Ester 6:1-14
-
Mordekai ipehaga raja (1-14)
6 Bas berngi e, raja la banci tunduh. Emaka suruh raja gelah ibuat buku kerna cataten sejarah kerajan,+ janah ibacaken e man bana.
2 I je lit tertulis kerna Mordekai si ngelaporken Bigtan ras Teres, si atena munuh Raja Ahasweros.+ Kalak e duana eme pegawai kerajan si njaga pintu kamar raja.
3 Nungkun raja, “Enggo nge ibereken pengergan bage pe upah man Mordekai perban si lakokenna e?” Ngaloi pelayan-pelayan pribadi raja, “Lenga lit kai pe ibereken man bana.”
4 Nina raja, “Ise si lit bas halamen?” Rembang ka Haman enggo seh i halamen istana raja si arah darat.+ Ngerana atena man raja gelah Mordekai igantung bas tiang si enggo ibanna.+
5 Nina pelayan-pelayan raja man bana, “O Raja, Haman+ kap si sangana tedis i halamen.” Emaka nina raja, “Suruh ia ku bas.”
6 Sanga masuk Haman ku bas, nina raja man bana, “Lit sekalak jelma si kupehaga ateku. Kai nge si arus kulakoken man bana?” Nina Haman bas pusuhna, ‘Adi la kin aku, ise nari kin ate raja ipehagana?’+
7 Emaka nina Haman man raja, “Bagendalah ban man kalak si ipehagandu atendu:
8 Perentahkenndulah gelah buat kalak paken kerajan+ si biasa pakendu, bage pe kuda si biasa nangkihindu si enggo make hiasen kerajan.
9 Berekenlah paken ras kuda e man salah sada bangsawan kerajan si meganjangna pangkatna, gelah iurusna. Paken e arus ipakeken man kalak si atendu pehagandu, janah arus nangkihina kuda e i lapangen si lit i kota. Suruhndu ka kalak ersurak i lebe-lebena ngataken, ‘Bagenda me si lakoken raja man kalak si pehagana!’”+
10 Mis kataken raja man Haman, “Legi paken kerajan ras kuda, meter kam janah lakokenlah kerina si katakenndu ndai, lakoken e man Mordekai kalak Jahudi e, si sangana kundul i gerbang istana raja. Sada pe ula banndu tading.”
11 Emaka buat Haman kuda ras paken e, janah pakekenna man Mordekai.+ Nangkihi Mordekai kuda e janah arak-arak Haman ia i lapangen si lit bas kota janahna ersurak, “Bagenda me si lakoken raja man kalak si pehagana!”
12 Kenca si e, mulih Mordekai ku gerbang istana. Tapi Haman buru-buru mulih ku rumahna, tutupina takalna sebap mela kel akapna.
13 Sanga ceritaken Haman man diberuna eme Seres+ bage pe man kerina temanna kerna kai si terjadi man bana, nina penasehat-penasehatna bage pe Seres, “Gundari enggo ganjangen jabaten Mordekai asangken kam, adi kalak Jahudi kin ia, pasti talu kam adi lawanndu ia, labo kam banci menang.”
14 Sanga kalak e ngerana denga ras Haman, reh pegawai-pegawai raja ngelegi Haman, janah mis taruhkenna ia ku pesta si enggo ban Ester.+
