Ester 2:1-23
2 Kenca si e, sanga lanai merawa Raja Ahasweros,+ ingetna kai si enggo lakoken Wasti+ bage pe keputusen si enggo iban man bana.+
2 Emaka nina pelayan-pelayan pribadi raja, “O Raja, banlah perentah guna ndarami singuda-nguda si mejile rupana.
3 Pilihndulah piga-piga kalak bas tiap propinsi si kuasaindu,+ gelah babana kerina singuda-nguda si mejile rupana ku ingan si khusus man diberu-diberu* si lit bas Istana Susan.* Suruhlah Hegai+ eme pejabat kerajan* si ngawasi diberu-diberu raja guna ngurus kalak e. Banlah kalak e reh jilena.
4 Kenca si e, apai pagi singuda-nguda si ngenana atendu, ia pagi si jadi ratu nggantiken Wasti.”+ Pas kel akap raja si kataken kalak e, janah banna bage.
5 Bas Istana Susan,*+ lit sekalak Jahudi si gelarna Mordekai.+ Ia arah suku Benyamin nari.+ Bapakna eme Jair, bapak Jair eme Simei, bapak Simei eme Kis.
6 Mordekai itaban ku Babilon radu ras kalak Jerusalem si debanna. Jekonia*+ raja Juda pe ikut itaban Nebukadnesar raja Babilon.
7 Ia si mpebelin Hadasa,* eme Ester, perban lanai lit mamakna ras bapakna. Ester e anak senina bapak Mordekai.+ Ia sekalak singuda-nguda si mejile rupana bage pe dagingna. Kenca enggo mate orang tuana, ban Mordekai ia jadi anakna.
8 Kenca umumken raja keputusenna e, enterem singuda-nguda ibaba ku Istana Susan.* Ester pe ikut ibaba ku je. Hegai si ngurus kalak e kerina.+ Hegai eme pejabat si ngawasi diberu-diberu raja.
9 Jadi kel ate Hegai nandangi Ester janah keleng kel atena ia. Emaka minter aturkenna pangan Ester janah urusna gelah reh jilena ia.+ Suruhna pitu singuda-nguda si terpilih arah istana raja jadi pelayan Ester. Pindahkenna ka Ester ras pelayan-pelayanna e ku ingan si mejilena, si lit bas ingan si khusus man diberu-diberu raja.*
10 La kataken Ester man ise pe kerna bangsana+ ntah pe keluargana, sebap enggo perentahken Mordekai+ gelah ula ceritakenna kerna si e.+
11 Tiap wari, erdalan-dalan Mordekai i deher halamen ingan si khusus man diberu-diberu raja,* guna meteh keadan Ester bage pe kai si terjadi man bana.
12 Bagi aturen si enggo iban man kalak e, 12 bulan dekahna kalak e iurus gelah reh jilena. Enem bulan dekahna kalak e make minak mur,*+ enem bulan ka make minak si iban arah sinuan-sinuan si merim,*+ bage pe erbage-bage minak si deban si erban kalak e reh jilena. Kenca enggo dung, ibaba sada per sada singuda-nguda e ku Raja Ahasweros menurut gilirenna.
13 Adi sekalak singuda-nguda enggo banci ibaba ku raja, kai pe si pindona sanga ndarat ia arah ingan si khusus man diberu-diberu raja,* ibereken man bana guna ibabana ku istana raja.
14 Bas berngi wari singuda-nguda e ngadap man raja, janah pepagina mulih ia ku ingan si deban si khusus ka man diberu-diberu raja. Ingan e iawasi Sahasgas, sekalak pejabat kerajan*+ si ngawasi diberu-diberu raja. Singuda-nguda e la banci ngadap raja mulihi adi la kin jadi ate raja nandangi ia, janah banci ia ngadap raja adi lebuh raja ia alu gelarna.+
15 Seh me giliren Ester anak Abihail ngadap raja. (Abihail eme senina bapak Mordekai. Ester enggo ban Mordekai jadi anak angkatna.)+ La pindo Ester kai pe selain si kataken Hegai, pejabat kerajan* si ngawasi diberu-diberu raja e. (Sedekah enda, kerina kalak si ngidah Ester jadi kel atena nandangi ia.)
16 Bas tahun si pepituken+ kenca Ahasweros jadi raja, bas bulan si pe-10-ken, e me bulan Tebet,* ibaba me Ester ngadap Raja Ahasweros ku istana kerajan.
17 Ester me si jadina kel ate raja ras si kelengna kel atena, asangken singuda-nguda si debanna. Ndauh ngenan ate raja man Ester asangken kerina diberu si deban. Emaka tamaken raja mahkota ku takal Ester janah jadikenna ia ratu+ nggantiken Wasti.+
18 Kenca si e, ban raja pesta si mbelin man Ester, janah undangna kerina pejabat ras pelayanna. Umumken raja maka piga-piga propinsi ndatken pembebasen.* Bagi-bagikenna ka hadiah perban seh kel ia bayakna.
19 Sanga singuda-nguda+ e ipepulung ka pedua kaliken, Mordekai sangana kundul i gerbang istana raja.*
20 La kataken Ester kai pe kerna keluargana bage pe bangsana+ bagi si perentahken Mordekai man Ester. Ester terus patuh man Mordekai, bagi sanga ras denga ia tading.+
21 Paksa Mordekai kundul i gerbang istana raja, lit dua pegawai raja si segat kel* atena Raja Ahasweros janah bunuhna atena raja. Gelarna Bigtan ras Teres, si dahinna njaga pintu kamar raja.
22 Tapi dungna teh Mordekai rencana kalak e, emaka mis katakenna man Ratu Ester. Jenari kataken Ester man raja kai si kataken Mordekai ndai.
23 Kenca iselidiki masalah e, kepeken tuhu bage. Igantung me kalak ndai duana i tiang. Kerina e itulis i lebe-lebe raja bas buku sejarah kerajan.+
Cataten i teruh
^ Ntah “ku harem.” Eme ingan diberu-diberu raja.
^ Ntah “Susa.”
^ Bas bahasa Heber, si imaksud eme kalak si ikebiri.
^ Ntah “Susa.”
^ Ertina “Sinuan-Sinuan Mirtel.”
^ Ntah “Susa.”
^ Ntah “bas harem.”
^ Ntah “halamen harem.”
^ As. “minak balsem.”
^ Ntah “arah harem.”
^ Bas bahasa Heber, si imaksud eme kalak si ikebiri.
^ Bas bahasa Heber, si imaksud eme kalak si ikebiri.
^ Mungkin maksudna pengurangen jumlah upeti, pengurangen dinas militer, ibebasken arah penjara, ntah pe gabungen arah si e kerina.
^ E bukti maka ia sekalak pegawai kerajan.
^ As. “Merawa kel.”
