Esekiel 46:1-24
46 “Bagenda nina Jahwe Tuhan Si Meganjangna, ‘Gerbang bas halamen si arah bas si pengalana ku timur,+ arus tetap itutup+ sedekah enem wari erdahin.+ Tapi gerbang e arus ibuka sanga wari Sabat bage pe sanga perayan bulan baru.
2 Peminpin arus masuk arah darat nari ngelewati teras gerbang.+ Kenca si e tedis ia i deher tiang pintu gerbang. Imam-imam pagi si mpersembahken persembahen tutungen ras korban persadan, janah sujud kalak e i deher pintu masuk gerbang, dung e ndarat kalak e. Gerbang e la banci itutup seh ngasa ben wari.
3 Penduduk negri e pe sujud i lebe-lebe Jahwe i deher pintu masuk gerbang e sanga wari Sabat bage pe sanga perayan bulan baru.+
4 “‘Bas wari Sabat, arus baba peminpin e enem anak biri-biri jantan si sehat ras sada biri-biri jantan si sehat guna jadi korban tutungen man Jahwe.+
5 Man biri-biri jantan arus berekenna 11 kilo* tepung guna jadi persembahen pangan,* janah man anak biri-biri jantan e, banci berekenna kai pe si ngasup ia merekenca, bage pe telu setengah liter* minak radu ras tiap 11 kilo tepung e.+
6 Persembahen si arus ibereken bas perayan bulan baru eme sada lembu jantan si sehat si nguda denga, enem anak biri-biri jantan, ras sada biri-biri jantan. Kerina binatang e arus sehat.+
7 Man lembu jantan si nguda denga e arus berekenna 11 kilo* tepung guna jadi persembahen pangan. Man biri-biri jantan e, 11 kilo tepung. Man anak biri-biri jantan e, banci berekenna kai pe si ngasup ia merekenca. Janah arus persembahkenna telu setengah liter* minak radu ras tiap 11 kilo tepung e.
8 “‘Adi masuk peminpin e, arus ia masuk arah teras gerbang janah ndarat pe arah je ka.+
9 Sanga reh penduduk negri e guna nembah Jahwe bas wari perayan,+ arus kalak e masuk arah pintu gerbang utara+ janah ndarat arah pintu gerbang selatan.+ Ise si masuk arah pintu gerbang selatan, arus ia ndarat arah pintu gerbang utara. Ise pe la banci masuk ras ndarat arah pintu si seri, sebap tiap kalak arus ndarat arah pintu si lit i sebrangna.
10 Adi masuk kalak e, peminpin si lit i tengah-tengah kalak e pe ikut masuk. Adi ndarat kalak e, peminpin e pe arus ndarat.
11 Sanga perayan ras sanga musim perayan, persembahen pangan arus ibereken. Man lembu jantan si nguda denga e 11 kilo* tepung. Man biri-biri jantan e, 11 kilo tepung. Man anak biri-biri jantan e, banci berekenna kai pe si ngasup ia merekenca. Janah arus persembahkenna telu setengah liter* minak radu ras tiap 11 kilo tepung e.+
12 “‘Adi peminpin nikapken persembahen sukarela man Jahwe eme persembahen tutungen+ ntah pe korban persadan, gerbang si pengalana ku timur arus ibuka man bana, janah arus sikapkenna persembahen tutungen bage pe korban persadan bagi si lakokenna sanga bas wari Sabat.+ Kenca ia ndarat, gerbang e arus itutup.+
13 “‘Tiap wari, arus sikapkenndu sada anak biri-biri jantan si sehat si umurna setahun ntah kurang jadi persembahen tutungen man Jahwe.+ Arus lakokenndu bage tiap pagi-pagi.
14 Selain si e, tiap pagi-pagi arus sikapkenndu dua kilo* tepung jadi persembahen pangan, bage pe lebih sada liter* minak guna ipercikken ku tepung halus e. Enda ndai me persembahen pangan si ratur man Jahwe. Peraturen enda arus terus ipatuhi.
15 Tiap pagi-pagi arus sikapken kalak e sada anak biri-biri jantan, persembahen pangan, ras minak jadi persembahen tutungen si ratur.’
16 “Bagenda nina Jahwe Tuhan Si Meganjangna, ‘Adi bereken peminpin hadiah man tiap anakna si dilaki jadi warisen, hadiah e jadi jang anakna e. Payo, hadiah e jadi warisen kalak e.
17 Tapi adi berekenna hadiah man pelayanna arah warisenna, hadiah e jadi jang pelayanna e seh ngasa tahun pembebasen.+ Kenca si e arus ulihkenna hadiah e man peminpin e. Hadiah si bereken peminpin e man anakna si dilaki ngenca si banci tetap jadi jang anakna e seh rasa lalap.
18 Peminpin la banci ngerampas warisen rakyat alu mpelawes kalak e arah tanehna. Warisen si bereken peminpin e man anak-anakna si dilaki arus arah tanehna sendiri. Alu bage la lit bangsaKu si ipelawes arah tanehna.’”
19 Kenca si e, babana aku masuk ngelewati dalan masuk+ si lit i samping gerbang ku ruangen-ruangen* si badia ingan imam-imam, si pengalana ku utara.+ I sebelah barat, lit kuidah sada ingan i pudi ruangen-ruangen e.
20 Nina man bangku, “Enda kap ingan imam-imam mbelgang persembahen kesalahen ras persembahen dosa, bage pe ingan guna manggang persembahen pangan,+ alu bage la perlu baba kalak e kai pe ku halamen si arah darat si erban kalak si deban jadi badia perban kai si baba kalak e.”+
21 Babana aku ku halamen si arah darat janah taruhkenna aku ku empat sudut halamen e. Janah lit kuidah halamen bas tiap sudut halamen si arah darat e.
22 Bas empatna sudut halamen e lit halamen-halamen si kitik, gedangna 40 hasta* janah belangna 30 hasta. Empatna halamen e seri ukurenna.
23 I sekeliling empat halamen e lit tembok si gendek, janah bas baginna si arah teruh lit ingan mbelgang persembahen.
24 Kenca si e nina man bangku, “Enda me ingan petugas rumah pertoton mbelgang korban si bereken rakyat.”+
Cataten i teruh
^ As. “1 hin.”
^ As. “1 hin.”
^ As. “1 hin.”
^ As. “1/3 hin.”
^ Ntah “ruangen-ruangen ingan man.”
