Esekiel 8:1-18
8 Bas tahun si peenemken, bulan si peenemken, wari si pelimaken bas bulan e, kundul aku i rumahku, sanga si e peminpin-peminpin Juda kundul i lebe-lebeku. I je reh gegeh* Jahwe Tuhan Si Meganjangna man bangku.
2 Sanga kuperdiateken, lit kuidah si bagi api. AwakNa nari ku teruh teridah bagi api,+ janah awakNa nari ku datas teridah bagi cahaya, si erndilap-ndilap bagi emas putih.*+
3 Kenca si e idudurken man bangku si bali bagi tan, janah jemakna bukku. Iangkat* aku ku udara* janah ibaba ku Jerusalem alu sada pengenehenen* arah Dibata, eme ku gerbang si arah bas+ si pengalana ku utara. I je ingan berhala si erban segat ate Dibata.+
4 Kemulian Dibata Israel lit i je,+ bagi si kuidah i lembah.+
5 Kenca si e nina man bangku, “O anak manusia, nenlah ku sebelah utara.” Emaka kunen ku sebelah utara. I pintu masuk si lit i sebelah utara gerbang ingan nutung* persembahen, kuidah patung si erban segat ate Dibata.
6 Nina man bangku, “O anak manusia, idahndu nge kai si la mehuli bage pe kai si erban ciga ate si lakoken kalak Israel i je?+ E me sebapna Kutadingken inganKu si badia.+ Tapi idahndu ka kari kai si erban ciga ate si keleken asangken si e.”
7 Kenca si e babaNa aku ku pintu masuk halamen, kuidah lit lubang i tembok.
8 Nina man bangku, “O anak manusia, pebelang lubang si lit bas tembok e.” Emaka kupebelang lubang si lit bas tembok e, lit kuidah dalan masuk.
9 Nina man bangku, “Masuklah, nenlah kai si jahat ras si erban ciga ate si lakoken kalak e i je.”
10 Emaka masuk aku, kuidah erbage-bage ukiren binatang si nggawang, binatang si erban ciga ate,+ ras kerina berhala kalak Israel si erban ciga ate.*+ Kerina e iukir bas sekeliling tembok e.
11 Lit 70 peminpin kalak Israel tedis i lebe-lebena termasuk Jahasanya anak Sapan.+ Tiap kalak njemak ingan nutung kemenyanna, asap kemenyan si merim e nangkih ku datas.+
12 Nina man bangku, “O anak manusia, idahndu nge kai si lakoken peminpin-peminpin kalak Israel bas kegelapen? Tiap kalak lit bas kamar si arah bas eme ingan berhala e icidahken. Sebap nina kalak e, ‘Labo idah Jahwe kita. Enggo kap tadingken Jahwe negri enda.’”+
13 Nina man bangku, “Idahndu kari kai si erban ciga ate si keleken asangken si lakoken kalak e.”
14 Emaka babaNa aku ku pintu masuk gerbang sebelah utara rumah Jahwe. I je lit kuidah diberu-diberu si kundul, tangisina Dewa Tammus.
15 Kenca si e nina man bangku, “O anak manusia, idahndu nge enda? Idahndu kari kai si erban ciga ate si ndauh keleken asangken si enda.”+
16 Emaka babaNa aku ku halamen rumah Jahwe si arah bas.+ Bas pintu masuk rumah pertoton Jahwe, antara teras ras ingan nutung persembahen, lit kira-kira 25 dilaki si pudikenna rumah pertoton Jahwe janah alakenna ku timur. Mungkuk kalak e nembah matawari i sebelah timur.+
17 Nina man bangku, “O anak manusia, idahndu nge enda? Lakoken kalak Juda kai si erban ciga ate, dem banna negri enda alu kekerasen+ jenari lalap banna Aku sakit hati. Biasa saja kin akapndu e? Dudurken kalak e kai si erban ciga ate* ku lebe-lebe igungKu.
18 Emaka merawa kel Aku. Labo pagi mekuah ateKu ngidah kalak e, lanai diateKu kalak e.+ Amin gia nderkuh kalak e, labo Kubegiken.”+
Cataten i teruh
^ As. “tan.”
^ Logam si iban arah emas ras pirak.
^ Bas bahasa aslina, si ngangkat Esekiel banci maksudna kesah si badia Dibata ntah pe sada malekat.
^ As. “ku antara doni ras langit.”
^ Eme kerna kai pe si cidahken Dibata ku bas pikiren sekalak jelma.
^ Kata enda bas bahasa Heber banci jadi lit hubungenna ras kata “tai” guna ncidahken perasan ciga ate.
^ As. “Dudurken kalak e dahan batang kayu.” Dahan batang kayu e ipake bas nembah berhala.