Esekiel 42:1-20
42 Kenca si e babana aku ku halamen si arah darat i utara.+ Jenari babana aku ku komplek ruangen ingan man si lit i sebelah daerah si kosong,+ i utara bangunen si lit i sebelahna.+
2 Bagin utara komplek ruangen ingan man si lit pintu masukna e, gedangna 100 hasta* ras belangna 50 hasta.
3 Komplek e lit i antara halamen si arah bas si belangna 20 hasta+ ras lante halamen si arah darat. Bas komplek e lit dua bangunen tingkat telu. Tiap tingkat bangunen e lit terasna janah teras dua bangunen e sihadap-hadapen.
4 Antara dua bangunen e lit dalan+ si belangna 10 hasta ras gedangna 100 hasta.* Pintu masukna lit i utara.
5 Ruangen-ruangen ingan man bas tingkat datas kitiken asangken ruangen-ruangen ingan man bas tingkat tengah ras si arah teruh, perban ipake deba jadi teras.
6 Amin pe bangunen e tingkat telu, tapi la lit tiang-tiangna bagi tiang-tiang bas halamen. Enda me sebapna maka lante bas tingkat datas kitiken asangken lante bas tingkat si i tengah ras lante si arah teruh.
7 I sebelah ruangen-ruangen ingan man e, lit tembok batu si gedangna 50 hasta. Dingding e lit i deher halamen si arah darat janah pengalana ku ruangen-ruangen ingan man si debanna.
8 Ruangen-ruangen ingan man si pengalana ku halamen si arah darat gedangna 50 hasta, tapi ruangen-ruangen ingan man si pengalana ku ingan si badia gedangna 100 hasta.
9 Lit dalan masuk ruangen-ruangen ingan man e i sebelah timur. Banci kalak masuk ku je arah halamen si arah darat.
10 I sebelah selatan, lit ka ruangen-ruangen ingan man. I sebelah timur ruangen-ruangen ingan man e lit tembok batu i deher halamen. Ruangen-ruangen ingan man e lit i deher daerah si kosong ras i deher bangunen e.*+
11 Lit ka dalan i lebe ruangen-ruangen ingan man e bagi si lit i sebelah utara.+ Ruangen-ruangen ingan man i sebelah selatan ras utara seri gedangna ras belangna. Pintu-pintu ingan ndaratna ras bentukna pe seri. Pintu-pintu masuk ruangen-ruangen ingan man i sebelah utara
12 seri ras pintu-pintu masuk ruangen-ruangen ingan man si lit i selatan. Lit pintu masuk i ujung dalanna e, i sebelah tembok batu si pengalana ku timur. Banci kalak lewat arah je.+
13 Kenca si e nina man bangku, “Ruangen-ruangen ingan man i sebelah utara ras i sebelah selatan si ndeher ras daerah si kosong,+ eme ruangen ingan man si badia. I je me persembahen si badiana ipan imam-imam si ngadap ku Jahwe. I je tamaken kalak e persembahen si badiana,+ persembahen pangan,* persembahen dosa, ras persembahen kesalahen, perban ingan e badia.+
14 Sanga masuk imam-imam ku ingan si badia, kalak e la banci ndarat ku halamen si arah darat adi la bukana lebe baju si pakena sanga ertugas,+ perban baju e badia. Arus ganti kalak e lebe bajuna sope lenga lawes ku ingan si banci imasuki kalak.”
15 Kenca enggo dung ukurna daerah rumah pertoton si arah bas, babana aku ndarat arah gerbang si pengalana ku timur,+ janah ukurna kerina daerah e.
16 Ukurna bagin i sebelah timur alu tongkat pengukur.* Kenca ukurna alu tongkat e, gedangna lit 500 tongkat, arah ujung ku ujung.
17 Ukurna bagin i sebelah utara, janah kenca ukurna alu tongkat pengukur, gedangna lit 500 tongkat.
18 Ukurna bagin i sebelah selatan, janah kenca ukurna alu tongkat pengukur, gedangna lit 500 tongkat.
19 Lawes ka ia ku sebelah barat. Ukurna alu tongkat pengukur, gedangna lit 500 tongkat.
20 Ukurna empat bagin e. I sekeliling empat bagin e, lit tembok+ si gedangna 500 tongkat ras belangna 500 tongkat.+ Tembok e misahken ingan si badia ras ingan enterem jelma.+
Cataten i teruh
^ Maksudna, bangunen si ikataken bas ayat 1.
