Esra 5:1-17
5 Kenca si e, bas gelar Dibata Israel si mperdiateken kalak e, ngerana Nabi Hagai+ ras Nabi Sakaria+ kempu Iddo+ man kalak Jahudi si lit i Juda ras Jerusalem.
2 Sanga si e, Serubabel+ anak Sealtiel ras Jesua+ anak Jehosadak mulai mbangun rumah Dibata+ si lit i Jerusalem. Nabi-nabi Dibata lit ras kalak e janah mpegegehi kalak e.+
3 Emaka reh Tattenai gubernur daerah sebelah barat Lau Eprat* bage pe Setar Bosenai ras teman-teman kalak e sada dahin guna nungkun, “Ise si nuruh kena mbangun rumah enda ras erban rangkana?”
4 Sungkun kalak e ka, “Ise saja gelar dilaki si erdahin bas pembangunen enda?”
5 Tapi perdiateken Dibata peminpin-peminpin kalak Jahudi,+ emaka la terpengadi kalak e kalak Jahudi seh ngasa laporen ikirim ku Darius janah dat balasen surat resmi arah ia kerna si e.
6 Enda me isi surat si ikirim man Raja Darius arah Tattenai gubernur daerah sebelah barat Lau Eprat, arah Setar Bosenai, bage pe teman-teman kalak e sada dahin eme gubernur-gubernur bawahen daerah sebelah barat Lau Eprat.
7 Ikirim kalak e laporen man bana, janah enda si itulis kalak e:
“Man Raja Darius,
“Mbera-mbera lit dame bas kam.
8 Kataken kami ate kami man Raja maka enggo lawes kami ku Propinsi Juda, ku rumah Dibata si mbelin. Rumah e sangana ibangun alu batu-batu si galang, janah sangana ipasang kayu-kayu guna tembok-tembokna. Semangat kalak e ndahiken pendahin e, emaka terus erdalan alu mehuli.
9 Kenca si e sungkun kami peminpin-peminpinna, ‘Ise si nuruh kena mbangun rumah enda ras erban rangkana?’+
10 Gelar-gelar kalak e pe sungkun kami gelah banci catat kami janah kataken kami man bandu ise saja peminpin kalak e.
11 “Bagenda jawapen kalak e, ‘Kami enda pelayan-pelayan arah Dibata si erkuasa i surga bage pe i doni. Kami sangana mbangun mulihi rumah si enggo ibangun ertahun-tahun si lewat, eme rumah si ibangun sekalak raja si mulia i Israel.+
12 Tapi merawa Dibata si erkuasa i surga iban nini bulang kami.+ Emaka serahkenNa kalak e ku tan Nebukadnesar+ raja Babilon kalak Kaldea, si ngancurken rumah enda+ janah tabanna kalak e ku Babilon.+
13 Tapi bas tahun pertama pemerentahen Kores raja Babilon, perentahken Raja Kores gelah rumah Dibata e ibangun mulihi.+
14 Selain si e, pedarat Raja Kores barang-barang si iban arah emas ras pirak arah ingan ersembah i Babilon.+ Kenca si e berekenna barang-barang e man Sesbasar,*+ kalak si ilantik Kores jadi gubernur.+ Mbarenda, barang-barang e ibuat Nebukadnesar arah rumah pertoton i Jerusalem.
15 Nina Kores man bana, “Babalah barang-barang enda janah tamaken bas rumah pertoton si lit i Jerusalem, i rumah Dibata si nandangi ibangun mulihi bas inganna si mbarenda.”+
16 Kenca si e, lawes Sesbasar ku rumah Dibata si lit i Jerusalem janah bangunna pondasi-pondasina.+ Mulai je nari seh asa gundari, dahin guna mbangun rumah e terus erdalan, tapi gundari lenga dung.’+
17 “Emaka, adi setuju kam o Raja, pereksalah ingan nimpan erta kerajan si lit i Babilon, gelah tehndu lit ntah lang iperentahken Raja Kores gelah ibangun mulihi rumah Dibata i Jerusalem.+ Janah kirimlah keputusen Raja kerna si e man kami.”
Cataten i teruh
^ Ntah “daerah Trans-Eprat (Sebrang Lau).”
