Esekiel 43:1-27
43 Kenca si e, babana aku ku gerbang si pengalana ku timur.+
2 I je, kuidah kemulian Dibata Israel reh arah timur nari,+ janah soraNa bagi sora lau si deras.+ KemulianNa erban doni jadi terang.+
3 Kai si kuidah e mirip ras pengenehenen* si kudat sanga reh aku* guna ngancurken kota e.* Enda mirip ras kai si kuidah i tepi Lau Kebar.+ Jenari sujud aku.
4 Kenca si e, kemulian Jahwe masuk ku rumah pertoton arah gerbang si pengalana ku timur.+
5 Jenari iangkat* aku janah ibaba ku halamen si arah bas. Kuidah rumah pertoton dem alu kemulian Jahwe.+
6 Kubegi lit dilaki ngerana arah rumah pertoton e nari. Kenca si e dahina aku janah tedis ia i sampingku.+
7 Nina man bangku,
“O anak manusia, i jenda me tahtaKu+ janah i jenda me inganKu ndedehken nahe.+ I jenda me Aku tading seh rasa lalap i tengah-tengah kalak Israel.+ Lanai pagi iban kalak Israel ras raja-rajana gelarKu si badia+ jadi najis perban perbahanen kalak e si la setia* bage pe perban isembahna berhalana bagi raja.*
8 Ban kalak e pintu masuk bas ingan ersembah kalak e i samping pintu masuk rumah pertotonKu. Tiang pintu bas ingan ersembah kalak e tamana i samping tiang pintu rumah pertotonKu. Tembok ngenca si misahken Aku ras kalak e.+ Ban kalak e gelarKu si badia jadi najis alu ngelakoken kai si erban ciga ate. Emaka merawa Aku janah Kukernepken kalak e.+
9 Gundari arus pengadi kalak e perbahanenna si la setia* janah arus ambekkenna berhalana si sembahna bagi raja.* Alu bage, tading pagi Aku i tengah-tengah kalak e seh rasa lalap.+
10 “O anak manusia, jelaskenlah man kalak Israel uga kin rumah pertoton e+ gelah mela akapna perban kesalahenna.+ Arus pelajari kalak e rancangen rumah pertoton e.
11 Adi mela akap kalak e perban kerina si enggo lakokenna, gambarlah rancangen rumah pertoton e i lebe-lebe kalak e. Tuduhken susunenna, dalan ndaratna, dalan masukna,+ kerina rancangenna, bage pe undang-undangna. Tulislah kerina e i lebe-lebe kalak e gelah banci perdiateken kalak e kerina bagin-bagin rancangen rumah pertoton e janah gelah banci patuhina peraturen-peraturenna.+
12 Enda ndai me undang-undang kerna rumah pertoton. Kerina daerah i sekeliling puncak gunung e seh kel badiana.+ Payo, enda kap undang-undang kerna rumah pertoton.
13 “Enda me ukuren ingan nutung* persembahen bas ukuren hasta+ (tiap sada hasta gedangna tambah sada tapak-tapak tan).* Ganjang dasarna sada hasta. I sekeliling dasarna e belangen sada hasta asangken tingkat si i datasna. Janah i sekeliling pinggir dasarna e, lit parik si belangna sada jengkal.* Bage me dasar ingan nutung persembahen e.
14 Arah dasar nari seh ku tingkat si peduaken, ganjangna dua hasta. Sekeliling tingkat si peduaken e belangen sada hasta asangken tingkat si i datasna. Tingkat si peteluken ganjangna empat hasta. Sekeliling tingkat si peteluken e pe belangen sada hasta asangken tingkat si i datasna.
15 Tingkat si arah datasna kel bas ingan nutung persembahen e, eme ingan mpegara api, ganjangna empat hasta. Bas empat sudutna lit tanduk.+
16 Ingan mpegara api e bentukna persegi, gedangna 12 hasta janah belangna 12 hasta.+
17 Tingkat si peteluken gedangna 14 hasta janah belangna 14 hasta. Sekelilingna belangen sada hasta asangken tingkat si i datasna. I sekeliling pinggirna lit parik si belangna setengah hasta.
“Tangga ingan nutung persembahen e pengalana ku timur.”
18 Nina ka man bangku, “O anak manusia, bagenda nina Jahwe Tuhan Si Meganjangna, ‘Enda petunjuk kerna ingan nutung persembahen si arus iikuti sanga ingan nutung persembahen e iban. Alu bage persembahen tutungen banci ipersembahken i datasna janah dareh banci ipercikken ku je.’+
19 “‘Arus berekenndu lembu jantan si nguda denga jadi persembahen dosa+ man imam-imam Lewi keturunen Sadok,+ si ngelayani Aku i lebe-lebeKu,’ nina Jahwe Tuhan si Meganjangna.
20 ‘Buat sitik dareh lembu jantan e janah olesken ku empat tanduk ingan nutung persembahen e bage pe ku empatna sudut tingkat si peteluken ras kerina pinggirenna guna mpebadia ingan nutung persembahen e.*+
21 Buat lembu jantan si nguda denga e si jadi persembahen dosa, guna itutung bas ingan si enggo itentuken i rumah pertoton eme i darat ingan si badia.+
22 Bas wari si peduaken, persembahken kambing jantan si sehat jadi persembahen dosa. Janah ingan nutung persembahen e arus ipebadiaken imam-imam arah dosa, bagi kalak e mpebadiaken ingan nutung persembahen e arah dosa alu lembu jantan si nguda denga.’
23 “‘Kenca dung pebadiandu ingan nutung persembahen e arah dosa, persembahkenlah lembu jantan si nguda denga ras sehat bage pe biri-biri jantan si sehat.
24 Babalah e ku lebe-lebe Jahwe. Janah arus amburken imam-imam sira ku datasna+ janah persembahkenna e jadi persembahen tutungen man Jahwe.
25 Pitu wari dekahna, arus persembahkenndu tiap wari sada kambing jantan jadi persembahen dosa,+ bage pe sada lembu jantan si nguda denga ras sada biri-biri jantan. Binatang si persembahkenndu e, la banci lit cacatna.*
26 Pitu wari dekahna, arus ban kalak e acara pengampunen dosa man ingan nutung persembahen e janah arus ipebadia kalak e. Alu bage, ingan nutung persembahen e banci igunaken.
27 Kenca dung wari-wari e, mulai wari si pewaluhken+ seh seterusna, imam-imam arus mpersembahken persembahen tutungen kena* bage pe korban persadan. Pasti meriah ukurKu ngidah kena,’+ nina Jahwe Tuhan Si Meganjangna.”
Cataten i teruh
^ Eme kerna kai pe si cidahken Dibata ku bas pikiren sekalak jelma.
^ Ntah banci saja “ia.”
^ Maksudna, ernubuat kerna kehancurenna.
^ Bas bahasa aslina, si ngangkat Esekiel banci maksudna kesah si badia Dibata ntah pe sada malekat.
^ Ntah “perbahanen kalak e bas ngelakoken pelacuren rohani.”
^ As. “bage pe alu mayat raja-raja kalak e si enggo mate.”
^ As. “ambekkenna mayat raja-rajana.”
^ Ntah “pengadi kalak e perbahanenna bas ngelakoken pelacuren rohani.”
^ Kira-kira 22,2 sentimeter.
^ As. “ingan nutung persembahen e arah dosa janah ngelakoken acara pengampunen dosa man ingan e.” Nen Im 8:15.
^ Ntah “arus sempurna.”
^ Maksudna, arah umat e.
