Esekiel 7:1-27
7 Ngerana ka Jahwe mulihi, nina,
2 “O anak manusia, bagenda nina Jahwe Tuhan Si Meganjangna man negri Israel, ‘Seh me kedungen kerina negri e.
3 Seh me kedungenndu, janah Kusehken rawaKu man bandu. Kuhakimi kam menurut perbahanenndu, Kupindo pertanggung jawapenndu nandangi kerina perbahanenndu si erban ciga ate.
4 Labo pagi mekuah ateKu man bandu, labo pagi diateKu kam,+ perban Kuban pagi man bandu bagi perbahanenndu, mesui pagi akapndu perban perbahanenndu si erban ciga ate.+ Tehndu pagi maka Aku kap Jahwe.’+
5 “Bagenda nina Jahwe Tuhan Si Meganjangna, ‘Reh pagi kesusahen. Kesusahen si lenga pernah terjadi.+
6 Reh me kedungen e. Kedungen e pasti reh. Rempet ia reh, janah nandangi reh.
7 O kam si tading i negri e, enggo seh gilirenndu. Seh me waktuna, warina enggo ndeher.+ Labo surak-surak meriah si terjadi i pegunungen tapi keadan si kacau.
8 “‘Lanai ndekah gejapkenndu rawaKu,+ janah Kusehken rawaKu man bandu.+ Kuhakimi kam menurut perbahanenndu, Kupindo pertanggung jawapenndu nandangi kerina perbahanenndu si erban ciga ate.
9 Labo pagi mekuah ateKu man bandu, labo pagi diateKu kam,+ perban Kuban pagi man bandu bagi perbahanenndu, mesui pagi akapndu perban perbahanenndu si erban ciga ate. Tehndu pagi maka Aku kap Jahwe si nyerang kam.+
10 “‘Nenlah! Wari e enggo seh.+ Enggo seh gilirenndu. Tongkat penghukumen enggo siap guna Kupake janah kesombongen musuh enggo reh belinna.
11 Kekerasen enggo jadi tongkat kejahaten.+ Kalak e, kebayakenna, ntah pe kemulianna, la banci nelamatken ia arah penghukumen.
12 Reh me waktuna, seh me warina. Pediatlah kalak si nukur la ermeriah ukur, pediatlah kalak si erdaya la erceda ate, perban merawa Aku man kerina kalak e.*+
13 Kalak si erdaya la ndatken mulihi kai si enggo dayakenna, amin gia la ia mate, perban pengenehenen* e guna kerina kalak. La lit sekalak pe si mulih, janah perban kesalahenna la lit sekalak pe si patut nggeluh.
14 “‘Amin pe trompet enggo iembus+ janah kerina kalak enggo ersikap, tapi la lit si lawes erperang, perban merawa Aku man kerina kalak e.+
15 I darat lit pedang,+ i bas lit wabah penakit ras kelihen. Ise pe si lit i juma mate alu pedang, kalak si i kota maten perban kelihen ras wabah penakit.+
16 Kalak si selamat lawes ku pegunungen, perban kesalahen kalak e kerina ia ngandung bagi merpati i lembah.+
17 Lemas kerina tan kalak e, litap tiwen kalak e.*+
18 Pake kalak e kain guni,+ nggirgir kalak e perban biarna. Kerina kalak e ipermelaken, kerina takal enggo jadi botak.*+
19 “‘Benterken kalak e pagi pirakna ku dalan-dalan. Ciga ate kalak e emasna. Bas wari rawa Jahwe, pirak ntah pe emasna la banci nelamatken kalak e.+ Kerina e labo erban kalak e puas ras besur, perban kerina e* erban kalak e ngelakoken kesalahen.
20 Bangga kalak e perban mejile perhiasenna, banna e jadi patung-patung si erban ciga ate, berhala-berhala si erban ciga ate.+ Enda me sebapna, maka Kuban ciga ate kalak e nandangi si e kerina.
21 Kubereken pagi emas ras pirak kalak e ku tan kalak asing guna irampas bage pe ku kalak jahat si lit i doni enda, najis pagi ban kalak e si e kerina.
22 “‘Kupudiken kalak e,+ najis ban kalak e inganKu si terbuni,* jenari masuk perampok ku je janah najis banna ingan e.+
23 “‘Sikapken rante,*+ perban negri e dem alu undang-undang pembunuhen+ ras kota e dem alu kekerasen.+
24 Kuban pagi reh bangsa-bangsa si seh kel jahatna,+ rebutna pagi rumah-rumah kalak e.+ Kupengadi pagi kesombongen kalak si megegeh, ingan-ingan si badia kalak e iban jadi najis.+
25 Sanga rate mesui pagi kalak e, daramina kedamen tapi la datna.+
26 La erngadi-ngadi terjadi bencana, la erngadi-ngadi reh laporen. Darami kalak pagi pengenehenen arah nabi,+ tapi undang-undang* si iajarken imam-imam bage pe nasehat arah peminpin-peminpin la pagi erguna.+
27 Erceda ate pagi raja,+ putus asa pagi peminpin, nggirgir pagi tan rakyat perban biarna. Kuban pagi man kalak e bagi perbahanen kalak e, Kuhakimi pagi kalak e bagi cara kalak e ngakimi. Teh kalak e pagi maka Aku kap Jahwe.’”+
Cataten i teruh
^ Maksudna, si erdaya ras si nukur taneh la lit si runtung, sebap kena masalah pagi kerina kalak.
^ Eme kerna kai pe si cidahken Dibata ku bas pikiren sekalak jelma.
^ Maksudna, ndarat kencingna perban biarna.
^ Maksudna, takal kalak e icukur perban erceda ate.
^ Maksudna, pirak ras emas kalak e.
^ Mungkin maksudna ingan si arah basna bas ingan si badia Jahwe.
^ Maksudna, rante tabanen.
^ Ntah “petunjuk.”
