Hagai 2:1-23
2 Bas bulan si pepituken, wari si pe-21-ken bas bulan e, ngerana Jahwe arah Nabi Hagai,+ nina,
2 “Sungkunlah gubernur Juda+ eme Serubabel+ anak Sealtiel, bage pe Imam si Mbelin Josua+ anak Jehosadak,+ ras kerina bangsa e,
3 ‘Ise arah kena si pernah idahna uga muliana rumah* e mbarenda?+ Gundari uga idah kena rumah e? Adi bandingken ras si mbarenda, me tempa labo lit ertina si gundari e?’+
4 “Nina Jahwe, ‘O Serubabel, pegegehilah dirindu. O Imam si Mbelin Josua anak Jehosadak, pegegehilah dirindu.’
“Nina Jahwe ka, ‘O umatKu, pegegehilah diri kena+ janah dahikenlah.’
“‘Sebap Aku kap ras kena,’+ nina Jahwe penguasa malekat.
5 ‘Ingetlah kai si enggo Kujanjiken man kena sanga kena ndarat arah Mesir nari,+ gundari pe tetap nge kena Kutegu-tegu alu kuasaKu.+ Emaka ula kena mbiar.’”+
6 “Bagenda nina Jahwe penguasa malekat, ‘Sekali nari, lanai ndekah, Kuugur langit ras doni bage pe laut ras daraten.’+
7 “Nina Jahwe penguasa malekat, ‘Kuugur pagi kerina bangsa, masuk pagi erta si merga+ arah kerina bangsa ku rumah e. Kudemi pagi rumah enda alu kemulian.’+
8 “Nina Jahwe penguasa malekat, ‘Kerina pirak ras emas, Aku kap punana.’
9 “Nina Jahwe penguasa malekat, ‘Belinen pagi kemulian rumah enda asangken si mbarenda.’+
“‘Kubereken pagi dame ku ingan enda,’+ nina Jahwe penguasa malekat.”
10 Bas wari si pe-24-ken bulan si pesiwahken tahun si peduaken pemerentahen Darius, reh kata Jahwe man Nabi Hagai,+ nina,
11 “Bagenda nina Jahwe penguasa malekat, ‘Sungkunlah imam-imam kerna undang-undang:+
12 “Adi lit kalak maba daging si badia tare jubahna, janah kena jubahna e ku roti, ntah sop, ntah lau anggur, ntah minak, ntah pangan kai pe, badia nge dungna pangan e?”’”
Nina imam-imam e njawapsa, “Lang!”
13 Kenca si e nina Hagai ka, “Gundari adi lit kalak si najis perban njemak mayat, nce jemakna ka pangan e, najis ka nge dungna pangan e?”+
Nina imam-imam e njawapsa, “Ue, najis dungna pangan e.”
14 Emaka nina Hagai, “‘Bage kap umat enda ras bangsa enda i lebe-lebeKu. Bage kap kerina hasil tan kalak e. Kai pe si persembahken kalak e najis,’ nina Jahwe.
15 “‘Tapi gundari, mulai wari enda, tuhu-tuhulah perdiateken: Sope rumah pertoton Jahwe mulai ibangun mulihi,+
16 uga nge keadanna? Sanga ngarap kalak muat 20 guni biji-bijin,* 10 guni ngenca lit. Sanga reh kalak ku ingan meras anggur muat 50 botol lau anggur, 20 botol ngenca lit.+
17 Kuserang sinuan-sinuan kena eme kerina si dahiken tan kena, alu angin si seh kel lasna ras hama jamur+ bage pe udan es, tapi la lit sekalak pe arah kena mulihken ku Aku,’ nina Jahwe.
18 “‘Mulai wari enda tuhu-tuhulah perdiateken, mulai wari si pe-24-ken bulan si pesiwahken, eme bas wari pondasi rumah pertoton Jahwe ipajekken.+ Perdiatekenlah:
19 Lit denga kin benih bas gudang-gudang?+ Me lenga erbuah batang anggur, batang ara, batang delima, ras batang saitun? Mulai wari enda, Kupasu-pasu kam.’”+
20 Ngerana ka Jahwe pedua kaliken man Hagai bas wari si pe-24-ken bas bulan e,+ nina,
21 “Kataken man Serubabel eme gubernur Juda, ‘Kuugur pagi langit ras doni.+
22 Kuruntuhken pagi tahta kerajan-kerajan, Kumasapken gegeh kerajan bangsa-bangsa.+ Kutunggalingken gereta-gereta perang ras kalak si mabasa. Kerina kuda mate janah kalak si nangkih kuda e sibunuhen alu pedang.’”+
23 “Nina Jahwe penguasa malekat, ‘O pelayanKu Serubabel+ anak Sealtiel,+ Kulebuh pagi kam, Kuban pagi kam bagi cincin si merga. Sebap kam kap si enggo Kupilih,’ nina Jahwe. Enda ndai me kata si ipeseh Jahwe penguasa malekat.”