Esra 6:1-22
6 Kenca si e, perentahken Raja Darius gelah buku-buku sejarah si lit bas ingan nimpan erta i Babilon ipereksa.
2 Idat me gulungen bas kota si ertembok i Ekbatana si lit i Propinsi Media, janah bagenda isina:
3 “Bas tahun pertama pemerentahen Raja Kores, ipedarat Raja Kores perentah kerna rumah Dibata si lit i Jerusalem,+ nina, ‘Bangunlah mulihi rumah e guna ingan mpersembahken korban. Bangunlah pondasi-pondasina bas inganna. Ganjangna kira-kira 27 meter ras belangna kira-kira 27 meter.*+
4 Tembokna arus iban arah telu lapis batu si galang ras selapis kayu.+ Kerina biayana itanggung kerajan.+
5 Selain si e, ulihkenlah barang-barang rumah Dibata si iban arah emas ras pirak si enggo baba Nebukadnesar arah rumah pertoton i Jerusalem ku Babilon,+ janah tama barang-barang e ku inganna bas rumah Dibata si lit i Jerusalem.’+
6 “O Tattenai, gubernur daerah sebelah barat Lau Eprat,* ras kam o Setar Bosenai, bage pe teman-teman kena, eme gubernur-gubernur bawahen daerah sebelah barat Lau Eprat,+ ula ganggu kena kalak e.
7 Ula ganggu dahin mbangun rumah Dibata e. Pediatlah gubernur kalak Jahudi ras peminpin-peminpin kalak Jahudi mbangun mulihi rumah Dibata bas inganna si mbarenda.
8 Selain si e, kuperentahken man kena guna nampati peminpin-peminpin kalak Jahudi i bas mbangun mulihi rumah Dibata: Buat sen arah erta kerajan,+ eme pajak si ipepulung arah daerah sebelah barat Lau Eprat, kenca si e mis bereken man kalak e gelah la ngadi pendahin e.+
9 Berekenlah kai pe si perluken kalak e tiap wari, eme lembu jantan si nguda denga,+ biri-biri jantan,+ anak biri-biri,+ gandum,+ sira,+ anggur,+ ras minak,+ bagi si kataken imam-imam i Jerusalem.
10 Alu bage, banci kalak e tetap mpersembahken persembahen si erban meriah ukur Dibata si erkuasa i surga. Janah banci ka totoken kalak e raja ras anak-anakna gelah gedang umurna.+
11 Kubereken ka perentah, ise pe si la ngikutken perentah enda, ipakuken ia bas sada tiang kayu si ibuat arah rumahna, janah rumahna iban jadi WC umum.*
12 Mbera-mbera Dibata si enggo milih ingan e guna gelarNa,+ naluken raja si apai pe ntah jelma si apai pe si la matuhi perentah enda janah usahakenna ngancurken rumah Dibata si lit i Jerusalem. Aku, Darius, si merentahkenca. Mislah lakoken.”
13 Emaka kerina perentah Raja Darius e mis lakoken Tattenai gubernur daerah sebelah barat Lau Eprat, ras Setar Bosenai,+ bage pe teman-teman kalak e sada dahin.
14 Terusken peminpin-peminpin kalak Jahudi mbangun rumah e janah pendahin e erdalan alu mehuli.+ Kalak e ipegegehi nubuat Nabi Hagai+ ras Nabi Sakaria+ kempu Iddo. Dungi kalak e mbangun rumah e perban perentah arah Dibata Israel+ bage pe perentah arah Kores,+ Darius,+ ras Artasasta+ raja Persia.
15 Dung me rumah e iban kalak e bas wari si peteluken bulan Adar,* eme bas tahun si peenemken pemerentahen Raja Darius.
16 Kenca si e kalak Israel, imam-imam, ras kalak Lewi,+ bage pe kerina kalak si pernah itaban, ngeresmiken rumah Dibata e alu meriah ukur.
17 Guna ngeresmiken rumah Dibata e, persembahken kalak e 100 lembu jantan, 200 biri-biri jantan, ras 400 anak biri-biri. Janah guna persembahen dosa man kerina kalak Israel, ipersembahken 12 kambing jantan, menurut jumlah suku Israel.+
18 Janah ilantik me imam-imam ras kalak Lewi menurut kelompok kalak e guna ngelayani Dibata i Jerusalem,+ bali bagi si itulis bas Undang-Undang Musa.+
19 Kerina kalak si pernah itaban, ngerayaken Paskah bas wari si pe-14-ken bulan pertama.+
20 Kerina imam ras kalak Lewi mbersihken diri,+ gelah kerina kalak e bersih. Kenca si e, geleh kalak e korban Paskah guna kerina kalak si pernah itaban, guna imam-imam si debanna, ras guna dirina.
21 Dung e, korban e ipan kalak Israel si enggo mulih arah inganna itaban nari. Korban e pe ipan kalak si deban si gabung ras kalak e, si lanai ngikutken perbahanen si la bersih arah bangsa-bangsa i sekeliling kalak e, guna nembah* Jahwe Dibata Israel.+
22 Rayaken kalak e ka Perayan Roti si La Itama Ragi+ pitu wari dekahna alu ermeriah ukur. Ban Jahwe meriah ukur kalak e janah banNa ka jadi ate raja Assur ngidah kalak e,+ emaka dukung raja e* kalak e bas mbangun rumah Dibata si benar, Dibata Israel.
Cataten i teruh
^ Ntah “daerah Trans-Eprat (Sebrang Lau).”
^ Ntah banci saja “jadi ingan sampah.”
^ As. “ndarami.”
^ As. “pegegehi raja e tan.”