Esekiel 38:1-23
38 Ngerana ka Jahwe man bangku, nina,
2 “O anak manusia, alakenlah ku Gog arah negri Magog+ eme peminpin si meganjangna i Mesek ras Tubal.+ Ernubuatlah kerna ia.+
3 Bagenda ningen, ‘Nina Jahwe Tuhan Si Meganjangna, “O Gog, peminpin si meganjangna i Mesek ras Tubal, Kulawan pagi kam.
4 Kuban pagi kam nilah, Kupasang pagi kawit bas rahangndu+ jenari Kubaba kam ku darat radu ras kerina prajuritndu,+ kuda-kuda ras si nangkihisa, kerina si make baju si mewah, bage pe pasuken si mbelin si make perisai* si galang ras perisai si kitik.* Kerina kalak e maba pedang.
5 Persia, Etiopia, ras Put+ lit ras kalak e, kerina kalak e make perisai si kitik ras pelindung takal.
6 Ikut ka Gomer ras kerina pasukenna, bage pe keturunen Togarma+ arah ingan si ndauhna kel i utara ras kerina pasukenna. Melala pagi bangsa si ikut ras kam.+
7 “‘“Ersikaplah kam bage pe kerina pasuken si pulung ras kam. Kam pagi si jadi komandan* kalak e.
8 “‘“Kenca enggo ndekah pagi, ilebuh* me kam. Bas akhir tahun-tahun e, serangndu pagi negri kalak si enggo malem arah serangen pedang, eme kalak si ipepulung arah erbage bangsa ku gunung-gunung Israel, si enggo ndekah la iingani. Ipepulung pagi penduduk negri e arah erbage bangsa, kerina kalak e aman pagi akapna tading i je.+
9 Serangndu pagi kalak e bagi badai. Tutupindu pagi negri e bagi embun. Kam pagi si nutupisa radu ras kerina pasukenndu bage pe melala bangsa.”’
10 “Bagenda nina Jahwe Tuhan Si Meganjangna, ‘Bas wari e, rukur pagi kam, turah pagi bas pusuhndu erban rencana si jahat.
11 Nindu pagi, “Kuserang pagi daerah kuta-kuta si la lit tembok perlindungenna.+ Kuserang pagi kalak si aman akapna nggeluh janah tenang akapna. Kerina kalak e tading i kuta-kuta si la ilindungi tembok, si la lit palang-palangna, ras la lit gerbang-gerbangna.”
12 Rampokndu atendu melala barang janah rampasndu. Serangndu atendu ingan-ingan si enggo hancur si gundari iingani,+ serangndu atendu kalak si enggo ipepulung arah erbage bangsa+ eme kalak si mpepulung erta ras barang-barang,+ kalak si tading i tengah-tengah doni.
13 “‘Syeba,+ Dedan,+ pebisnis arah Tarsis,+ bage pe kerina prajuritna ngerana pagi man bandu, nina, “La kin guna muat melala barang rampasen ras barang rampoken nge atendu maka kam nyerang? La kin guna muat pirak, emas, erta, barang-barang, ras ngerampok barang-barang jarahen nge atendu maka pepulungndu pasukenndu?”’
14 “Emaka o anak manusia, ernubuatlah kam, kataken bagenda man Gog, ‘Nina Jahwe Tuhan Si Meganjangna, “Bas wari e pasti tehndu maka aman pergeluh umatKu Israel.+
15 Reh pagi kam arah inganndu nari, arah ingan si ndauhna i utara.+ Reh pagi kam radu ras melala bangsa. Kerina kalak e erkuda. Enterem kel kalak e, kalak e pasuken si mbelin.+
16 O Gog, serangndu pagi umatKu Israel bagi embun nutupi daraten. Bas pendungi wari-wari e pagi, Kuban gelah serangndu negriKu,+ gelah teh bangsa-bangsa pagi kerna Aku sanga Kupebadia diriKu arah kam i lebe-lebe bangsa-bangsa e.”’+
17 “Bagenda nina Jahwe Tuhan Si Meganjangna, ‘Kam kap si Kumaksud sanga ngerana Aku mbarenda arah nabi-nabiKu i Israel. Enggo ertahun-tahun kalak e ernubuat maka kam pagi si reh nyerang kalak Israel.’
18 “Nina Jahwe Tuhan Si Meganjangna, ‘Bas wari e sanga reh Gog nyerang negri Israel, gara kel pagi rawaKu.+
19 Bas rawaKu, eme bas pernembeh ateKu si gara, ngerana pagi Aku. Bas wari e, terjadi pagi gempa bumi si megegeh bas negri Israel.
20 Kerina ikan bas laut, kerina perik i langit, kerina binatang buas i taneh mesawang,* kerina binatang si nggawang i taneh, ras kerina manusia i doni nggirgir pagi perban Aku. Gunung-gunung pe runtuh pagi,+ tebing-tebing longsor, kerina tembok runtuh ku taneh.’
21 “Nina Jahwe Tuhan Si Meganjangna, ‘Kulebuh pagi pedang guna ngelawan ia bas kerina gunungKu. Kerina kalak siserang-serangen.+
22 Kuhakimi pagi ia. Kuban pagi reh wabah penakit+ man bana bage pe man prajuritna. Enterem pagi si mate. Kupenusur pagi udan si seh kel derna, udan es,+ api,+ ras belerang man bana,+ bage pe man pasukenna ras man melala bangsa si lit ras ia.+
23 Pasti Kumuliaken diriKu, Kupebadia, janah Kuban gelah Aku itandai i lebe-lebe melala bangsa. Teh kalak e pagi maka Aku kap Jahwe.’
Cataten i teruh
^ Ntah “ampang-ampang.”
^ Biasana enda perisai si ibaba sekalak pemanah.
^ As. “penjaga.”
^ Ntah “iperdiateken.”
^ Taneh si mbelang si jarang iingani.
