Esekiel 6:1-14
6 Ngerana ka Jahwe man bangku, nina,
2 “O anak manusia, nenlah ku gunung-gunung Israel, ernubuatlah kam kerna kalak e.
3 Bagendalah nindu, ‘O gunung-gunung Israel, begikenlah kata Jahwe Tuhan Si Meganjangna: Bagenda nina Jahwe Tuhan Si Meganjangna man gunung-gunung, man bukit-bukit, lau, ras lembah-lembah, “Kuban pagi pedang reh ngelawan kena, Kuhancurken pagi ingan-ingan ersembah* kena.
4 Ihancurken pagi ingan-ingan nutung* persembahen kena ras ingan nutung kemenyan kena.+ Kubenterken pagi kalak si mate ibunuh ku lebe-lebe berhala-berhala kena si erban ciga ate.*+
5 Kubenterken pagi mayat-mayat kalak Israel ku lebe-lebe berhala-berhala kena si erban ciga ate, Kumerapken pagi tulan-tulan kena ku sekeliling ingan nutung persembahen kena.+
6 Bas kerina ingan kena tading, kota-kotana ihancurken+ ras ingan-ingan ersembahna ihancurken janah la iurus.+ Ingan nutung persembahen kena pe ihancurken janah imerapken, berhala-berhala kena si erban ciga ate ihancurken, ingan nutung kemenyan kena iruntuhken, hasil pendahin kena imasapken.
7 Bas tengah-tengah kena, i japa pe jelma ibunuhi.+ Teh kena pagi maka Aku kap Jahwe.+
8 “‘“Tapi piga-piga arah kena Kupediat nggeluh, sebap sanga Kumerapken kena ku tengah bangsa-bangsa si lit i erbage-bage negri, lit denga si selamat arah pedang.+
9 Inget kalak si selamat e pagi Aku i tengah bangsa-bangsa ingan kalak e itaban.+ Iteh kalak e pagi maka getem kel pusuhKu perban kalak e la setia man bangKu janah tadingken kalak e Aku,+ perban merhat kel kalak e ngidah berhala-berhalana si erban ciga ate.+ Mela pagi akap kalak e, ciga atena man kerina si jahat ras si erban ciga ate si enggo lakokenna.+
10 Teh kalak e pagi maka Aku kap Jahwe, kesusahen si enggo Kukataken pasti Kuban terjadi.”’+
11 “Bagenda nina Jahwe Tuhan Si Meganjangna, ‘Ertepuklah kam, perjakken nahendu, tangisilah kerina kejahaten ras perbahanen si erban ciga ate si enggo lakoken kalak Israel, perban mate pagi kalak e ban pedang, ban kelihen, ras wabah penakit.+
12 Kalak si ndauh, mate pagi perban wabah penakit, kalak si ndeher, mate pagi perban pedang, ise pe si selamat ras si nggeluh denga arah si e ndai kerina, mate pagi perban kelihen. Bage caraKu ncidahken uga nembehna ateKu man kalak e.+
13 Kalak si terbunuh, amparen pagi i tengah-tengah berhala-berhalana si erban ciga ate, bage pe i sekeliling ingan nutung persembahen kalak e,+ i tiap bukit si meganjang, i datas kerina puncak gunung, i teruh batang kayu si melala bulungna, janah i teruh dahan-dahan batang kayu si galang. I je, enggo ban kalak e persembahen si merim guna erban meriah ukur berhala-berhala kalak e si erban ciga ate.+ Sanga si e pagi, teh kena maka Aku kap Jahwe.+
14 Kuangkat pagi tanKu ngukum kalak e, Kuban pagi lanai lit si tading bas negri kalak e, kerina ingan tading kalak e lungunen pagi asangken taneh mesawang* si lit i deher Dipla. Teh kalak e pagi maka Aku kap Jahwe.’”
Cataten i teruh
^ As. “ingan-ingan si meganjang.”
^ Kata enda bas bahasa Heber banci jadi lit hubungenna ras kata “tai” guna ncidahken perasan ciga ate.
^ Taneh si mbelang si jarang iingani.