Esra 9:1-15
9 La ndekah kenca si e ilakoken, jumpai pejabat-pejabat aku janah nina, “Kalak Israel, imam-imam, ras kalak Lewi la misahken dirina arah kalak si lit i sekeliling negri enda bage pe arah perbahanen-perbahanen kalak e si ciga ate Dibata.+ Eme kalak Kanaan, kalak Het, kalak Peris, kalak Jebusi, kalak Ammon, kalak Moap, kalak Mesir,+ ras kalak Amori.+
2 Empoi kalak e singuda-nguda arah bangsa-bangsa e janah pejabuna anak-anakna si dilaki ras singuda-nguda arah bangsa-bangsa e.+ Gundari keturunen si badia+ enggo campur ras kalak si lit i sekeliling negri enda.+ Janah si tangtangna kel ngelakoken perbahanen si la setia e eme peminpin-peminpin ras pejabat-pejabat.”
3 Kenca kubegi kerna si e, mis kurigatken uisku ras rompiku si gedang, jenari kutarik bukku ras janggutku, janah kundul aku perban senggetna.
4 Kenca si e pulung kerina kalak i sekelilingku, eme kalak si ngergai* kata-kata Dibata Israel. Kalak e pulung perban perbahanen si la setia arah kalak si pernah itaban. Sanga si e kundul denga aku perban senggetna, seh ngasa ipersembahken persembahen pangan* karaben.+
5 Kenca enggo seh waktuna mpersembahken persembahen pangan karaben,+ kudungi puasaku janah tedis aku alu uis ras rompiku si enggo irigatken. Jenari sujud aku janah kuangkat tanku ku Jahwe Dibataku.
6 Ningku, “O Dibataku, mela kel kuakap. Emaka lanai kuakap aku cocok ertoto man baNdu, o Dibataku. Sebap kesalahen-kesalahen kami enggo ganjangen asa takal kami janah perbahanen kami si salah enggo seh ku langit.+
7 Mulai jaman nini bulang kami seh asa gundari, perbahanen kami si salah enggo seh kel belinna.+ Perban kesalahen kami, raja-raja kami, bage pe imam-imam kami, iserahken me kami kerina ku tan raja-raja negri si deban, ibunuh alu pedang,+ itaban,+ ijarah,+ ras ipermelaken seh asa gundari.+
8 O Jahwe Dibata kami, ntisik ngenca jadi ateNdu kami, alu mbebasken piga-piga kalak arah kami. Janah bereNdu kami ingan si aman bas ingan si badiaNdu,+ guna erban mata kami ersinar o Dibata kami, janah berekenNdu ka kami istrahat ntisik arah perbudaken kami.
9 Amin gia kami budak,+ la kami tadingkenNdu. Tapi cidahkenNdu kekelengenNdu si setia man kami i lebe raja-raja Persia,+ guna nelamatken kami gelah banci bangun kami mulihi rumahNdu si enggo runtuh,+ janah guna ngelindungi kami* i Juda ras Jerusalem.
10 “Tapi gundari, kenca si e kerina, o Dibata kami, uga narilah ning kami man baNdu? Sebap enggo tadingken kami perentah-perentahNdu,
11 si pesehNdu arah pelayan-pelayanNdu eme nabi-nabi. Nindu, ‘Negri si nandangi imasuki kena janah buat kena jadi jang kena e negri si najis, sebap penduduk negri e najis. Enggo dem ban kalak e kerina negri e alu kai si najis arah ujung ku ujung perban perbahanen kalak e si ciga ate Dibata.+
12 Emaka, ula bereken anak-anak kena si diberu iempoi anak-anak kalak ah si dilaki, bage pe ula bereken anak-anak kena si dilaki ngempoi anak-anak kalak ah si diberu.+ Ula pernah sampati kalak ah gelah dame ras makmur,+ alu bage banci kena reh gegehna janah pan kena hasil si mehuli arah negri enda ras warisken kena negri enda man anak-anak kena seh rasa lalap.’
13 O Dibata kami, gundari si enda kerina terjadi man kami perban kesalahen-kesalahen kami ras dosa-dosa kami si mbelin. La lakokenNdu man kami menurut kesalahen kami,+ tapi selamatkenNdu kami si lit i jenda.+
14 Uga maka banci langgar kami ka perentah-perentahNdu janah erjabu ras bangsa-bangsa si ngelakoken perbahanen si ciga ateNdu?+ Adi bage perbahanen kami, pasti merawa kel Kam man kami, dungna kernepkenNdu kami seh ngasa keri janah la lit sada pe si tading ntah pe selamat.
15 O Jahwe Dibata Israel, Kam benar kap,+ sebap kami si tading enda banci selamat seh ngasa gundari. Gundari, reh kami ku lebe-lebeNdu i bas keadan si erdosa. Situhuna, la lit hak kami reh ku lebe-lebeNdu sebap la kami setia ngelayani Kam.+
