Esra 1:1-11
1 Bas tahun pertama pemerentahen Kores+ raja Persia, iban Jahwe gelah terjadi kai si enggo katakenNa arah Jeremia.+ Emaka ban Jahwe tersuruh ukur Kores raja Persia gelah banna pengumumen bas kerina kerajanna, janah itulisken me pengumumen e,+ isina:
2 “Bagenda nina Kores raja Persia, ‘Jahwe Dibata si erkuasa bas surga, enggo mereken kerina kerajan doni enda man bangku,+ janah suruhNa aku mbangun rumahNa i Jerusalem+ eme i Juda.
3 Ise pe umatNa si lit i tengah-tengah kena, mbera-mbera Dibatana lit ras ia. Mulihlah ia ku Jerusalem si lit i Juda. Bangunnalah mulihi rumah Jahwe Dibata Israel. Ia kap Dibata si benar, si mbarenda rumahNa lit i Jerusalem.*
4 Ise pe si tading jadi kalak asing,+ i ja pe ia tading, pasti isampati tetangga-tetanggana ia alu mereken pirak ras emas man bana, bage pe barang-barang ras asuh-asuhen, radu ras sumbangen sukarela guna rumah Dibata si benar,+ si lit i Jerusalem.’”
5 Kenca si e, peminpin-peminpin keluarga bapak arah suku Juda ras suku Benyamin, bage pe imam-imam ras kalak Lewi, eme tiap kalak si tersuruh ukurna iban Dibata si benar, ersikap guna lawes janah mbangun mulihi rumah Jahwe si lit i Jerusalem.
6 Selain mereken sumbangen sukarela, kerina tetangga si lit i sekeliling kalak e nampati* kalak e alu mereken peralaten si iban arah pirak ras emas, barang-barang, asuh-asuhen, bage pe barang-barang si merga.
7 Pedarat Raja Kores ka barang-barang rumah Jahwe si enggo baba Nebukadnesar arah Jerusalem nari si tamana i rumah dibatana.+
8 Kores raja Persia nuruh Mitredat sekalak bendahara guna maba barang-barang e. Jenari catat Mitredat kerina barang e janah berekenna man Sesbasar*+ peminpin Juda.
9 Enda me si catatna: 30 keranjang si iban arah emas nari, 1.000 keranjang si iban arah pirak nari, ras 29 mangkok si debanna.
10 Lit ka 30 mangkok si kitik si iban arah emas nari, 410 mangkok si kitik si iban arah pirak nari, ras 1.000 peralaten si debanna.
11 Kerina peralaten si iban arah emas bage pe pirak lit 5.400 buena. Baba Sesbasar kerina peralaten e ku Jerusalem radu ras kalak si mbarenda itaban+ i Babilon.
