Galati 1:1-24
1 Aku, Paulus sekalak rasul si labo isuruh manusia ntah pe si lantik manusia. Aku ilantik Jesus Kristus+ ras Dibata eme Bapakta+ si enggo mpegeluh Jesus arah si mate nari.
2 Surat enda kutulis man runggun-runggun si lit i Galati. Kerina turang senina si lit ras aku kirim salam man kena.
3 Mbera-mbera aloken kena kiniulin si luar biasa ras kedamen arah Dibata nari eme Bapakta bage pe arah Tuan Jesus Kristus nari.
4 Korbankenna dirina guna dosa-dosata+ gelah banci selamatkenna kita arah doni* si jahat enda nari,+ sesuai ras peraten Dibata eme Bapakta.+
5 Mbera-mbera Dibata imuliaken seh rasa lalap. Amin.
6 Mamang kel teku ngenen kena perban pedas kel tadingken kena Dibata si enggo milih kena arah kiniulin Kristus si luar biasa, janah gundari aloken kena berita si meriah si deban.+
7 Situhuna, labo lit berita si meriah si deban, tapi lit piga-piga kalak si atena erban masalah+ ras kena alu ngubah berita si meriah kerna Kristus.
8 Tapi adi lit si mpeseh berita si meriah si deban si la seri ras berita si enggo peseh kami man kena, ia patut isumpahi, la soal ia arah kami nari ntah pe arah malekat i surga nari.
9 Bagi si enggo pernah kataken kami, sekali nari kukataken: Ise pe si mpeseh berita si meriah si deban si la seri ras si enggo aloken kena, ia patut isumpahi.
10 Situhuna ise kin si sangana kusenangken? Dibata ntah manusia? Adi kuusahaken denga erban manusia senang, aku labo budak Kristus.
11 O turang senina, ateku min gelah teh kena maka berita si meriah si kupeseh man kena labo arah manusia nari,+
12 sebap si mereken ras si ngajarkenca man bangku labo manusia, tapi Jesus Kristus si ngatakenca bangku.
13 Pasti enggo begi kena uga perbahanenku sanga aku bas agama Jahudi denga,+ mbarenda kusiksa runggun Dibata alu kejam, kuusahaken engkernepkenca.+
14 Bas ndalanken agama Jahudi ndauh aku lebihen asangken kerina teman sebayaku si sada bangsa ras aku, janah semangaten aku bas ndalanken adat nini bulangku.+
15 Tapi Dibata, si erban aku enggo lahir, lebuhNa aku perban kiniulinNa si luar biasa,+ janah meriah kapNa
16 nggunaken aku bas mberitaken berita si meriah man bangsa si deban, gelah tandai kalak e AnakNa.+ Sanga aku ilebuh, la kupindo pedah manusia si apai pe.
17 Labo aku lawes ku Jerusalem njumpai kalak si enggo leben jadi rasul asangken aku. Tapi lawes aku ku Arab, jenari mulihken ku Damaskus.+
18 Telu tahun kenca si e, lawes aku ku Jerusalem+ ndahi Kepas,*+ tading aku ras ia 15 wari dekahna.
19 Tapi la lit aku jumpa ras rasul-rasul si deban selain Jakup+ adek Tuan.
20 Kai si kutulisken enda tuhu. Ersumpah aku i lebe-lebe Dibata maka aku labo erbual.
21 Kenca si e lawes aku ku daerah Siria ras Kiliki.+
22 Tapi kalak si lit bas runggun-runggun i Judea si enggo ersada ras Kristus lenga pernah jumpa ras aku.
23 Kata-kata enda ngenca si begi kalak e, eme: “Dilaki si mbarenda nyiksa kita+ janah si atena engkernepken kinitekenta, gundari sangana mberitaken berita si meriah.”+
24 Emaka mulai muliaken kalak e Dibata perban aku.
