi Dibata kena.’+
29 “‘Kuselamatken pagi kena arah kerina si najis si lit bas kena. Kusuruh pagi biji-bijin* gelah melala hasilna. Lanai pagi Kuban terjadi kelihen man kena.+
30 Kuban pagi melala hasil batang kayu bage pe hasil juma kena, gelah ula nai sakit akap kena ipermelaken i tengah bangsa-bangsa perban kelihen.+
31 Kenca si e, inget kena pagi lagu langkah kena si jahat ras perbahanen kena si la mehuli. Ciga pagi ate kena diri kena perban kesalahen ras perbahanen si erban ciga ate si lakoken kena.+
32 Tapi arus teh kena maka kerina e Kulakoken labo guna kena,’+ nina Jahwe Tuhan Si Meganjangna. ‘O kalak Israel, aturna mela akap kena janah terhina akap kena perban perbahanen kena.’
33 “Bagenda nina Jahwe Tuhan Si Meganjangna, ‘Bas wari Kubersihken kena arah kesalahen kena, Kuban pagi kota-kota iingani+ janah reruntuhen ibangun mulihi.+
34 Enggo idah kalak si lewat maka negri e la iingani, tapi isuani pagi negri e.
35 Ning kalak pagi, “Negri si la iingani e bagi Taman Eden,+ kota-kota si mbarenda jadi reruntuhen, si la iingani, janah hancur, gundari erbenteng janah iingani.”+
36 Bangsa-bangsa si lit denga i sekeliling kena, tehna pagi maka Aku Jahwe si mbangun kai si runtuh janah Kusuani negri si mbarenda la iingani. Aku Jahwe si ngatakenca janah Aku si ngelakokenca.’+
37 “Bagenda nina Jahwe Tuhan Si Meganjangna, ‘Kupediat pagi kalak Israel mindo man bangKu gelah reh teremna kalak e bagi biri-biri si melala janah pasti Kubereken pemindonna.
38 Bas kota si mbarenda jadi reruntuhen, dem pagi kalak i je,+ bagi kelompok kalak si badia ras kelompok biri-biri Jerusalem* sanga perayan.+ Teh kalak e pagi maka Aku kap Jahwe.’”
Cataten i teruh
^ Kata enda bas bahasa Heber banci jadi lit hubungenna ras kata “tai” guna ncidahken perasan ciga ate.
^ Maksudna, kalak si mis ndalanken petunjuk Dibata.
^ Ntah banci saja “bagi kelompok biri-biri si ikorbanken bas Jerusalem.”
