Esekiel 41:1-26
41 Kenca si e, babana aku ku ruangen si arah darat ingan si badia* e. Ukurna tiang-tiang sampingna, i sebelah kiri ras sebelah kanan. Tiap tiang gedangna enem hasta.*
2 Tiap tiang belangna lima hasta. Dalan masukna belangna sepuluh hasta. Kenca si e ukurna ruangen e, gedangna 40 hasta janah belangna 20 hasta.
3 Dung e masuk ia* janah ukurna tiang samping si lit bas dalan masukna, belangna dua hasta janah gedangna pitu hasta. Belang dalan masukna enem hasta.
4 Jenari ukurna ruangen si pengalana ku ruangen si arah darat ingan si badia, gedangna 20 hasta ras belangna 20 hasta.+ Kenca si e nina man bangku, “Enda me Ingan Sibadiana.”+
5 Jenari ukurna dingding rumah pertoton, janah lit enem hasta kapalna. I sekeliling rumah pertoton e, lit ruangen-ruangen si belangna empat hasta.+
6 Ruangen-ruangen e tingkat telu, janah bas tiap tingkat lit 30 ruangen. Dingding rumah pertoton e irancang gelah lante ruangen-ruangen e banci leket bas dingding, janah dingding e la perlu ilubangi.+
7 Ruangen-ruangen e reh datasna reh belangna.+ Arah kanan ras kiri rumah pertoton e, lit tangga si melingkar mulai arah lante sada nari seh ku lante dua janah terus ku lante telu ruangen e.
8 Kuidah rumah pertoton e lit i datas panggung. Panggung e belangen asangken rumah pertoton e. Pondasi ruangen-ruangen e mulai taneh nari seh ku sudut si arah datas, ganjangna sada tongkat eme enem hasta.
9 Dingding si arah darat ruangen e kapalna lima hasta. I sekeliling dingding si arah darat ruangen-ruangen e, lit bagin panggung rumah pertoton si ipediat kosong.*
10 I antara rumah pertoton ras ruangen-ruangen ingan man,+ lit daerah si kosong si belangna 20 hasta. Daerah e lit bas sebelah kanan ras kiri rumah pertoton.
11 Bagin panggung rumah pertoton si ipediat kosong ndai belangna lima hasta. Arah bagin si kosong e lit pintu masuk ku ruangen-ruangen ndai, sada sebelah utara janah sada nari sebelah selatan.
12 I sebelah barat, lit bangunen si pengalana ku daerah si kosong, belangna 70 hasta janah gedangna 90 hasta. Kerina dingding bangunen e kapalna lima hasta.
13 Ukurna rumah pertoton e janah gedangna 100 hasta. Daerah si kosong ras bangunen e* bage pe dingdingna lit 100 hasta gedangna.
14 I lebe-lebe rumah pertoton si pengalana ku timur ras daerah si kosong belangna 100 hasta.
15 Ukurna ka gedang bangunen si lit i pudi rumah pertoton eme bangunen si pengalana ku daerah si kosong ndai, termasuk lorong-lorong i sebelah kiri ras kananna, gedangna 100 hasta.
Ukurna ka ruangen si arah darat ras si arah bas ingan si badia e,+ teras-teras si pengalana ku halamen,
16 daerah ingan masukna, jendela-jendela si kusenna reh sempitna arah bas nari ku darat,+ bage pe lorong-lorong bas telu ingan e ndai. Dingding bas dalan masukna ilapisi kayu,+ mulai teruh nari seh ku jendelana. Janah jendelana ilapisi kayu.
17 Bagin si arah datas pintu masuk, bagin si arah bas rumah pertoton, bagin si arah darat rumah pertoton, bage pe kerina dingding si lit i sekelilingna, kerina ukurna.
18 I je lit ukiren kerubim-kerubim+ ras batang kurma.+ I antara dua kerubim lit sada batang kurma, janah tiap kerubim lit dua ayona.
19 Ayo manusia pengalana ku batang kurma si lit i sebelahna, janah ayo singa pengalana ku batang kurma si lit i sebelahna.+ Ukiren-ukiren e ndai lit i sekeliling rumah pertoton e.
20 Ukiren kerubim-kerubim ras batang kurma e lit i dingding ingan si badia, mulai arah teruh nari seh ku bagin si arah datas pintu masuk.
21 Tiang-tiang pintu* ingan si badia e bentukna persegi.+ I lebe-lebe ingan si badia* e, lit si bagi
22 ingan nutung* persembahen si iban arah kayu nari,+ ganjangna telu hasta janah gedangna dua hasta. Bas sudutna lit tiang-tiang, janah bagin arah teruhna ras arah sampingna iban arah kayu nari. Kenca si e nina man bangku, “Enda me meja si lit i lebe-lebe Jahwe.”+
23 Bagin si arah darat Ingan si Badia ras Ingan Sibadiana, masing-masing lit dua pintuna.+
24 Tiap pintu lit dua daun pintuna, janah banci iayunken.
25 Bas pintu-pintu ingan si badia e, lit ukiren kerubim-kerubim ras batang kurma si bagi bas dingding.+ I darat rumah pertoton i bagin arah datas teras, eme i sekeliling pinggir atap, lit bingkai si iban arah kayu nari.
26 I je, lit ka jendela si kusenna reh sempitna arah bas nari ku darat,+ lit ka ukiren batang kurma i sebelah kanan ras kiri teras, bas ruangen-ruangen bas rumah pertoton, bage pe bas bingkai si lit i sekeliling pinggir atap si iban arah kayu ndai.
Cataten i teruh
^ As. “rumah pertoton.” Bas pasal 41 ras 42, enda maksudna ruangen i darat ingan si badia ntah pe kerina daerah ingan si badia (rumah pertoton, termasuk Ingan si Badia ras Ingan Sibadiana).
^ Maksudna, masuk ia ku ruangen bas ingan si badia, ntah pe Ingan Sibadiana.
^ Mungkin maksudna dalan si sempit i sekeliling rumah pertoton.
^ Maksudna, bangunen si lit i sebelah barat rumah pertoton.
^ Mungkin maksudna pintu masuk ku Ingan si Badia.
^ Mungkin maksudna Ingan Sibadiana.
