Esra 4:1-24
4 Sanga begi musuh-musuh kalak Juda ras kalak Benyamin+ maka tabanen si mulih e+ enggo mulihi mbangun rumah pertoton Jahwe Dibata Israel,
2 mis jumpai kalak e Serubabel ras peminpin-peminpin arah keluarga bapak janah ning kalak e, “Bere min kami ikut mbangun ras kena. Sebap kami pe nembah* Dibata kena,+ bagi kena. Enggo persembahken kami korban man baNa mulai jaman Esarhaddon+ raja Assur, si maba kami ku jenda.”+
3 Tapi ngerana Serubabel, Jesua, bage pe peminpin-peminpin keluarga bapak arah kalak Israel, ning kalak e, “La lit hak kena ikut ras kami mbangun rumah Dibata kami,+ kami saja si mbangun rumah e guna Jahwe Dibata Israel bali bagi si perentahken Kores raja Persia.”+
4 Emaka terus usahaken kalak si lit i sekeliling negri e gelah kitik ukur kalak Juda janah lanai semangat* mbangunsa.+
5 Gelah gagal rencana kalak Juda, isogok kalak e penasehat-penasehat kerajan.+ Si enda lakoken kalak e mulai pemerentahen Kores raja Persia seh ku pemerentahen Darius+ raja Persia.
6 Bas awal pemerentahen Raja Ahasweros, ban kalak e tuduhen man penduduk Juda ras Jerusalem arah surat.
7 Janah bas jaman Artasasta raja Persia, Bislam, Mitredat, Tabeel, ras teman-teman kalak e nulis surat man Raja Artasasta. Terjemahken kalak e surat e ku bahasa Aram+ jenari itulis alu hurup Aram.*
8 * Kenca si e, Rehum eme kepala pegawai pemerentah ras Simsai eme sekalak penulis, nulis surat kerna Jerusalem man Raja Artasasta. Isina:
9 (Surat enda arah Rehum kepala pegawai pemerentah ras Simsai sekalak penulis bage pe teman-teman kalak e sada dahin, eme hakim-hakim ras gubernur-gubernur bawahen, sekertaris-sekertaris, kalak Ereh,+ kalak Babilon, penduduk Susan+ eme kalak Elam,+
10 bage pe bangsa-bangsa si deban si enggo itaban Raja Asurbanipal si mulia ras si ihamati, si suruhna tading bas kota-kota Samaria,+ bage pe kalak si debanna si tading i daerah sebelah barat Lau Eprat.*
11 Enda me isi surat si ikirimken kalak e.)
“Man Raja Artasasta arah pelayan-pelayanndu i daerah sebelah barat Lau Eprat.
12 Kataken kami ate kami man bandu Raja, maka kalak Jahudi si reh ku jenda arah daerahndu nari enggo seh i Jerusalem. Kalak e sangana mbangun mulihi kota e. Kalak si tading bas kota e jahat ras mberontak. Kalak e sangana ndungi tembok-tembokna+ janah mpesikap pondasi-pondasina.
13 Tapi perlu tehndu Raja, lanai pagi galari kalak e pajak*+ adi enggo dung pagi kota enda ras tembok-tembokna ibangun mulihi. Emaka uang masuk kerajan pasti reh sitikna.
14 Kami dat gaji arah kerajan* janah la kami ngasup ngidah Raja irugiken. E me sebapna kataken kami kerna si e man bandu Raja,
15 gelah pereksandu buku cataten nini bulangndu.+ Pasti idahndu janah tehndu arah cataten e maka kota enda eme kota si mberontak janah bahaya man raja-raja bage pe man propinsi-propinsi. Mbarenda nari pe, pendudukna la nggit patuh. E me sebapna kota enda ihancurken.+
16 Kataken kami ate kami man bandu, lanai pagi terkuasaindu daerah sebelah barat Lau Eprat adi enggo dung pagi ibangun mulihi kota enda ras tembok-tembokna.”+
17 Ibalas raja surat Rehum kepala pegawai pemerentah ras Simsai sekalak penulis bage pe teman-teman kalak e sada dahin si tading i Samaria ras i daerah sebelah barat Lau Eprat, nina,
“Mejuah-juah!
18 Surat resmi si kirimken kena man bangku, alu jelas enggo ibacaken* i lebe-lebeku.
19 Enggo kuperentahken gelah ipereksa kerna si e, janah payo, mbarenda nari kota e ngelawan raja-rajana janah melala ka pemberontak ras pengacau i je.+
20 Mbarenda i Jerusalem, lit raja-raja si hebat si merentah kerina daerah sebelah barat Lau Eprat, janah man kalak e me igalari pajak.*
21 Emaka perentahkenlah gelah ngadi kalak e kerina mbangun mulihi kota e seh ngasa kubereken perentah si deban.
22 Arus pastiken kena maka lakoken kena kerina enda, gelah kerajan la terus rugi.”+
23 Kenca surat resmi arah Raja Artasasta ibacaken i lebe-lebe Rehum ras Simsai sekalak penulis bage pe i lebe-lebe teman-teman kalak e sada dahin, minter kalak e lawes ku Jerusalem guna maksa kalak Jahudi gelah ngadi erdahin.
24 Mulai je nari, dahin guna mbangun rumah Dibata si lit i Jerusalem lanai iterusken seh ngasa tahun si peduaken pemerentahen Darius raja Persia.+
Cataten i teruh
^ As. “ndarami.”
^ As. “lanai ergegeh tanna.”
^ Ntah banci saja “itulis bas bahasa Aram, kenca si e iterjemahken.”
^ Esa 4:8 seh asa 6:18 aslina itulis bas bahasa Aram.
^ Ntah “daerah Trans-Eprat (Sebrang Lau).”
^ Bas bahasa aslina lit telu jenis pajak si imaksudken i jenda, eme pajak tiap kalak, pajak barang, ras pajak dalan.
^ As. “Kami man sira arah istana.”
^ Ntah banci saja “enggo iterjemahken ras ibacaken.”
^ Bas bahasa aslina lit telu jenis pajak si imaksudken i jenda, eme pajak tiap kalak, pajak barang, ras pajak dalan.
