Ester 5:1-14
5 Bas wari si peteluken,+ pake Ester baju kerajanna janah tedis ia i halamen istana raja si arah bas, si lit i lebe-lebe istana raja. Paksa si e, raja sangana kundul i tahtana si pengalana ku pintu masuk istana.
2 Meriah ukur raja sanga idahna Ratu Ester tedis i halamen. Emaka dudurken raja tongkat emas+ si lit bas tanna ku Ester. Deheri Ester raja janah jemakna ujung tongkat e.
3 Nina raja man Ester, “Kai ndai atendu, Ratu Ester? Kai pemindonndu? Bicara pindondu pe seh ngasa setengah kerajanku enda, pasti kubereken man bandu!”
4 Ngaloi Ester, “Adi cocok akapndu Raja, reh min kam ras Haman+ bas wari enda, ku pesta si enggo kusikapken man bandu.”
5 Emaka iperentahken raja bagenda, “Kataken man Haman gelah minter ia reh, bagi si ipindoken Ester.” Emaka lawes raja ras Haman ku pesta si enggo sikapken Ester.
6 Sanga kalak e minem anggur bas pesta e, nina raja man Ester, “Kai kin sura-surandu? Pasti kubereken man bandu! Kai kin atendu si pindondu? Bicara pindondu pe seh ngayak setengah arah kerajanku enda, pasti kubereken man bandu!”+
7 Nina Ester, “Sura-suraku bage pe pemindonku eme,
8 adi cocok akapndu Raja janah adi meriah ukurndu, berekenndu min kai si kupindo janah lakoken min sura-suraku. Reh min kam pagi ras Haman ku pesta si kuban man kena. I je pagi kukataken pemindonku man bandu, Raja.”
9 Bas wari e, sanga Haman mulih, meriah kel ukurna janah senang kel akapna. Tapi sanga idahna Mordekai bas gerbang istana, merawa kel atena man Mordekai, sebap Mordekai la nggit tedis janah sitik pe la ia mbiar ngenen Haman.+
10 Tapi tahan Haman kel emosina janah mulih ia ku rumahna. Emaka lebuhna teman-temanna bage pe diberuna eme Seres.+
11 Pujiken Haman bana perban enterem anakna dilaki+ ras mbue kel ertana. Iceritakenna ka kerna uga pangkatna enggo inaikken raja, janah ban raja jabatenna si meganjangna asangken kerina pejabat bage pe pelayan raja.+
12 Nina Haman ka, “Labo e saja ngenca, la lit ise pe iundang Ratu Ester selain aku guna nemani raja ku pesta si ibanna e.+ Pagi pe undang ratu ka aku gelah ikut man ras ia bage pe raja.+
13 Tapi si e kerina lenga erban aku puas adi kuidah denga Mordekai kalak Jahudi ah ndai kundul bas gerbang istana.”
14 Emaka nina Seres diberu Haman bage pe kerina teman-temanna, “Banndulah tiang kira-kira 22 meter* ganjangna. Pagi erpagi-pagi, pindokenndulah man raja gelah Mordekai igantung bas tiang e.+ Kenca e berkat kam ras raja, ersenang-senanglah kam bas pesta e.” Cocok akap Haman kai si ikataken kalak e, emaka suruhna gelah iban tiang e.
