Esekiel 48:1-35
48 “Enda bagin man suku-suku Israel menurut gelar suku-sukuna, mulai arah ujung utara nari: Bagin Dan+ eme mulai dalan ku Hetlon seh ku Hamat*+ janah terus ku Hasar Enan, ras segedang perbatasen Damaskus i utara i sebelah Hamat.+ Baginna eme mulai arah perbatasen timur seh ku perbatasen barat.
2 Bagin Aser+ sebelahen ras bagin Dan, mulai perbatasen timur seh ku perbatasen barat.
3 Bagin Naptali+ sebelahen ras bagin Aser, mulai perbatasen timur seh ku perbatasen barat.
4 Bagin Manase+ sebelahen ras bagin Naptali, mulai perbatasen timur seh ku perbatasen barat.
5 Bagin Eperaim sebelahen ras bagin Manase,+ mulai perbatasen timur seh ku perbatasen barat.
6 Bagin Ruben sebelahen ras bagin Eperaim,+ mulai perbatasen timur seh ku perbatasen barat.
7 Bagin Juda sebelahen ras bagin Ruben,+ mulai perbatasen timur seh ku perbatasen barat.
8 Taneh si sebelahen ras daerah Juda arus ipisahken guna isumbangken mulai arah perbatasen timur seh ku perbatasen barat. Taneh e belangna 25.000 hasta*+ janah gedangna seri ras gedang taneh suku-suku si lit i sebelah taneh e, mulai arah perbatasen timur seh ku perbatasen barat. Ingan si badia lit i tengah-tengahna.
9 “Taneh si ipisahken guna isumbangken man Jahwe gedangna 25.000 hasta janah belangna 10.000 hasta.
10 Taneh e jadi sumbangen si badia man imam-imam.+ Sebelah utara gedangna 25.000 hasta, sebelah barat 10.000 hasta, sebelah timur 10.000 hasta, janah sebelah selatan 25.000 hasta. Ingan si badia Jahwe lit i tengah-tengah taneh e.
11 Taneh e man imam-imam keturunen Sadok+ si enggo ipebadia, si tetap ndalanken tugasna man bangKu janah la nadingken Aku sanga kalak Israel ras kalak Lewi lawes nadingken Aku.+
12 Kalak e dat bagin arah taneh si isumbangken si enggo ipisahken jadi ingan si seh kel badiana. Bagin kalak e sebelahen ras bagin kalak Lewi.
13 “Man kalak Lewi ibereken bagin si gedangna 25.000 hasta janah belangna 10.000 hasta. Bagin kalak Lewi e pas i sebelah daerah imam-imam. (Kerinana gedangna 25.000 hasta janah belangna 10.000 hasta.)
14 Taneh e taneh si mejilena. Taneh e la banci idayaken, itukar, ntah pe ipindah tanganken, perban taneh e badia akap Jahwe.
15 “Bas perbatasen si gedangna 25.000 hasta e lit daerah si sisa, belangna 5.000 hasta. Daerah si sisa e iban jadi ingan penduduk kota+ eme guna ingan rumah-rumah ras mbalmbal. I tengah-tengahna lit pagi kota.+
16 Enda me ukuren kota e: Perbatasen utara 4.500 hasta, perbatasen selatan 4.500 hasta, perbatasen timur 4.500 hasta, janah perbatasen barat 4.500 hasta.
17 Ukuren mbalmbal kota e: Sebelah utara 250 hasta, sebelah selatan 250 hasta, sebelah timur 250 hasta, janah sebelah barat 250 hasta.
18 “Taneh si sisa e seri gedangna ras taneh si badia si isumbangken,+ ukurenna 10.000 hasta i sebelah timur janah 10.000 hasta i sebelah barat. Hasil taneh e jadi pangan man kalak si erdahin bas kota.
19 Kalak arah kerina suku Israel si erdahin bas kota e si mperjumai taneh e.+
20 “Kerina taneh si isumbangken e 25.000 hasta kali 25.000 hasta. Taneh e arus ipisahken jadi sumbangen si badia radu ras daerah kota.
21 “Sisa taneh i sebelah kanan ras kiri taneh si badia si isumbangken bage pe daerah kota, jadi jang peminpin.+ Taneh e lit i segedang perbatasen si gedangna 25.000 hasta eme i sebelah timur ras barat taneh si badia si isumbangken. Batas-batasna ngikutken batas-batas si sebelahen ras taneh e janah taneh e jadi jang peminpin. Taneh si badia si isumbangken ras ingan si badia bas rumah pertoton, lit pagi i tengah-tengahna.
22 “Taneh bagin kalak Lewi ras daerah kota, lit pagi i antara daerah peminpin. Daerah peminpin lit i antara batas taneh bagin Juda+ ras batas taneh bagin Benyamin.
23 “Enda bagin man suku-suku si debanna: Bagin Benyamin eme mulai perbatasen timur nari seh ku perbatasen barat.+
24 Bagin Simeon sebelahen ras bagin Benyamin,+ mulai perbatasen timur seh ku perbatasen barat.
25 Bagin Isakar+ sebelahen ras bagin Simeon, mulai perbatasen timur seh ku perbatasen barat.
26 Bagin Sebulon sebelahen ras bagin Isakar,+ mulai perbatasen timur seh ku perbatasen barat.+
27 Bagin Gat sebelahen ras bagin Sebulon,+ mulai perbatasen timur seh ku perbatasen barat.
28 Perbatasen Gat i sebelah selatan eme mulai Tamar+ nari seh ku lau Kades-Mariba,+ terus ku Lembah*+ janah seh ku Laut Tengah.*
29 “Enda ndai me taneh si arus ibagi-bagiken jadi warisen man suku-suku Israel+ janah e jadi bagin kalak e,”+ nina Jahwe Tuhan Si Meganjangna.
30 “Enda me dalan ndarat kota e: Sebelah utara ukurenna 4.500 hasta.+
31 “Gerbang kota e igelari menurut suku-suku Israel. Lit telu gerbang i utara eme gerbang Ruben, gerbang Juda, ras gerbang Lewi.
32 “I sebelah timur gedangna 4.500 hasta, janah i je lit telu gerbang: gerbang Jusup, gerbang Benyamin, ras gerbang Dan.
33 “I sebelah selatan ukurenna 4.500 hasta, janah lit telu gerbangna: gerbang Simeon, gerbang Isakar, ras gerbang Sebulon.
34 “I sebelah barat gedangna 4.500 hasta, janah lit telu gerbangna: gerbang Gat, gerbang Aser, ras gerbang Naptali.
35 “Keliling kota e ukurenna 18.000 hasta. Mulai bas wari e iban me gelar kota e Jahwe Lit i Je.”+
