Esekiel 40:1-49
40 Dua pulu lima tahun kenca kami itaban,+ bas awal tahun e, bas wari si pe-10-ken eme 14 tahun kenca kota e irebut,+ tepat bas wari e reh kuasa* Jahwe man bangku janah ibabaNa aku ku kota e.+
2 Bas sada pengenehenen* arah Dibata, babaNa aku ku negri Israel janah tamakenNa aku bas sada gunung si seh kel ganjangna.+ I sebelah selatan gunung e, lit kuidah i je si bali bagi kota.
3 Sanga babaNa aku ku je, Kuidah sekalak dilaki si ersinar bagi tembaga.+ Ijemakna tali linen ras tongkat pengukur*+ janah tedis ia i gerbang.
4 Nina dilaki e man bangku, “O anak manusia, tutuslah atendu ngenenca, begiken alu megermet, janah perdiateken kerina si kucidahken man bandu, sebap e me tujunna maka ibaba kam ku jenda. Kataken man kerina kalak Israel kerina si idahndu e.”+
5 Lit kuidah tembok i sekeliling rumah pertoton.* Bas tan dilaki e lit tongkat pengukur si gedangna enem hasta (tiap sada hasta gedangna tambah sada tapak-tapak tan).* Mulai ukurna tembok e, kapalna sada tongkat janah ganjangna sada tongkat.
6 Kenca si e lawes ia ku gerbang si pengalana ku timur,+ janah erdalan ia arah tangga gerbang e. Mulai me ukurna daerah pintu masuk gerbang, belangna sada tongkat. Belang daerah pintu masuk si sada nari pe sada tongkat.
7 Tiap ruang penjaga gedangna sada tongkat janah belangna sada tongkat. Jarak antara ruang-ruang penjaga e lit lima hasta.+ Daerah ingan masuk gerbang si lit i samping teras gerbang si pengalana ku rumah pertoton, belangna sada tongkat.
8 Ukurna ka teras gerbang si pengalana ku rumah pertoton, janah ukurenna sada tongkat.
9 Kenca si e, ukurna teras gerbang, ukurenna waluh hasta. Ukurna ka tiang-tiang sampingna, ukurenna dua hasta. Teras gerbang e lit i deher pintu gerbang janah pengalana ku rumah pertoton.
10 Lit telu ruang penjaga i sebelah kiri ras sebelah kanan gerbang timur e. Teluna ruangen e seri ukurenna. Tiang-tiang samping bas sebelah kanan ras kiri gerbang e pe seri ukurenna.
11 Kenca si e ukurna belang daerah pintu masuk gerbang e, ukurenna sepuluh hasta. Belang gerbang e 13 hasta.
12 Tiap ruang penjaga si lit i sebelah kanan ras kiri gerbang e, ukurenna enem hasta. I lebe-lebe tiap ruang penjaga e lit daerah si ipagari, ukurenna sada hasta.
13 Kenca si e, ukurna gerbang e arah sada atap ruang penjaga* ku atap ruang penjaga si i sebrangna, ukurenna lit 25 hasta. Pintu masuk ruang penjaga e sihadap-hadapen ras pintu masuk ruang penjaga si debanna.+
14 Jenari ukurna tiang-tiang samping, ganjangna 60 hasta bagi tiang-tiang samping bas kerina gerbang si lit i sekeliling halamen.
15 Arah lebe-lebe pintu masuk gerbang seh ku lebe-lebe halamen gerbang si pengalana ku bas rumah pertoton, ukurenna 50 hasta.
16 Bas ruang-ruang penjaga bage pe bas tiang-tiang samping si lit i sebelah kanan ras kiri gerbang, lit jendela si kusenna reh sempitna arah bas nari ku darat.+ Bas tiap teras lit jendela janah bas tiang-tiang samping lit gambar batang kurma.+
17 Kenca si e babaNa aku ku halamen si arah darat. I je lit kuidah ruangen-ruangen+ ingan man bage pe lante batu i sekeliling halamen e. I datas lante batu e lit 30 ruangen ingan man.
18 Gedang lante batu e seri ras gedang gerbang si lit i je. Lante batu e teruhen asangken lante halamen si arah bas.
19 Kenca si e, ukurna jarak arah lebe-lebe gerbang si meteruh seh ku bagin darat halamen si arah bas. Jarakna lit 100 hasta adi iukur arah gerbang timur ntah pe gerbang utara.
20 Bas halamen si arah darat, lit gerbang si pengalana ku utara, jenari ukurna gedangna ras belangna.
21 Bas kanan ras kiri gerbang e lit telu ruang penjaga. Tiang-tiang samping ras terasna seri ukurenna ras si lit i gerbang si pertama. Gedangna 50 hasta janah belangna 25 hasta.
22 Ukuren jendela-jendelana, terasna, gambar batang kurmana,+ seri ras si lit i gerbang timur. Kalak si atena masuk ku gerbang e arus lewatina pitu anak tangga janah terasna lit i lebe-lebena.
23 I halamen si arah bas, lit sada gerbang i lebe-lebe gerbang utara, janah sada gerbang i lebe-lebe gerbang timur. Ukurna jarak sada gerbang ku gerbang si lit i lebe-lebena, jarakna lit 100 hasta.
24 Kenca si e, babana aku ku sebelah selatan. Kuidah lit sada gerbang i sebelah selatan e.+ Ukurna tiang-tiang samping ras terasna, ukurenna seri ras gerbang-gerbang si deban.
25 Bas kanan ras kiri gerbang e bage pe terasna, lit jendela-jendela si bagi jendela si deban. Gedang gerbang e 50 hasta janah belangna 25 hasta.
26 Lit pitu anak tangga bas dalan ku gerbang e+ janah terasna lit i lebe-lebena. Bas tiang-tiang samping terasna, lit gambar-gambar batang kurma, i sebelah kanan ras i sebelah kiri.
27 Bas halamen si arah bas, lit gerbang si pengalana ku selatan. Ukurna jarak arah gerbang e ku gerbang si lit i sebelah selatanna, jarakna 100 hasta.
28 Kenca si e, babana aku ku halamen si arah bas arah gerbang selatan. Ukurna gerbang selatan e, janah ukurenna bagi gerbang si deban.
29 Ukuren ruang penjagana, tiang-tiang sampingna, bage pe terasna seri ras si debanna. Bas kanan ras kiri gerbang e bage pe terasna, lit jendela-jendelana. Gedang gerbang e 50 hasta janah belangna 25 hasta.+
30 Kerina gerbang si lit bas halamen si arah bas, lit terasna, gedangna 25 hasta janah belangna 5 hasta.
31 Teras e pengalana ku halamen si arah darat, janah lit gambar-gambar batang kurma bas tiang-tiang sampingna.+ Bas dalan masuk ku gerbang e, lit waluh anak tangga si man lewaten.+
32 Kenca si e, babana aku ku halamen si arah bas arah timur nari. Ukurna gerbangna janah ukurenna bagi gerbang si debanna.
33 Ukuren ruang penjagana, tiang-tiang sampingna, bage pe terasna seri ras si debanna. Arah kanan ras kiri gerbang e bage pe terasna, lit jendela-jendelana. Gedang gerbang e 50 hasta janah belangna 25 hasta.
34 Teras e pengalana ku halamen si arah darat, janah lit gambar-gambar batang kurma bas tiang-tiang sampingna. Bas dalan masuk ku gerbang e lit waluh anak tangga si man lewaten.
35 Kenca si e babana aku ku gerbang utara.+ Ukurna gerbang e janah ukurenna bagi gerbang si deban.
36 Ruang penjagana, tiang-tiang sampingna, bage pe terasna, seri ukurenna ras si debanna. Arah kanan ras kiri gerbang e, lit jendela-jendelana. Gedang gerbang e 50 hasta janah belangna 25 hasta.
37 Teras e pengalana ku halamen si arah darat, janah lit gambar-gambar batang kurma bas tiang-tiang sampingna. Bas dalan masuk ku gerbang e, lit waluh anak tangga si man lewaten.
38 I deher tiang-tiang samping gerbang e, lit ruangen ingan man bage pe pintu masukna. I je me persembahen tutungen iburihi.+
39 Bas bagin kanan ras kiri teras gerbang e, lit dua meja guna jadi ingan nggeleh persembahen tutungen,+ persembahen dosa,+ ras persembahen kesalahen.+
40 Bas dalan nangkeng ku gerbang utara eme i teras gerbang, lit dua meja i sebelah kiri i lebe-lebe pintu masukna janah i sebelah kanan pe bage. Lit ka dua meja i sebelah kiri kenca lewat pintu masuk e janah sebelah kanan pe bage.
41 Lit empat meja i darat gerbang janah empat meja i teras gerbang. Kerinana lit waluh meja guna ingan nggeleh binatang persembahen tutungen.
42 Empat meja si ipake guna persembahen tutungen e iban arah batu-batu si enggo ipotong. Meja-meja e gedangna sada setengah hasta, belangna sada setengah hasta, janah ganjangna sada hasta. I datas meja e, lit alat-alat si ipake guna nggeleh persembahen tutungen ras korban.
43 Daging persembahen itama i datas meja-meja e. I sekeliling dingding si arah bas, lit rak-rak si belangna sada tapak-tapak tan.
44 I darat gerbang si arah bas, lit ruangen-ruangen ingan man guna kalak si rende.+ Ruangen-ruangen e lit bas halamen si arah bas janah pengalana ku selatan, ruangen e lit i deher gerbang utara. Lit ka ruangen ingan man si pengalana ku utara, ruangen e lit i deher gerbang timur.
45 Nina man bangku, “Ruangen ingan man si pengalana ku selatan e, guna imam-imam si ertanggung jawap man pendahin bas rumah pertoton.+
46 Ruangen ingan man si pengalana ku utara e, guna imam-imam si ertanggung jawap man pendahin bas ingan nutung* persembahen.+ Kalak e keturunen Sadok+ eme kalak Lewi si enggo itugasken ngelayani i lebe-lebe Jahwe.”+
47 Kenca si e ukurna halamen si arah bas. Gedangna 100 hasta janah belangna 100 hasta, bentukna persegi. I lebe-lebe rumah pertoton, lit ingan nutung persembahen.
48 Kenca si e babana aku ku teras rumah pertoton,+ jenari ukurna tiang-tiang samping teras e, gedangna lima hasta ras belangna telu hasta. Sada tiang bas sebelah kiri janah sada nari bas sebelah kanan.
49 Teras e gedangna 20 hasta janah belangna 11* hasta. Kalak si atena masuk ku je arus lewatina tangga. Lit tiang-tiang i deher tiang samping, sada sebelah kanan, sada sebelah kiri.+
Cataten i teruh
^ Ntah “tan.”
^ Eme kerna kai pe si cidahken Dibata ku bas pikiren sekalak jelma.
^ As. “rumah.” Kata e iterjemahken bagenda bas pasal 40-48 adi maksudna rumah pertoton ntah pe daerah rumah pertoton.
^ Mungkin maksudna dingding ruang penjaga si arah datas.
^ Ntah banci saja “12.”
