Esekiel 39:1-29
39 “O anak manusia, ernubuatlah kerna Gog,+ kataken man bana, ‘Bagenda nina Jahwe Tuhan Si Meganjangna, “O Gog peminpin si meganjangna i Mesek ras Tubal, Kulawan pagi kam.+
2 Kuban pagi kam nilah, Kubabai pagi kam. Kuban kam reh arah negri si ndauhna kel i utara+ jenari Kubaba kam ku gunung-gunung Israel.
3 Kupekpek pagi panahndu arah tan kirindu janah Kuban anak-anak panahndu ndabuh arah tan kananndu.
4 Mate pagi kam bas gunung-gunung Israel+ radu ras kerina pasukenndu bage pe bangsa-bangsa si ikut ras kam. Kuban pagi kam jadi pangan man kerina perik pemangsa ras binatang buas.”’+
5 “‘Mate pagi kam bas taneh si mbelang ras peren,+ sebap Aku si ngatakenca,’ nina Jahwe Tuhan Si Meganjangna.
6 “‘Kuban pagi reh api man Magog ras man kalak si aman akapna tading i pulau-pulau.+ Teh kalak e pagi maka Aku kap Jahwe.
7 Kuban pagi gelarKu si badia itandai i tengah-tengah umatKu Israel. Lanai pagi Kupediat gelarKu si badia iban jadi najis. Teh bangsa-bangsa pagi maka Aku kap Jahwe,+ Dibata Si Badia bas Israel.’+
8 “Nina Jahwe Tuhan Si Meganjangna, ‘Payo, enda pasti terjadi janah pasti pagi reh. Enda me wari si enggo pernah Kukataken.
9 Ndarat pagi penduduk kota e, pegara kalak e api alu nutung senjata-senjata. Senjata e eme perisai si kitik,* perisai* si galang, panah, anak panah, tongkat,* bage pe tombak. Si e kerina igunaken kalak e pegara api+ pitu tahun dekahna.
10 Lanai perlu buat kalak e kayu arah juma nari ntah pe ranting arah kerangen nari, sebap senjata-senjata e pagi si ipake kalak e pegara api.’
“‘Jarah kalak e pagi kalak si njarah ia janah rampok kalak e pagi kalak si ngerampok ia,’ nina Jahwe Tuhan Si Meganjangna.
11 “‘Bas wari e, Kubereken pagi ingan jadi kuburen Gog+ bas lembah Israel. Lembah e lit i sebelah timur arah laut janah lembah e ilewati kalak. Tapi ihalangi lembah e pagi kalak si lewat. Bas ingan e me Gog ras kerina pasukenna ikuburken. Ingan e igelari kalak e Lembah Pasuken Gog.*+
12 Pitu bulan dekahna kalak Israel nguburken mayat kalak e maka bersih negri e.+
13 Kerina rakyat negri e ikut nguburken kalak e. Si e erban kalak bas negri e jadi terkenal bas wari Kumuliaken diriKu,’+ nina Jahwe Tuhan Si Meganjangna.
14 “‘Lit pagi kalak si itugasken guna terus ndalani belang-belang negri e janah nguburken mayat si lit denga i datas taneh, gelah bersih doni. Pitu bulan dekahna kalak e terus ndaramisa.
15 Sanga kalak si itugasken guna terus ndalani belang-belang negri e ngidah tulan-tulan manusia, banna pagi tanda i sebelahna. Jenari, ikuburken tulan-tulan ndai bas Lembah Pasuken Gog.+ Si nguburkenca eme kalak si enggo itugasken.
16 I je pe lit ka pagi kota si gelarna Hamonah.* Bage me cara kalak e mbersihken negri e.’+
17 “O anak manusia, bagenda nina Jahwe Tuhan Si Meganjangna, ‘Kataken man kerina jenis perik ras kerina binatang buas, “Pulunglah janah rehlah. Pulunglah i sekeliling korban si enggo Kusikapken man kena, eme korban si mbelin bas gunung-gunung Israel.+ Pan kena pagi daging janah inem kena dareh.+
18 Pan kena pagi daging kalak si megegeh janah inem kena dareh peminpin-peminpin si lit i doni. Kalak e bagi biri-biri jantan, anak biri-biri, kambing, ras lembu jantan. Kerina e binatang-binatang si mbur arah Basan.
19 Kusikapken pagi korban man kena, pan kena pagi lemakna seh ngasa mutah ate kena janah inem kena darehna seh ngasa mabuk.”’
20 “‘Bas mejaKu, besur pagi kena mangani kuda, mangani kalak si maba gereta, kalak si megegeh, ras kerina prajurit,’+ nina Jahwe Tuhan Si Meganjangna.
21 “‘Kucidahken pagi kemulianKu i tengah bangsa-bangsa. Idah bangsa-bangsa pagi penghakimen si Kulakoken ras kuasa si Kucidahken man kalak e.+
22 Mulai bas wari e, teh kalak Israel pagi maka Aku kap Jahwe Dibata kalak e.
23 Teh bangsa-bangsa pagi maka kalak Israel enggo jadi tabanen perban kesalahen kalak e, perban kalak e la setia man bangKu.+ Lanai pagi Kuperdiateken kalak e+ janah Kuserahken kalak e man musuh-musuhna,+ emaka mate pagi kalak e kerina perban pedang.
24 Kulakoken pagi man kalak e menurut kai si najis si lakokenna bage pe menurut pelanggarenna. Emaka lanai pagi Kuperdiateken kalak e.’
25 “Bagenda nina Jahwe Tuhan Si Meganjangna, ‘Kubaba pagi keturunen Jakup+ mulih arah tabanen nari ku taneh kalak e, mekuah ateKu man kerina keturunen Israel.+ Semangat pagi Aku mbela gelarKu si badia.+
26 Kenca kalak e ipermelaken perban la setia man bangKu,+ aman pagi akap kalak e tading i negrina. La lit si erban kalak e mbiar.+
27 Kubaba pagi kalak e mulih arah bangsa-bangsa janah Kupepulung pagi kalak e arah negri musuh-musuhna.+ Kupebadia ka pagi gelarKu i tengah-tengah kalak e i lebe bangsa-bangsa.’+
28 “‘Teh kalak e pagi maka Aku kap Jahwe Dibata kalak e sanga Kuban kalak e jadi tabanen ku tengah bangsa-bangsa. Kenca si e, Kupepulung kalak e mulihi ku negrina. La lit sekalak pe si tading.+
29 Kuperdiateken pagi kalak e+ janah Kucurcurken kesah si badiaKu man kalak Israel,’+ nina Jahwe Tuhan Si Meganjangna.”
Cataten i teruh
^ Biasana enda perisai si ibaba sekalak pemanah.
^ Ntah banci saja “lembing.”
^ Ntah “ampang-ampang.”
^ Ntah “Lembah Hamon-Gog.”
^ Ertina “Pasuken.”
