Hakim-Hakim 1:1-36
1 Kenca mate Josua,+ pindo bangsa Israel petunjuk man Jahwe,+ nina, “Si apai arah kami si leben berkat ngelawan kalak Kanaan?”
2 Nina Jahwe, “Suku Juda si leben.+ Aku pagi merekenca* negri e ku tanna.”
3 Kenca si e nina suku Juda man seninana suku Simeon, “Ikutlah kena ku daerah kami+ ngelawan kalak Kanaan. Kenca si e ikut ka pagi kami ku daerah kena.” Emaka ikut suku Simeon ras kalak e.
4 Sanga erperang suku Juda, serahken Jahwe kalak Kanaan ras kalak Peris ku tan kalak e.+ Taluken kalak e 10.000 kalak i Besek.
5 Jumpa kalak Juda ras Adonibesek i Besek, ilawan kalak e ia janah taluken kalak e kalak Kanaan+ ras kalak Peris.+
6 Sanga kiam Adonibesek, ayaki kalak e ia janah tangkapna, jenari potong kalak e jempol tanna ras jempol nahena.
7 Nina Adonibesek, “Lit 70 raja si jempol tanna ras jempol nahena kupotong janah pungutina rimah-rimah i teruh mejaku. Gundari ban Dibata man bangku bagi si enggo kulakoken.” Kenca si e, baba kalak e ia ku Jerusalem,+ janah mate ia i je.
8 Kenca si e, serang kalak Juda Jerusalem+ janah rebutna kota e. Serangna kota e alu pedang jenari tutungna.
9 Kenca si e, serang kalak Juda kalak Kanaan si tading i daerah pegunungen, bage pe si lit i daerah Negep* ras Sepela.+
10 Serang suku Juda kalak Kanaan si tading i Hebron (mbarenda Hebron igelari Kiryat Arba), janah taluken kalak e Sesai, Ahiman, ras Talmai.+
11 I je nari, lawes kalak e nyerang penduduk Debir.+ (Mbarenda Debir igelari Kiryat Seper.)+
12 Jenari nina Kalep,+ “Ise pe si berhasil nyerang Kiryat Seper ras ngerebutsa, kubereken pagi anakku Aksah jadi diberuna.”+
13 Si ngerebutsa eme Otniel+ anak Kenas.+ Kenas e adek Kalep. Emaka berena Aksah jadi diberuna.
14 Sanga lawes Aksah ku rumah dilakina, lalap suruhna dilakina e mindo juma man bapakna.* Kenca si e nusur Aksah arah keledena nari.* Jenari nungkun Kalep man bana, “Kai atendu, Nakku?”
15 Nina Aksah ngaloi, “Adi tuhu kin pasu-pasundu aku, bereken min hadiah man bangku. Enggo berekenndu sada lambar taneh i selatan,* bereken ka min man bangku Gulot-maim.”* Emaka bereken Kalep man bana Gulot Datas ras Gulot Teruh.
16 Keturunen mama Musa+ eme kalak Keni+ lawes arah kota batang kurma+ radu ras kalak Juda ku Taneh Mesawang* Juda i sebelah selatan Arat.+ Tading kalak e i je ras pendudukna.+
17 Tapi suku Juda ras seninana suku Simeon terus maju janah serang kalak e kalak Kanaan si tading i Sepat janah hancurkenna kota e.+ Emaka igelari kalak e kota e Horma.*+
18 Kenca si e, rebut kalak Juda me Gasa+ ras daerahna, Askelon+ ras daerahna, bage pe Ekron+ ras daerahna.
19 Lalap arak-arak Jahwe kalak Juda, janah rebut kalak e daerah pegunungen. Tapi la banci pelawes kalak Juda kalak si tading i lembah, perban lit gereta perang kalak e si ersabi-sabi besi.*+
20 Bereken kalak e Hebron man Kalep bagi si enggo ijanjiken Musa,+ janah enggo pelawes Kalep telu anak Enak+ arah je nari.
21 Tapi la pelawes kalak Benyamin kalak Jebusi si tading i Jerusalem. Emaka kalak Jebusi terus tading ras kalak Benyamin i Jerusalem seh ngasa gundari.+
22 Sanga si e, lawes keturunen Jusup+ nyerang Betel, janah arak-arak Jahwe kalak e.+
23 Mata-matai keturunen Jusup kota Betel (mbarenda kota e gelarna Lus),+
24 jenari idah mata-mata e sekalak dilaki ndarat arah kota e janah ning kalak e man bana, “Tuduhken min man kami dalan ku kota e. Adi tuduhkenndu, pasti kari mehuli kami* man bandu.”
25 Emaka tuduhken dilaki e dalan ku kota e, jenari serang kalak e kota e alu pedang, tapi bebasken kalak e dilaki ndai ras kerina keluargana.+
26 Jenari lawes dilaki e ku taneh kalak Het, kenca si e bangunna sada kota i je janah banna gelar kota e Lus, e me gelar kota e seh asa gundari.
27 La rebut kalak Manase Bet Sean, Taanak,+ bage pe kota-kota si lit i sekelilingna. La pelawes kalak e penduduk Dor, Ibleam, Megido, bage pe kota-kota si lit i sekelilingna.+ Kalak Kanaan la nggit lawes arah negri e, tetap kalak e tading i je.
28 Kenca kalak Israel reh gegehna, suruh kalak e kalak Kanaan kerja paksa+ tapi la kerina kalak e pelawes kalak Israel.+
29 Kalak Eperaim pe la mpelawes kalak Kanaan si tading i Geser. Kalak Kanaan tetap tading ras kalak e i Geser.+
30 Kalak Sebulon pe la pelawesna penduduk Kitron ras penduduk Nahalol.+ Emaka kalak Kanaan terus tading ras kalak Sebulon janah suruh kalak Sebulon kalak e kerja paksa.+
31 La pelawes kalak Aser kalak Akko, Sidon,+ Ahlab, Aksip,+ Helba, Apik,+ ras Rehop.+
32 Emaka kalak Aser terus tading ras kalak Kanaan si lit i negri e perban la pelawes kalak Aser kalak e.
33 La pelawes kalak Naptali penduduk Bet-Semes ras penduduk Bet-Anat,+ terus kalak e tading ras penduduk Kanaan si lit i negri e.+ Ipaksa kalak e penduduk Bet-Semes ras penduduk Bet-Anat erdahin man kalak e.
34 La pediat kalak Amori kalak Dan ndarat arah daerah pegunungen nari. La pediat kalak e kalak Dan nusur ku lembah.+
35 Kalak Amori la nggit lawes arah Gunung Heres, arah Ayalon,+ ras Salbim nari.+ Tapi kenca keturunen Jusup reh gegehna, isuruh kalak e kalak Amori kerja paksa.
36 Daerah kalak Amori mulai arah dalan nangkeng Akrabim,+ janah mulai arah daerah Sela seh ku datas.
Cataten i teruh
^ Ntah “Enggo Kubereken.”
^ Ntah “Selatan.”
^ Maksudna, Kalep.
^ Ntah banci saja “Kenca si e ertepuk Aksah sanga i datas kelede.”
^ Ntah “Negep.”
^ Ertina “Taneh si Melala Launa.”
^ Taneh si mbelang si jarang iingani.
^ Ertina “Ikhususken guna Ikernepken.”
^ As. “gereta perang kalak e arah besi.”
^ As. “pasti cidahken kami kari kekelengen si setia.”
