Esekiel 5:1-17
5 “O anak manusia, buatlah pedang si ntelap, banlah e jadi piso cukur. Cukurlah bukndu ras janggutndu, jenari buatlah timbangen. Timbanglah bukndu e, ban jadi telu bagin.
2 Kenca dung wari pengepungen, tutunglah sepertelu bukndu e i kota.+ Kenca si e, buat ka sepertelu nari bukndu e janah potong-potong alu pedang i belang-belang kota e,+ si sepertelu nari arus ambekkenndu ku angin, Kupedarat pagi pedang guna ngayakisa.+
3 “Arus ka buatndu sitik bukndu e, bungkus bas lipaten bajundu.
4 Buatlah piga-piga buk si ibuatndu ndai jenari ambekken ku api seh ngasa meseng kerina. Merap pagi api e ku kerina kalak Israel.+
5 “Bagenda nina Jahwe Tuhan Si Meganjangna, ‘Enda me Jerusalem. Enggo Kutamaken ia i tengah bangsa-bangsa, negri-negri si deban lit i sekelilingna.
6 Tapi tulak kalak e undang-undangKu ras peraturen-peraturenKu, jahaten perbahanen kalak e asangken bangsa-bangsa ras negri si lit i sekelilingna.+ Tulak kalak e undang-undangKu, la dalankenna peraturen-peraturenKu.’
7 “Bagenda nina Jahwe Tuhan Si Meganjangna, ‘Perban buen masalah si ban kena asangken si ban bangsa-bangsa si lit i sekeliling kena janah la dalanken kena peraturen-peraturenKu ras undang-undangKu, tapi ikutken kena peraturen bangsa-bangsa si lit i sekeliling kena,+
8 enda si kataken Jahwe Tuhan Si Meganjangna, “O kota Jerusalem, Aku kap musuhndu,+ pasti kam Kuhukum i lebe-lebe bangsa-bangsa e.+
9 Perban perbahanenndu si erban ciga ate, Kuban pagi man bandu bagi si lenga pernah Kulakoken, janah lanai pagi Kuban si bage.+
10 “‘“Orang tua si lit i tengah-tengah kena,+ panna pagi anak-anakna, anak-anak panna pagi orang tuana. Kuhukum pagi kam janah kalak si nggeluh denga Kumerapken ku kerina arah.”’+
11 “Nina Jahwe Tuhan Si Meganjangna, ‘Aku Dibata si nggeluh ersumpah, Kutulak pagi* kam perban enggo najis banndu inganKu si badia alu berhala-berhala ras perbahanenndu si erban ciga ate.+ Labo pagi mekuah ateKu man bandu, labo pagi diateKu kam.+
12 Sepertelu arah kam mate pagi perban wabah penakit ras kelihen. Sepertelu nari mate perban pedang.+ Si sepertelu nari ka Kumerapken ku kerina arah, janah Kuban pedangKu ngayakisa.+
13 Kenca si e, lanai Aku merawa, lanai Aku nembeh, janah enggo puas Kuakap.+ Kenca Kusehken rawaKu man kalak e, teh kalak e pagi maka Aku kap Jahwe si ngerana man kalak e,+ sebap Aku ngenca si arus isembah.
14 “‘Kuban pagi kam jadi ingan si hancur, pasti kam itokohi bangsa-bangsa si lit i sekelilingndu bage pe kalak si lewat.+
15 Sanga Kuhukum kam perban rawaKu, perban nembeh ateKu, ras perban ngilas ateKu, itokohi pagi kam ras ihina+ janah jadi persinget si seh kel ngerina man bangsa-bangsa si lit i sekelilingndu. Aku kap Jahwe si enggo ngatakenca.
16 “‘Kuban pagi kam kelihen bagi serangen anak-anak panah. Hancur pagi kam iban anak-anak panah si Kukirim e.+ Reh parahna pagi Kuban kelihen e alu ngurangi persedian panganndu.*+
17 Kuban pagi terjadi kelihen, Kusuruh binatang buas reh ndahi kam.+ Si e kerina erban bene pagi anak-anakndu. Terjadi pagi wabah penakit, dareh pe mamburen. Kuban pagi pedang ngelawan kam.+ Aku kap Jahwe si enggo ngatakenca.’”
Cataten i teruh
^ Ntah “Kuban pagi reh sitikna.”
^ As. “alu menggelken tongkat rotindu.” Mungkin maksudna tongkat ingan nggantung roti.
