Hagai 1:1-15
1 Bas tahun si peduaken pemerentahen Raja Darius, bas bulan si peenemken, wari si pertama bas bulan e, reh kata Jahwe arah Nabi Hagai*+ man gubernur Juda eme Serubabel+ anak Sealtiel bage pe man Imam si Mbelin Josua anak Jehosadak, nina,
2 “Bagenda nina Jahwe penguasa malekat, ‘Nina bangsa enda, “Lenga seh waktuna mbangun* rumah* Jahwe.”’”+
3 Reh ka kata Jahwe arah Nabi Hagai,+ nina,
4 “Gundari kin waktuna kena tading bas rumah si ilapisi kayu si mejile, padahal rumah enda hancur denga?+
5 Emaka bagenda nina Jahwe penguasa malekat, ‘Perdiatekenlah kai si lakoken kena.
6 Amburken kena melala benih tapi sitik ngenca perani kena.+ Man kena tapi la kena besur. Minem kena tapi la kena puas. Ruis kena tapi bergehen denga. Kalak si erdahin pe tamana upahna bas kantong si pultak-pultak.’”
7 “Bagenda nina Jahwe penguasa malekat, ‘Perdiatekenlah kai si lakoken kena.’
8 “Nina Jahwe, ‘Laweslah ku gunung, buatlah kayu.+ Bangunlah rumahKu+ gelah meriah ukurKu ngidahsa janah imuliaken Aku.’”+
9 “Nina Jahwe penguasa malekat, ‘Ngarap kena melala hasil peranin si dat kena, tapi sitik ngenca si dat kena. Baba kena e ku rumah, tapi Kusempulken ngasa keri.+ Engkai? Sebap rumahKu hancur, tapi kena masing-masing sibuk ngurus rumah kena.+
10 Emaka remang lanai nusur arah langit nari, taneh lanai mereken hasil.
11 Taneh ras gunung-gunung kena lalap Kuban kerah, emaka kurang biji-bijin,* anggur, minak, ras sinuan-sinuan kena. Kena ras asuh-asuhen kena rate mesui, kerina kerja keras kena sia-sia.’”
12 Serubabel+ anak Sealtiel,+ Imam si Mbelin Josua anak Jehosadak,+ ras kerina bangsa e patuh man kata-kata Jahwe Dibata kalak e bage pe man kata-kata Nabi Hagai, sebap Jahwe Dibata kalak e enggo ngutus Hagai. Emaka mulai bangsa e mbiar man Jahwe.
13 Kenca si e, Hagai utusen Jahwe mpeseh berita enda man bangsa e bagi perentah Jahwe: “Nina Jahwe, ‘Aku kap ras kena.’”+
14 Emaka ban Jahwe tersuruh ukur+ gubernur Juda+ eme Serubabel anak Sealtiel bage pe Imam si Mbelin Josua+ anak Jehosadak ras kerina bangsa e, janah mulai kalak e erdahin bas rumah Jahwe penguasa malekat, Dibata kalak e.+
15 Enda terjadi bas wari si pe-24-ken, bulan si peenemken, bas tahun si peduaken pemerentahen Raja Darius.+
Cataten i teruh
^ Ertina “Lahir bas Wari Perayan.”
^ Ntah “mbangun mulihi.”
^ Ntah “rumah pertoton.”
