Ester 4:1-17
4 Kenca teh Mordekai+ kerina si enggo terjadi,+ rigatkenna uisna, jenari pakena kain guni janah tamakenna abu ku takalna. Kenca si e, lawes ia ku tengah kota, janah nderkuh kel ia ngandung perban getem kel pusuhna.
2 Tapi ngayak gerbang istana raja ngenca ia erdalan, sebap ise pe si make kain guni la banci masuk ngelewati gerbang istana.
3 Bas tiap propinsi,+ erceda ate kel kerina kalak Jahudi si enggo megi perentah ras keputusen raja e. Erpuasa kalak e,+ tangis kalak e janah ngandung. Enterem si make kain guni janah pedemkenna bana i datas abu.+
4 Sanga pelayan-pelayan Ester si diberu ras pejabat-pejabatna* nceritaken kerna kai si terjadi, seh kel cedana ukur Ester. Kenca si e, kirimkenna uis man Mordekai gelah ula pakena kain guni, tapi la nggit Mordekai ngalokenca.
5 Emaka lebuh Ester me Hatah, salah sada pejabat kerajan* si suruh raja ngelayani Ester. Suruh Ester me Hatah nungkuni Mordekai kerna kai si enggo terjadi janah engkai maka bage.
6 Lawes Hatah njumpai Mordekai i tanah lapang si lit bas kota, i lebe-lebe gerbang istana raja.
7 Ceritaken Mordekai man Hatah kerina si enggo terjadi. Ceritakenna ka asa kai buena sen+ si janjiken Haman, si atena tamana ku bas kas kerajan guna munuh kerina kalak Jahudi.+
8 Bereken Mordekai ka man Hatah salinen surat keputusen raja si enggo iumumken i Susan.*+ Isi surat e gelah kerina kalak Jahudi ibunuh. Pindo Mordekai gelah bereken Hatah man Ester salinen surat e janah jelaskenna isina.+ Pindoken Mordekai ka gelah lawes Ester ngadap raja guna mindo perkuah atena janah langsung ia ngerana man raja guna kepentingen kalak Jahudi, eme bangsa Ester.
9 Mulihken Hatah ndahi Ester janah pesehna si kataken Mordekai.
10 Suruh Ester gelah kataken Hatah man Mordekai+ bagenda,
11 “Lit sada undang-undang si iteh kerina pelayan raja bage pe rakyat si lit bas propinsi si ikuasai raja: Adi lit dilaki ntah pe diberu si masuk ku halamen istana si arah bas,+ padahal ia la dilo raja, arus ia ihukum mate. Tapi banci ia tetap nggeluh adi dudurken raja tongkat emasna man bana.+ Tapi aku, enggo 30 wari aku la dilo raja.”
12 Sanga begi Mordekai kai si kataken Ester,
13 nina Mordekai man Ester, “Ula akapndu perban kam anggota keluarga raja, kam ngenca si la ibunuh arah kerina kalak Jahudi.
14 Adi sinik pe kam bas paksa si bagenda, reh nge pagi penampat man kalak Jahudi ntah i ja narilah gia,+ janah kalak Jahudi pasti selamat. Tapi kam ras keluarga bapakndu pasti mate. Banci saja guna nampati bangsandu nge maka kam jadi ratu.”+
15 Emaka nina Ester man Mordekai,
16 “Pepulunglah kerina kalak Jahudi si lit bas Susan* janah erpuasalah kena+ guna aku. Ula kena man ntah pe minem telu wari dekahna,+ suari ras berngi. Aku ras pelayan-pelayanku si diberu pe ikut nge pagi erpuasa. Kenca e, lawes aku ngadap raja amin gia e ngelanggar undang-undang. Adi mate pe pagi aku perban si e, mate pe labo dalih.”
17 Emaka lawes Mordekai janah lakokenna kerina si kataken Ester.
Cataten i teruh
^ Bas bahasa Heber, si imaksud eme kalak si ikebiri.
^ Bas bahasa Heber, si imaksud eme kalak si ikebiri.
^ Ntah “Susa.”
^ Ntah “Susa.”
