Esekiel 45:1-25
45 “‘Sanga bagi-bagiken kena taneh warisen,+ arus sumbangken kena deba taneh e man Jahwe jadi bagin si badia.+ Taneh e arus 25.000 hasta* gedangna janah 10.000 hasta belangna.+ Kerina taneh e jadi bagin si badia.
2 Bas ingan e, arus isikapken taneh si bentukna segi empat si ikhususken guna ingan si badia. Ukurenna 500 hasta kali 500 hasta.+ I sekelilingna arus lit mbalmbal si belangna 50 hasta.+
3 Kenca si e arus ukurndu taneh e, gedangna arus 25.000 hasta janah belangna 10.000 hasta. I je pagi rumah pertoton eme ingan si seh kel badiana.
4 Taneh e jadi bagin si badia man imam-imam+ si ngelayani bas ingan si badia, eme si ertugas i lebe-lebe Jahwe.+ Taneh e jadi ingan rumah-rumah kalak e bage pe ingan si badia man rumah pertoton.
5 “‘Man kalak Lewi si ertugas bas rumah pertoton, ibereken taneh si gedangna 25.000 hasta janah belangna 10.000 hasta.+ Bereken ka man kalak e 20 ruangen ingan man+ jadi jang kalak e.
6 “‘Arus ka bereken kena taneh si gedangna 25.000 hasta (bali bagi gedang taneh si badia si isumbangken) jadi daerah kota, janah belangna 5.000 hasta.+ Taneh e jadi jang kerina kalak Israel.
7 “‘Taneh sebelah barat ras sebelah timur arah taneh si badia si isumbangken ras daerah kota, ibereken man peminpin. Taneh e lit i sebelah taneh si badia si isumbangken ras daerah kota. Taneh e imulai arah perbatasen sebelah barat seh ku perbatasen sebelah timur, janah taneh e arus seri gedangna ras taneh salah sada suku.+
8 Taneh e jadi jangna bas Israel pagi. UmatKu lanai pagi itindas peminpin-peminpin,+ janah bagi-bagiken kalak e pagi taneh man kalak Israel menurut suku kalak e.’+
9 “Bagenda nina Jahwe Tuhan Si Meganjangna, ‘Enggo bias peminpin-peminpin Israel!’
“‘Pengadilah kekerasen ras penindasen kena, lakokenlah kai si adil ras benar.+ Ula nai rampas kena erta-erta umatKu,’+ nina Jahwe Tuhan Si Meganjangna.
10 ‘Arus gunaken kena timbangen si pas, sukat-sukat epa* si pas, bage pe sukat-sukat bat* si pas.+
11 Arus lit sukat-sukat epa ras bat si itetapken. Sada bat arus seri ras sepersepuluh homer,* janah sada epa seri ras sepersepuluh homer. Homer jadi patoken i bas nukati.
12 Sada sekel*+ seri ras 20 gera.* Sada mina* seri ras 20 sekel tambah 25 sekel tambah 15 sekel.’
13 “‘Si arus sumbangkenndu eme 3 kilo* tiap 160 kilo* gandum ras 2 kilo* tiap 130 kilo* barli.
14 Sumbangen minak arus itentuken alu sukaten bat. Sada bat seri ras sepersepuluh kor.* Sepuluh bat eme sada homer, perban sepuluh bat seri ras sada homer.
15 Arah asuh-asuhen kalak Israel, arus ipersembahken sada arah tiap 200 biri-biri. Kerina e jadi persembahen pangan,*+ persembahen tutungen,+ ras korban persadan+ guna ngampuni dosa kalak e,’+ nina Jahwe Tuhan Si Meganjangna.
16 “‘Kerina sumbangen e+ ndai arus bereken penduduk negri e man peminpin Israel.
17 Janah peminpin e si ertanggung jawap ngurus persembahen tutungen,+ persembahen pangan,+ ras persembahen inemen sedekah perayan-perayan,+ perayan bulan baru, Sabat,+ ras kerina perayan si itetapken man kalak Israel.+ Peminpin e si nikapken persembahen dosa, persembahen pangan, persembahen tutungen, ras korban persadan guna mindo pengampunen dosa guna kepentingen kalak Israel.’
18 “Bagenda nina Jahwe Tuhan Si Meganjangna, ‘Bas bulan si pertama, wari si pertama bas bulan e, arus buatndu lembu jantan si nguda denga ras sehat, janah arus pebadiandu ingan si badia e.*+
19 Arus buat imam sitik dareh persembahen dosa e janah oleskenna ku tiang pintu rumah pertoton,+ ku empatna sudut si lit i sekeliling tingkat telu ingan nutung* persembahen, ras ku tiang pintu gerbang halamen si arah bas.
20 Arus bage banndu bas wari si pepituken bas bulan e guna kalak si la sengaja ngelakoken dosa ntah pe si la tehna ia enggo erdosa.+ Arus pebadiandu rumah pertoton e.*+
21 “‘Bas bulan si pertama, wari si pe-14-ken bas bulan e, arus ban kena Perayan Paskah.+ Pitu wari dekahna arus ipan kena roti si la itama ragi.+
22 Bas wari e, arus sikapken peminpin e lembu jantan si nguda denga jadi persembahen dosa guna man bana ras man kerina penduduk negri e.+
23 Tiap wari sedekah pitu wari bas perayan e, arus sikapkenna pitu lembu jantan si nguda denga janah sehat ras pitu biri-biri jantan si sehat+ jadi persembahen tutungen man Jahwe, bage pe sada kambing jantan tiap wari jadi persembahen dosa.
24 Selain si e, arus ka sikapkenna 11 kilo* tepung man tiap lembu jantan si nguda denga ras 11 kilo tepung man tiap biri-biri jantan guna jadi pesembahen pangan. Arus ka sikapkenna telu setengah liter* minak man tiap 11 kilo tepung e.
25 “‘Bas bulan si pepituken, wari si pe-15-ken bas bulan e, sedekah pitu wari perayan e,+ arus sikapkenna persembahen dosa, persembahen tutungen, persembahen biji-bijin,* ras minak bagi si ndai.’”
Cataten i teruh
^ Ntah “mane.”
^ As. “1 homer.”
^ As. “1/6 epa.”
^ As. “1 homer.”
^ As. “ingan si badia e arah dosa.”
^ As. “rumah pertoton e arah dosa.”
^ As. “1 hin.”
