Galati 3:1-29
-
Bedana ndalanken Undang-Undang Musa ras erkiniteken (1-14)
-
Kalak si ngelakoken kai si benar tetap pagi nggeluh perban erkiniteken (11)
-
-
Perjanjin Abraham labo perban Undang-Undang Musa (15-18)
-
Keturunen Abraham, Kristus (16)
-
-
Asal mula ras tujun Undang-Undang Musa (19-25)
-
Jadi anak-anak Dibata perban erkiniteken (26-29)
-
Keturunen Abraham, kalak si jadi pengikut Kristus (29)
-
3 O kalak Galati si bodoh! Ise si enggo nipu kena maka bage jadina?+ La kin enggo jelas angkai kena kerna Jesus Kristus si ipakuken i tiang?*+
2 Sada ngenca penungkunenku: Perban ndalanken undang-undang nge maka aloken kena kesah si badia, ntah perban erkiniteken man kai si begi kena?+
3 Uga maka bage kel kena bodohna? Kenca ikutken kena kesah si badia, ikutken kena nge dungna perukuren manusia si la sempurna?+
4 Sia-sia kin melala kiniseran si enggo nanami kena? Tentu lang!
5 Situhuna, engkai maka berekenna kesah si badia man kena janah lakokenna melala perbahanen si luar biasa+ i tengah-tengah kena? Perban dalanken kena nge undang-undang ntah perban erkiniteken kena man kai si begi kena?
6 Si enda bagi Abraham si “erkiniteken man Jahwe,* emaka perban kinitekenna e, ia ianggap kalak si benar.”+
7 Pasti teh kena maka anak-anak Abraham kalak si erkiniteken.+
8 Enggo leben tertulis bas sada ayat maka kalak arah bangsa si deban nari ikataken Dibata pagi benar perban erkiniteken, janah berita si meriah e leben ipeseh man Abraham, eme, “Ipasu-pasu pagi kerina bangsa arah kam.”+
9 Emaka kerina kalak si erkiniteken ipasu-pasu bagi Abraham si erkiniteken.+
10 Kena sumpah pagi kerina kalak si tek man undang-undang, sebap lit tertulis, “Kena sumpah pagi kalak si la terus ndalanken kerina si tertulis bas Undang-Undang Musa.”+
11 Selain si e, jelas kel maka labo lit ise pe si kataken Dibata+ benar perban ndalanken undang-undang, perban “kalak si ngelakoken kai si benar, tetap pagi nggeluh perban erkiniteken.”+
12 Labo ise pe ipaksa Undang-Undang Musa gelah erkiniteken, sebap lit tertulis, “Ise pe si ndalanken undang-undang e, nggeluh perban undang-undang e.”+
13 Enggo tukur Kristus kita.+ Bebaskenna kita+ arah hukumen Undang-Undang Musa alu njadiken dirina selaku kalak si isumpahi, sebap lit tertulis, “Tiap kalak si ipakuken bas tiang,* kena sumpah Dibata.”+
14 Si e terjadi gelah arah Kristus Jesus,+ aloken bangsa-bangsa si deban pagi pasu-pasu si enggo ijanjiken man Abraham. Alu bage, perban erkiniteken sialoken kesah si badia si ijanjiken e.+
15 O turang senina, kuban sada contoh arah kegeluhenta tiap wari: Perjanjin si enggo isahken, amin pe isahken sekalak jelma ngenca, si enda la banci ibatalken ntah pe itambahi ise pe.
16 Dibata enggo erjanji man Abraham bage pe man keturunenna.+ Ayat e labo ngataken “man keturunen-keturunenndu,” tempa-tempa man enterem jelma. Tapi ikataken “man keturunenndu,” maksudna man sada kalak saja ngenca eme Kristus.+
17 Kukataken ka man kena: Undang-Undang Musa si ibereken 430 tahun kenca si e,+ labo erban perjanjin si enggo ban Dibata jadi batal ntah pe imasapken.
18 Adi warisen e ibereken perban undang-undang, emaka warisen e lanai ibereken perban janji. Tapi alu kiniulinNa, bereken Dibata warisen e man Abraham perban janji.+
19 Man kai Undang-Undang Musa e? Undang-undang e itambahken guna ncidahken perbahanen si salah+ seh asa reh keturunen si ngaloken janji e.+ Undang-undang e ibereken arah malekat-malekat,+ janah ipeseh malekat-malekat e arah sekalak perantara.+
20 Sekalak perantara labo iperluken adi sada pihak ngenca si ikut bas perjanjin e, tapi bas si e, Dibata sada kap ngenca.
21 Jadi, erlawanen kin Undang-Undang Musa ras janji-janji Dibata? Tentu lang! Adi lit sada undang-undang si mereken kegeluhen, sekalak jelma banci ikataken benar alu ndalanken undang-undang e.
22 Tapi iban Kitap si Badia maka kerina kalak jadi tabanen dosa, alu bage kalak si ngaloken janji Dibata eme kap kalak si erkiniteken man Jesus Kristus.
23 Sope kita erkiniteken man Kristus, kita ilindungi undang-undang janah itaban dosa, sanga si e, sitimailah kai si nandangi cidahken Dibata.+
24 Emaka Undang-Undang Musa me si negu-negu kita ku Kristus+ gelah banci kita ikataken benar perban erkiniteken.+
25 Tapi gundari, kenca lit kiniteken e,+ lanai kita itegu-tegu si negu-negu e.+
26 Kena kerina situhuna anak-anak Dibata+ perban erkiniteken man Kristus Jesus.+
27 Kerina kena si iperidiken bas Kristus enggo bagi Kristus.+
28 Lanai lit bedana kalak Jahudi ras kalak Junani,+ budak ras kalak si bebas,+ dilaki ras diberu,+ perban kerina kena enggo jadi sada perban ersada ras Kristus Jesus.+
29 Selain si e, adi kena jadi pengikut Kristus, kena tuhu-tuhu keturunen Abraham+ janah banci aloken kena warisen+ si ijanjiken.+
