Esekiel 47:1-23
47 Kenca si e, babana ka aku ku pintu masuk rumah pertoton.+ Kuidah lit lau si maler arah teruh pintu masuk rumah pertoton ku arah timur,+ perban bagin si arah lebe rumah pertoton e pengalana ku timur. Lau e maler arah teruh rumah pertoton arah sebelah kananna, i sebelah selatan ingan nutung* persembahen.
2 Kenca si e, babana aku ndarat ngelewati gerbang utara+ janah babana aku ku gerbang si arah darat si pengalana ku timur.+ Jenari lit kuidah sitik lau si maler arah kanan pintu gerbang e.
3 Dung e lawes dilaki e ku sebelah timur. Bas tanna lit tali pengukur.+ Ukurna lau e janah gedangna 1.000 hasta.* Dung e suruhna aku ngelewati lau e. Lau e bagesna asa mata nahe.
4 Ukurna ka 1.000 hasta nari janah suruhna aku ngelewati lau e. Lau e bagesna asa tiwen.
Ukurna ka 1.000 hasta nari janah suruhna aku ngelewati lau e. Lau e bagesna asa awak.
5 Ukurna ka 1.000 hasta nari janah launa seh kel derasna emaka la banci kusebrangi, perban launa seh kel bagesna, arus erlangi ngelewatisa. Seh kel derasna lau e, emaka la banci erdalan nyebrangisa.
6 Sungkunna aku, nina, “O anak manusia, idahndu nge enda?”
Kenca si e, suruhna aku mulih arah tengah ku tepi lau si deras e.
7 Kenca mulih aku ku tepi lau e, kuidah bas duana tepi lau e melala kel batang kayu.+
8 Kenca si e nina man bangku, “Lau e maler ku daerah timur janah terus ku Araba*+ jenari maler ku laut. Sanga maler lau e ku laut,+ jadi segar lau bas laut e.
9 Ku japa pe lau e maler, melala si banci nggeluh i je. Perban lau e maler ku je, melala kel ikan i je. Lau bas laut jadi segar, janah ku ja pe lau e maler, lit kegeluhen i je.
10 “Tedis pagi nelayan-nelayan i tepi laut e mulai En-gedi+ seh ku En-Eglaim, i je pagi kalak e ngkerahken jaringna. Erbage-bage ikan pagi lit i je janah seh kel buena, bagi ikan bas Laut Tengah* buena.+
11 “Bas laut e lit paya-paya* ras kubang, janah launa la iban jadi segar. Daerah e ipediat jadi sira.+
12 “Bas duana tepi lau e, turah erbage-bage batang kayu si erbuah. Bulungna la melus, janah la pernah la erbuah. Lau arah ingan si badia maler ku je, emaka tiap bulan batang kayu e erbuah.+ Buahna jadi pangan janah bulungna jadi tambar.”+
13 Bagenda nina Jahwe Tuhan Si Meganjangna, “Enda daerah si ibereken jadi taneh warisen man 12 suku Israel, janah Jusup ndatken dua bagin.+
14 Warisi kena pagi taneh e, janah seri pagi bagin si aloken kena. Enggo ersumpah Aku maka Kubereken taneh e man nini bulang kena,+ gundari Kubereken e jadi warisen man kena.
15 “Enda batas-batas taneh i sebelah utara: Taneh e imulai arah Laut Tengah nari ngelewati dalan ku Hetlon+ janah terus ku Sedat,+
16 Hamat,+ Berota,+ ras Sibraim, si lit i antara daerah Damaskus ras daerah Hamat, terus ku Haser Tikon, si lit i deher perbatasen Hauran.+
17 Emaka perbatasen e mulai laut nari ku Hasar-Enon,+ terus ku segedang batas Damaskus si sebelah utara ras ku perbatasen Hamat.+ Enda ndai me perbatasen utara.
18 “Bas sebelah timur, mulai antara Hauran ras Damaskus janah terus ku segedang Lau Jordan si lit i antara Gileat+ ras negri Israel, arus ukur kena mulai perbatasen si arah utara seh ku laut timur.* Enda ndai me perbatasen si arah timur.
19 “Perbatasen si arah selatan eme arah Tamar ku lau Kades-Mariba,+ jenari ku Lembah* ras ku Laut Tengah.+ Enda ndai me perbatasen si arah selatan.
20 “Bas sebelah barat lit Laut Tengah, mulai perbatasen si arah selatan seh ku sebrang Hamat.*+ Enda ndai me perbatasen si arah barat.”
21 “Bagi-bagikenlah taneh enda i antara kena, eme i antara 12 suku Israel.
22 Arus bagi-bagiken kena taneh e jadi warisen man kena bage pe man penduduk asing si tading ras kena, si enggo lit anak-anakna sanga tading ia i tengah-tengah kena. Janah arus anggap kena kalak e bagi kalak Israel. Aloken kalak e pagi warisen i tengah-tengah suku Israel radu ras kena.
23 Arus bereken kena warisen man penduduk asing i daerah suku ingan kalak e tading,” nina Jahwe Tuhan Si Meganjangna.
Cataten i teruh
^ Ntah “gurun pasir.”
^ Maksudna, Laut Besar.
^ Ntah “rawa-rawa.”
^ Maksudna, Laut Mati.
^ Ntah “dalan masuk ku Hamat.”
