Galati 5:1-26
5 Bebasken Kristus kita gelah banci sinanami kebebasen si bage. Emaka, tedislah alu paguh+ janah ula sempat kena iperbudak mulihi.+
2 Aku Paulus, kukataken man kena maka adi kena isunat, kai si lakoken Kristus lanai lit gunana man kena.+
3 Sekali nari kubereken kesaksin man tiap kalak si atena isunat maka arus dalankenna kerina Undang-Undang Musa.+
4 Adi usahaken kena gelah ikataken benar alu undang-undang,+ kena terpisah kap arah Kristus nari janah enggo tadingken kena kiniulinna si luar biasa.
5 Tapi adi kita, sitimai gelah ikataken benar alu kesah si badia ras kiniteken.
6 Si pentingna man kalak si ersada ras Kristus Jesus, labo isunat ntah lang,+ tapi kiniteken si ibuktiken alu kekelengen.
7 Mbarenda mehuli perbahanen kena.*+ Ise kin si ngambati kena maka gundari lanai ikutken kena kebenaren?
8 Ajaren si bage rehna labo arah Dibata si ngelebuh kena.
9 Sitik ragi banci erban tepung si enggo iaduk jadi kembang.+
10 Tek aku maka kena si ersada ras Tuan+ pasti setuju. Tapi kalak si ndarami masalah ras kena,+ ise pe ia, alokenna pagi hukumen si patut man bana.
11 O turang senina, adi kuberitaken denga kerna sunat, la mungkin aku isiksa, janah labo lit kalak si tertuktuk man ajarenku kerna kematen Jesus i tiang siksan.*+
12 Ngarap aku gelah kalak si atena erban kena ndabuh, kebirina pagi dirina.*
13 O turang senina, kena enggo ilebuh guna ibebasken, tapi ula pake kena kebebasen e jadi kesempaten guna ndalanken sura-sura daging si erdosa.+ Tapi, layanilah sada ras si debanna perban kekelengen.+
14 Kerina Undang-Undang Musa ipersada* bas sada perentah enda: “Arus kelengindu kalak si deban bagi kam engkelengi dirindu.”+
15 Adi terus sakiti kena janah serang kena sada ras si debanna,+ hati-hatilah gelah la kernepken kena sada ras si debanna.+
16 Tapi kukataken: Teruslah ikuti penegu-negu kesah si badia,+ alu bage la ikutken kena sura-sura daging.+
17 Sebap sura-sura daging si erdosa erlawanen kap ras kesah si badia, janah kesah si badia erlawanen ras daging si erdosa. Perban si dua enda erlawanen, la lakoken kena kai si ate kena ilakoken kena.+
18 Selain si e, adi kena itegu-tegu kesah si badia, la kena nggeluh menurut undang-undang.
19 Jelas kap teridah hasil perbahanen daging, eme perbahanen seks si salah,*+ kai pe si najis, perbahanen si la meteh mela,*+
20 nembah berhala, kai pe si lit hubungenna ras malekat jahat,*+ simusuhen, rubati, cemburu, merawa, erjengil, perpecahen, sekte-sekte,*
21 rate cian, mabuk,+ pesta pora, ras kerina si bage.+ Sekali nari kupersingeti kena kerna si e, bagi si enggo pernah kulakoken: Kalak si terus ngelakoken si e kerina, la banci warisina Kerajan Dibata.+
22 Tapi sipat-sipat si hasilken kesah si badia eme kekelengen, keriahen ukur, kedamen, kesabaren, kiniulin, bujur,+ kiniteken,
23 lembut, ras ngasup nguasai diri.+ La lit undang-undang si erlawanen ras si e kerina.
24 Kalak si jadi pengikut Kristus Jesus enggo matekenna* kerina napsu ras sura-sura dagingna si erdosa.+
25 Adi kita nggeluh sesuai ras penegu-negu kesah si badia, teruslah lakoken kai si sesuai ras penegu-negu kesah si badia.+
26 Ula min kita sombong,+ ersaing,+ ntah pe sician-cianen.
Cataten i teruh
^ As. “Mbarenda kena kiam alu mehuli.”
^ Ntah “jadi kalak si la banci erjabu,” alu bage lanai ia ncukupi syarat guna ndalanken undang-undang si dukungna.
^ Ntah banci saja “kesimpulenna.”
^ As. “pakukenna i tiang.”
