Esekiel 37:1-28
37 Kugejapken kesah si badia* Jahwe lit bas aku. Kenca si e baba kesah si badia Jahwe e aku ku tengah-tengah sada lembah.+ Dem tulan-tulan bas lembah e.
2 SuruhNa aku engkelilingi lembah e. Melala kel kuidah amparen tulan-tulan bas lembah e, kerah kel kerina tulan-tulan e.+
3 SungkunNa aku, “O anak manusia, banci kin tulan-tulan e nggeluh mulihi?” Ningku ngaloi, “O Jahwe Tuhan Si Meganjangna, Kam nge si metehsa.”+
4 Emaka nina man bangku, “Ernubuatlah kerna tulan-tulan e, kataken man bana, ‘O tulan-tulan si kerah, begikenlah kata-kata Jahwe,
5 “‘Bagenda nina Jahwe Tuhan Si Meganjangna man tulan-tulan e, “Kubereken kari kesah man kena janah nggeluh kena mulihi.+
6 Kuban kari lit urat-urat ras daging kena, Kututupi alu kulit jenari Kubereken kesah man kena, kenca si e nggeluh kena mulihi. Teh kena pagi maka Aku kap Jahwe.”’”
7 Emaka ernubuat aku bagi si enggo iperentahken. Kenca ernubuat aku, mis terbegi sora erderak-derak janah tulan-tulan e mulai ersada.
8 Kenca si e mulai kuidah reh urat-urat ras daging bas tulan-tulan e janah mulai itutupi kulit. Tapi lenga lit kesahna.
9 Kenca si e nina man bangku, “O anak manusia, ernubuatlah man angin, ernubuatlah, kataken man angin, ‘Bagenda nina Jahwe Tuhan Si Meganjangna, “O angin* rehlah arah empat arah, rembuslah ku kalak si ibunuh enda, gelah banci kalak e nggeluh mulihi.”’”
10 Emaka ernubuat aku bagi si perentahken man bangku. Rembus angin ku kalak e, nggeluh kalak e kerina jenari tedis ia kerina.+ Kalak e bagi pasuken si seh kel teremna.
11 Kenca si e nina man bangku, “O anak manusia, tulan-tulan enda eme kerina kalak Israel.+ Bagenda nina kalak e, ‘Tulan-tulan kami enggo kerah, lanai lit arapen kami.+ Kami enggo ipeserap.’
12 Emaka ernubuatlah, kataken man kalak e, ‘Bagenda nina Jahwe Tuhan Si Meganjangna, “O umatKu, Kubuka pagi kuburen kena,+ Kupedarat kena arah kuburen nari, jenari Kubaba kena ku negri Israel.+
13 O umatKu, teh kena pagi maka Aku kap Jahwe sanga Kubuka kuburen kena janah Kupedarat kena arah kuburen kena nari.”’+
14 ‘Kutamaken pagi gegehKu si badia bas kena, nggeluh pagi kena mulihi.+ Kuban pagi kena tading bas negri kena. Teh kena pagi maka Aku Jahwe si ngerana janah si enggo ngelakokenca,’ nina Jahwe.”
15 Ngerana ka Jahwe man bangku, nina,
16 “O anak manusia, buatlah sada tongkat, tulislah bagenda i je, ‘Man Juda ras man kalak Israel si ras ia.’+ Kenca si e buat ka sada tongkat nari, tulis ka bagenda i je, ‘Man Jusup eme tongkat Eperaim ras kerina kalak Israel si ras ia.’+
17 Pedeher tongkat e duana gelah jadi sada tongkat bas tanndu.+
18 Adi nina bangsandu, ‘Jelasken man kami kai maksudna e,’
19 kataken bagenda man kalak e, ‘Nina Jahwe Tuhan Si Meganjangna, “Kubuat pagi tongkat Jusup si lit bas tan Eperaim ras suku-suku Israel si ras ia, jenari Kupersada pagi ras tongkat Juda. Kuban pagi kalak e jadi sada tongkat,+ jadi sada pagi kalak e bas tanKu.”’
20 Tongkat-tongkat si enggo tulisndu e arus lit bas tanndu gelah banci idah kalak e.
21 “Kenca si e kataken bagenda man kalak e, ‘Nina Jahwe Tuhan Si Meganjangna, “Kubaba pagi kalak Israel arah tengah bangsa-bangsa ingan kalak e lawes, Kupepulung pagi kalak e arah kerina arah, jenari Kubaba pagi kalak e ku negrina.+
22 Kuban pagi kalak e jadi sada bangsa bas negri e+ i gunung-gunung Israel. Kerina kalak e iperentah sada raja pagi.+ Lanai pagi kalak e jadi dua bangsa. Lanai pagi kalak e terbagi jadi dua kerajan.+
23 Lanai pagi ban kalak e dirina najis alu berhala-berhalana si erban ciga ate,* alu perbahanenna si erban ciga ate, bage pe alu kerina pelanggarenna.+ Kuselamatken pagi kalak e arah kerina dosa si lakokenna perban la setia janah Kubersihken pagi kalak e. Kalak e jadi umatKu pagi, Aku jadi Dibata kalak e.+
24 “‘“PelayanKu Daud pagi si jadi raja kalak e,+ kerina kalak e sada pagi permakanna.+ Dalanken kalak e pagi undang-undangKu, tuhu-tuhu pagi patuhina peraturen-peraturenKu.+
25 Tading pagi kalak e bas negri si Kubereken man pelayanKu Jakup, eme ingan nini bulang kena e tading.+ Kalak e, anak-anakna, ras kempu-kempuna+ tading pagi i je seh rasa lalap.+ PelayanKu Daud pagi si jadi peminpin kalak e seh rasa lalap.+
26 “‘“Kuban pagi perjanjin dame ras kalak e.+ Perjanjin e lit seh rasa lalap. Kusikapken pagi ingan kalak e, Kuban pagi kalak e reh teremna.+ Kuban pagi inganKu si badia i tengah-tengah kalak e seh rasa lalap.
27 KemahKu* lit i tengah-tengah kalak e. Aku jadi Dibata kalak e, kalak e jadi umatKu.+
28 Teh bangsa-bangsa pagi maka Aku Jahwe si mpebadia Israel sanga inganKu si badia lit i tengah-tengah kalak e seh rasa lalap.”’”+
Cataten i teruh
^ As. “tan.”
^ Ntah “kesah.”
^ Kata enda bas bahasa Heber banci jadi lit hubungenna ras kata “tai” guna ncidahken perasan ciga ate.
^ Ntah “InganKu tading; RumahKu.”
