Ester 1:1-22
1 Kejadin enda terjadi bas jaman Ahasweros.* Raja Ahasweros merentah 127 propinsi,+ mulai India nari seh ku Etiopia.*
2 Sanga si e, Raja Ahasweros merentah arah istanana si lit i Susan.*+
3 Bas tahun si peteluken ia merentah, banna pesta man kerina pejabat ras pelayanna. Kerina tentera Persia+ ras Media,+ bangsawan, bage pe pejabat propinsi, reh ku pesta e.
4 Lit 180 wari dekahna pamerken Ahasweros kebayaken kerajanna si seh kel hagana, bage pe kemulianna si mbelin ras si luar biasa.
5 Kenca dung pesta e, ban raja ka pesta man kerina kalak si lit bas Istana Susan,* la soal meganjang ntah lang pangkatna. Pesta e pitu wari dekahna, janah iban i taman si lit i halamen istana raja.
6 Halamen e iban hiasenna alu horden mbentar ras biru. Horden e iiket alu nali si iban arah uis mbentar ras wol si warnana ungu. Horden e igantungken bas gantungen pirak si ipasang i tiang-tiang marmar. Lit ka kursi-kursi si iban arah emas ras pirak nari. Kursi-kursi e itamaken i datas lante si iban arah batu megara, batu megara metua, ras batu ungu.
7 Anggur si man inemen iban bas cangkir-cangkir emas, janah tiap cangkir la seri bentukna. Seh kel buena anggur si ihidangken, janah raja ngenca si ngasup mereken si bage buena.
8 La lit peraturen ban raja, tiap kalak bebas minem asa kai pe buena. Enggo kataken raja man pegawai-pegawaina maka kai pe banci lakoken kalak e.
9 Ban Ratu Wasti+ ka pesta guna diberu-diberu si lit bas istana Raja Ahasweros.
10 Bas wari pepituken, sanga meriah kel ukur raja perban minem anggur, nina Raja Ahasweros man pitu pegawai istana si jadi pelayan pribadina, eme Mehuman, Bista, Harbona,+ Bigta, Abagta, Setar, ras Karkas,
11 gelah legi kalak e Ratu Wasti janah pakena mahkota kerajan, jenari ibaba ia ku lebe-lebe raja. Cidahken raja atena man jelma si enterem bage pe pejabat-pejabatna uga jilena Ratu Wasti e, perban la tanggung jilena ia.
12 Tapi sanga peseh kalak e perentah raja, Ratu Wasti lalap la nggit reh. Emaka, merawa kel raja.
13 Sungkuni raja me kalak si ngangkai peraturen* si lit paksa si e. (Adi lit masalah raja, ras kalak e me raja rusur arih-arih, perban kalak e ahli bas undang-undang bage pe kerna hukum.
14 Si rusurna sungkun raja eme Karsena, Setar, Admata, Tarsis, Meres, Marsena, ras Memukan. Pituna kalak e pejabat+ i Media ras Persia, jabaten kalak e me si meganjangna bas kerajan. Kalak e pituna bebas njumpai raja).
15 Nina raja man kalak e, “Ratu Wasti la matuhi perentah* si kupeseh arah pegawai-pegawai istana. Menurut undang-undang, kai si arus ilakoken man bana?”
16 Emaka nina Memukan man raja bage pe pejabat-pejabatna, “Labo man Raja saja ngenca Ratu Wasti ersalah,+ ia pe ersalah man kerina pejabat ras kalak si tading bas kerina propinsi si ikuasai Raja Ahasweros.
17 Sebap teh diberu-diberu si deban nge pagi kai si lakoken ratu e. Dungna, lanai pagi ergai kalak e perbulangenna, janah nina, ‘Ratu Wasti saja pe labo nggit reh sanga lebuh Raja Ahasweros.’
18 Bas wari enda pe, ndehara pejabat-pejabat Persia ras Media si meteh perbahanen ratu, mis ka nge kari bage nina kalak e ngerana man perbulangenna. Dungna, enterem perbulangen ras ndehara lanai siergan janah rubati.
19 Emaka, adi mehuli akapndu o Raja Ahasweros, banlah perentah maka Wasti lanai banci ngadap man bandu. Tuliskenlah perentah e bas undang-undang Persia ras Media gelah lanai banci iubah.+ Jabatenna selaku ratu, berekenndulah man diberu si deban si ulin asangken ia.
20 Emaka, kenca kerina kalak si lit bas daerah kekuasan Raja megi keputusen e, kerina ndehara pasti ngergai perbulangenna, la soal perbulangenna e kalak penting ntah pe kalak biasa.”
21 Pas kel akap raja ras pejabat-pejabatna kerna kai si kataken Memukan e. Emaka lakoken raja me bage.
22 Kirimken raja me surat ku kerina propinsi+ si ikuasaina. Tiap propinsi ndatken surat si iban bas tulisen bage pe bahasa si pake kalak e. Bas surat e ikataken maka tiap perbulangen arus jadi kepala bas rumah tanggana janah arus ia ngerana man anggota keluargana make bahasana sendiri.
Cataten i teruh
^ Mungkin si imaksud eme Serses I, anak Darius Agung (Darius Histaspis).
^ Ntah “Kus.”
^ Ntah “Susa.”
^ Ntah “Susa.”
^ Ntah “kebiasan.”
^ As. “perentah Raja Ahasweros.”
