Esra 7:1-28
7 Kenca si e kerina, bas masa pemerentahen Artasasta+ raja Persia, lit sekalak dilaki gelarna Esra.*+ Ia anak Seraya,+ Seraya e anak Asaria, Asaria e anak Hilkia,+
2 Hilkia e anak Salum, Salum e anak Sadok, Sadok e anak Ahitup,
3 Ahitup e anak Amaria, Amaria e anak Asaria, Asaria+ e anak Merayot,
4 Merayot e anak Serahia, Serahia e anak Ussi, Ussi e anak Bukki,
5 Bukki e anak Abisua, Abisua e anak Pinehas,+ Pinehas e anak Eleasar,+ Eleasar e anak Harun. Harun+ eme imam kepala.
6 Esra reh arah Babilon nari. Ia sekalak penulis* si ahli bas Undang-Undang Musa+ eme undang-undang si bereken Jahwe Dibata Israel. Bere raja kerina si pindona sebap Jahwe Dibatana lit ras ia.
7 Piga-piga kalak Israel, imam-imam, kalak Lewi,+ penyanyi-penyanyi,+ penjaga gerbang,+ bage pe kalak si ngelayani bas rumah pertoton,*+ lawes ku Jerusalem bas tahun pepituken pemerentahen Raja Artasasta.
8 Reh Esra ku Jerusalem bas bulan pelimaken tahun pepituken pemerentahen raja e.
9 Bas wari pertama bulan si pertama, berkat ia arah Babilon janah seh ia i Jerusalem bas wari pertama bulan pelimaken, sebap Dibatana si mehuli lit ras ia.+
10 Enggo sikapken Esra pusuhna* mpelajari Undang-Undang Jahwe ras ndalankenca,+ bage pe guna ngajarken peraturen ras perentah si lit bas undang-undang e bas Israel.+
11 Enda me surat Raja Artasasta man Esra. Esra e sekalak imam ras penulis bage pe kalak si ahli* bas undang-undang ras perentah Jahwe si ibereken man kalak Israel. Isina:
12 * “Arah Artasasta+ raja kerina raja man Imam Esra sekalak penulis Undang-Undang Dibata si erkuasa i surga: Mejuah-juah.
13 Enggo kuperentahken maka kerina kalak Israel, imam-imam, bage pe kalak Lewi si lit bas daerah kekuasanku si atena mulih ku Jerusalem banci mulih ras kam.+
14 Aku ras pitu penasehatku enggo nuruh kam guna mastiken Undang-Undang Dibata si lit bas kam* idalanken ntah lang bas Juda bage pe Jerusalem.
15 Aku ras penasehat-penasehatku enggo mereken pirak ras emas jadi sumbangen sukarela. Babalah e man Dibata Israel si tading i Jerusalem.
16 Baba ka lah kerina pirak ras emas si alokenndu* arah kerina propinsi Babilon, radu ras sumbangen sukarela rakyat bage pe imam-imam guna rumah Dibata kalak e, si lit i Jerusalem.+
17 Alu sen enda mislah tukur lembu-lembu jantan,+ biri-biri jantan,+ anak biri-biri,+ bage pe persembahen biji-bijin*+ ras persembahen inemen.+ Persembahkenlah si e kerina bas ingan nutung* persembahen i rumah Dibatandu i Jerusalem.
18 “Sisa pirak ras emas e banci pakendu ras senina-seninandu guna kai pe si mehuli kapndu, bagi si ngena ate Dibatandu.
19 Kerina barang si ibereken man bandu si ipake guna ngelayani bas rumah Dibatandu, arus babandu ku lebe-lebe Dibatandu i Jerusalem.+
20 Janah keperlun si deban si arus berekenndu guna rumah Dibatandu, buatlah senna arah erta kerajan.+
21 “Aku, Raja Artasasta, enggo merentahken kerina bendahara si lit bas daerah sebelah barat Lau Eprat* gelah mis bereken kalak e kerina si pindo Esra.+ Esra e sekalak imam bage pe penulis Undang-Undang Dibata si erkuasa i surga.
22 Banci ibereken seh ngasa 3 ton 420 kilo* pirak, 16 ton* gandum, 2.200 liter* anggur,+ 2.200 liter* minak,+ bage pe sira+ asa kai perluna.
23 Lakokenlah alu semangat kerina perentah Dibata si erkuasa i surga kerna rumahNa,+ gelah Dibata la merawa man kalak si lit i daerah kekuasan raja bage pe man anak-anak raja.+
24 Kukataken ka man kena gelah ula pindo kena pajak*+ arah imam-imam, kalak Lewi, penyanyi-penyanyi ras kalak si main musik,+ penjaga gerbang, kalak si ngelayani bas rumah pertoton,*+ bage pe kalak si erdahin bas rumah Dibata.
25 “Kam Esra, gunakenlah kepentaren si datndu arah Dibatandu guna milih pejabat pengadilen bage pe hakim. Kalak e si ngadili kerina kalak si lit i daerah sebelah barat Lau Eprat, eme kerina kalak si meteh undang-undang Dibatandu. Ise pe si la meteh undang-undang e ajarken ka si e man bana.+
26 Ise pe si la matuhi Undang-Undang Dibatandu bage pe undang-undang raja, arus minter ihukum. Hukumenna eme ibunuh, ipelawes, idenda, ntah pe ipenjaraken.”
27 Terpujilah Jahwe Dibata nini bulangta, si erban tersuruh ukur raja erban mejile rumah Jahwe si lit i Jerusalem!+
28 Enggo cidahkenNa kekelengenNa si setia man bangku i lebe-lebe raja+ bage pe penasehat-penasehatna+ ras kerina pejabat-pejabat tinggina. Pang aku* perban Jahwe Dibataku lit ras aku, janah kupepulung peminpin-peminpin Israel lawes ras aku.
Cataten i teruh
^ Ertina “Penampat.”
^ Ntah “penyalin.”
^ Ntah “kalak Netinim.” As. “kalak si ibereken.”
^ Ntah “tekadken Esra bas pusuhna.”
^ Ntah “bage pe penyalin kata-kata.”
^ Esa 7:12 seh asa 7:26 aslina itulis bas bahasa Aram.
^ As. “bas tanndu.”
^ As. “si datndu.”
^ Ntah “daerah Trans-Eprat (Sebrang Lau).”
^ As. “100 bat.”
^ As. “100 bat.”
^ As. “100 kor.”
^ Bas bahasa aslina lit telu jenis pajak si imaksudken i jenda, eme pajak tiap kalak, pajak barang, ras pajak dalan.
^ Ntah “kalak Netinim.” As. “kalak si ibereken.”
^ Ntah “Kupegegehi bangku.”
