Ester 9:1-32
9 Bas wari pe-13-ken, bulan pe-12-ken, eme bulan Adar,*+ idalanken me perentah ras undang-undang raja.+ Bas wari e, ngarap kel musuh kalak Jahudi naluken kalak Jahudi, tapi sebalikna si terjadi. Taluken kalak Jahudi kalak si rate segat man bana.+
2 Pulung kalak Jahudi i kota-kota kalak e, si lit bas kerina propinsi si ikuasai Raja Ahasweros,+ guna munuh kalak si atena ncilakai kalak e. Ise pe la ngasup naluken kalak Jahudi, perban kerina bangsa enggo mbiar man kalak e.+
3 Kerina pejabat propinsi, kepala-kepala gubernur,+ gubernur-gubernur, bage pe kerina kalak si ngurus urusen raja, kerinana ikut ndukung kalak Jahudi sebap mbiar kalak e man Mordekai.
4 Enggo meganjang pangkat Mordekai+ bas istana raja. Terberita Mordekai bas kerina propinsi perban terus reh belinna kuasana.
5 Serang kalak Jahudi kerina musuhna, bunuhna ras kernepkenna alu pedang. Rate-ate kalak Jahudi man kalak si rate segat man bana.+
6 Lit 500 kalak si bunuh kalak Jahudi bas Istana Susan.*+
7 Bunuh kalak e ka Parsadata, Dalon, Aspata,
8 Porata, Adalia, Aridata,
9 Permasta, Arisai, Aridai, ras Waisata.
10 Sepuluhna kalak e ndai anak Haman si dilaki, Haman e anak Hamedata, musuh kalak Jahudi.+ Tapi kenca bunuh kalak Jahudi kalak e, la jarahna erta kalak e.+
11 Ilaporken man raja asa kai buena kalak si ibunuh bas wari e bas Istana Susan.*
12 Nina raja man Ratu Ester, “Adi bas Istana Susan* saja pe enggo lit 500 kalak si bunuh kalak Jahudi, janah sepuluhna anak Haman si dilaki pe enggo bunuhna, pasti lebihen asa si e si lakoken kalak Jahudi si lit bas propinsi si deban.+ Gundari, kai sura-surandu? Pasti kulakoken. Kai nari pemindonndu? Pasti nge kubereken.”
13 Ngaloi Ester, “Adi cocok akapndu Raja,+ ijinkenlah gelah undang-undang si gundari enggo lakoken kalak Jahudi si lit i Susan,* banci ka pagi lakoken kalak e.+ Perentahkenlah gelah sepuluhna mayat anak Haman si dilaki igantung bas tiang.”+
14 Emaka perentahken raja gelah e ilakoken. Undang-undang e iumumken i Susan,* janah igantung me sepuluhna mayat anak Haman.
15 Bas wari pe-14-ken bas bulan Adar,+ pulung ka kalak Jahudi i Susan* janah i je lit 300 kalak si bunuhna. Tapi la jarah kalak Jahudi erta kalak e.
16 Kalak Jahudi si lit bas propinsi si debanna pe pulung guna njaga dirina.*+ Taluken kalak e musuh-musuhna,+ bunuhna 75.000 kalak si rate segat man kalak e, tapi la lit erta si jarahna.
17 Si e kerina lakoken kalak e bas wari pe-13-ken bas bulan Adar. Bas wari pe-14-ken ngadi kalak e erperang janah banna wari e guna pesta man-man ras ermeriah ukur.
18 Kalak Jahudi si lit i Susan* pulung guna erperang bas wari pe-13-ken+ ras pe-14-ken.+ Bas wari pe-15-ken, ngadi kalak e erperang janah bas wari e banna pesta man-man ras ermeriah ukur.
19 Tapi kalak Jahudi si tading i kota-kota si ndauh arah Susan* erban pesta man-man ras ermeriah ukur bas wari pe-14-ken bulan Adar.+ Bas wari e bere kalak e ka panganna man sada ras si debanna.+
20 Kerina kejadin e itulisken Mordekai,+ kirimkenna ka surat-surat resmi man kerina kalak Jahudi, eme si lit bas kerina propinsi si ikuasai Raja Ahasweros, la soal ndeher ntah pe ndauh.
21 Bas surat e, iperentahken Mordekai gelah tiap tahun irayaken kalak e wari pe-14-ken ras wari pe-15-ken bas bulan Adar,
22 sebap bas wari e kalak Jahudi lanai erperang ngelawan musuh-musuhna, janah bas bulan e kalak Jahudi si rate ceda jadi ermeriah ukur bage pe si gulut ukurna+ jadi tenang. Emaka, arus rayaken kalak e wari e alu pesta man-man ras ermeriah ukur. Bas wari e, bereken kalak e ka panganna man sada ras si debanna, bage pe mere ku kalak si mesera.
23 Setuju kalak Jahudi guna terus ngerayaken perayan e tiap tahun, bage pe ngelakoken kai si itulisken Mordekai.
24 Haman+ anak Hamedata kalak Agak+ eme musuh kerina kalak Jahudi. Enggo ban Haman rencana jahat guna engkernepken kalak Jahudi,+ banna ka Pur+ eme undi guna erban kalak Jahudi mbiar bage pe guna engkernepken kalak e.
25 Tapi sanga Ester ndahi raja, ban raja perentah tertulis si isina:+ “Banlah rencana jahat si ban Haman man kalak Jahudi+ terjadi man bana.” Emaka Haman ras anak-anakna si dilaki igantung bas tiang.+
26 E me sebapna perayan e igelari Purim, si ibuat arah kata Pur.*+ Perban isi surat Mordekai ras kai si enggo idah kalak Jahudi bage pe kai si terjadi man kalak e,
27 tetapken kalak Jahudi gelah kerina kalak e ras keturunenna bage pe kerina kalak si ikut ras kalak e,+ arus ngerayaken perayan e tiap tahun dua wari dekahna. Janah tiap tahun arus lakoken kalak e kai si tulisken Mordekai man kalak Jahudi bas waktu si enggo itetapken.
28 Wari-wari e arus lalap iperingeti ras irayaken kerina keturunen arah tiap keluarga, tiap propinsi, bage pe tiap kota. Perayan Purim la banci imasapken kalak Jahudi janah perayan e arus terus iperingeti keturunenna.
29 Alu kuasa si lit bas Ratu Ester eme anak Abihail, bage pe kuasa si lit bas Mordekai kalak Jahudi e, ban kalak e surat si peduaken guna mpepaguh surat si pertama kerna Perayan Purim.
30 Ikirimken me surat-surat e man kerina kalak Jahudi, si lit bas 127 propinsi+ si ikuasai Raja Ahasweros.+ Surat e iban alu kata-kata si mehuli janah terteki
31 guna mpepaguh maka Perayan Purim si enggo itetapken e sah, bagi si iperentahken Mordekai kalak Jahudi e bage pe Ratu Ester.+ E sue ras peraturen si enggo itetapken kalak Jahudi man dirina bage pe man keturunenna.+ Kalak e ras keturunenna pe arus erpuasa+ ras ertoto.+
32 Perentah Ester e ngesahken kerna Perayan Purim,+ janah e itulisken bas sada buku.
Cataten i teruh
^ Ntah “Susa.”
^ Ntah “Susa.”
^ Ntah “Susa.”
^ Ntah “Susa.”
^ Ntah “Susa.”
^ Ntah “Susa.”
^ Ntah “guna nelamatken geluhna.”
^ Ntah “Susa.”
^ Ntah “Susa.”
