Esra 3:1-13
3 Bas bulan si pepituken,+ sanga kalak Israel enggo tading bas kota-kotana, pulung kalak e i Jerusalem.
2 Jesua+ anak Jehosadak ras imam-imam si debanna bage pe Serubabel+ anak Sealtiel+ ras senina-seninana mbangun ingan nutung* persembahen man Dibata Israel, gelah banci kalak e mpersembahken korban tutungen i je, bagi si tertulis bas Undang-Undang Musa+ pelayan Dibata si benar.
3 Amin pe kalak e mbiar man penduduk si tading i sekeliling kalak e,+ tetap bangun kalak e ingan nutung persembahen bas ingan si mbarenda. Mulai persembahken kalak e korban tutungen man Jahwe i je, korban tutungen si erpagi-pagi bage pe si karaben.+
4 Rayaken kalak e Perayan Sapo-Sapo bagi si tertulis+ bas undang-undang. Tiap wari persembahken kalak e korban tutungen menurut jumlah si enggo itentuken bas wari e.+
5 Emaka mulai je nari, tiap wari lit persembahen tutungen,+ persembahen perayan bulan baru,+ ras kerina perayan si badia+ man Jahwe. Selain si e, lit ka persembahen sukarela+ si ibereken alu meriah ukur man Jahwe.
6 Mulai wari si pertama bas bulan si pepituken,+ persembahken kalak e korban tutungen man Jahwe, amin pe pondasi rumah pertoton Jahwe lenga mulai ibangun.
7 Bereken kalak e sen man tukang potong batu+ ras tukang si ahli.+ Bereken kalak e ka pangan, inemen, ras minak man kalak Sidon ras kalak Tirus guna itukarken ras kayu-kayu aras si lit i Libanon si ibaba kalak Sidon ras kalak Tirus arah laut ku Jope.+ Enda ilakoken perban enggo isetujui Kores raja Persia.+
8 Mulai kalak e erdahin bas rumah Dibata si benar bas tahun si peduaken bulan si peduaken kenca kalak e seh i Jerusalem. Kalak e eme Serubabel anak Sealtiel, Jesua anak Jehosadak bage pe senina-senina kalak e, imam-imam ras kalak Lewi, bage pe kerina tabanen+ si enggo mulih ku Jerusalem. Ipilih kalak e kalak Lewi si umurna 20 tahun ras si 20 tahun ku datas guna ngawasi pembangunen rumah Jahwe e.
9 Emaka Jesua ras anak-anakna si dilaki bage pe senina-seninana, kerja sama ras Kadmiel bage pe anak-anakna si dilaki eme keturunen Juda, guna ngawasi pendahin bas rumah Dibata si benar. Ikut ka keturunen Henadad,+ anak-anak kalak e si dilaki ras senina-senina kalak e, eme kalak Lewi.
10 Kenca enggo dung ibangun kalak si erdahin ndai pondasi rumah Jahwe,+ tedis imam-imam alu make jubahna janah maba trompet.+ Kalak Lewi arah keturunen Asap pe maba simbal. Kerina kalak e muji Jahwe alu alat musik ndai, bagi si enggo perentahken Daud raja Israel.+
11 Mulai me kalak e rende. Sialo-alon+ kalak e rende muji Jahwe janah ngataken bujur man baNa, ning kalak e, “Mehuli kap Ia janah kekelengenNa si setia man Israel tetap lit rasa lalap.”+ Kerina kalak e ersurak muji Jahwe alu sora si megang, perban pondasi rumah Jahwe enggo dung iban.
12 Enterem imam, kalak Lewi, ras peminpin keluarga bapak eme kalak si enggo metua si enggo pernah ngidah rumah pertoton si ndekah,+ nderkuh kel sanga ngidah pondasi rumah pertoton e enggo ibangun mulihi. Enterem kalak si debanna ersurak alu sora si megang perban riahna ukurna.+
13 Emaka lanai terbedaken apai sora kalak ersurak janah apai sora kalak ngandung, perban seh kel gangna sora kalak e, terbegi sorana ku ingan si ndauh.
