Hakim-Hakim 10:1-18
10 Kenca Abimelek, si mbebasken kalak Israel eme Tola anak Puah, kempu Dodo kalak Isakar.+ Ia tading i Samir i daerah pegunungen Eperaim.
2 Lit 23 tahun dekahna ia jadi hakim i Israel. Kenca si e mate ia janah ikuburken i Samir.
3 Kenca ia, si jadi hakim bas Israel eme Jair kalak Gileat. Lit 22 tahun dekahna ia jadi hakim bas Israel.
4 Lit 30 anakna dilaki si nangkih 30 kelede, janah lit 30 kota kalak e si igelari Hawot Jair+ seh asa gundari. Kalak e tading i Gileat.
5 Kenca si e mate Jair janah ikuburken i Kamon.
6 Mulihi lakoken kalak Israel kai si jahat menurut Jahwe,+ janah mulai layani kalak e Baal,+ patung-patung Astarte, dibata-dibata Siria,* dibata-dibata Sidon, dibata-dibata Moap,+ dibata-dibata kalak Ammon,+ ras dibata-dibata kalak Pilisti.+ Tadingken kalak e Jahwe janah lanai layani kalak e Ia.
7 Kenca si e merawa kel Jahwe man kalak Israel, janah serahkenNa* kalak e ku tan kalak Pilisti ras kalak Ammon.+
8 Emaka serangna kalak Israel janah tindasna. Lit 18 tahun dekahna itindas kalak e kerina kalak Israel si lit i sebrang Lau Jordan si mbarenda daerah kalak Amori i Gileat.
9 Kalak Ammon pe nyebrangi Lau Jordan guna ngelawan suku Juda, Benyamin, ras Eperaim. Emaka susah kel akap kalak Israel.
10 Kenca si e pindo kalak Israel penampat man Jahwe,+ nina, “Enggo erdosa kami man baNdu, perban enggo tadingken kami Kam Dibata kami, janah sembah kami Baal.”+
11 Tapi nina Jahwe man kalak Israel, “La kin enggo Kuselamatken kena arah Mesir nari,+ arah kalak Amori,+ kalak Ammon, kalak Pilisti,+
12 kalak Sidon, kalak Amalek, ras kalak Midian sanga tindasna kena? Sanga pindo kena penampat man bangKu, Kuselamatken kena arah tan kalak e.
13 Tapi tadingken kena Aku janah sembah kena dibata-dibata si deban.+ E me sebapna lanai Kuselamatken kena.+
14 Laweslah kena ku dibata-dibata si pilih kena janah pindolah penampat man bana.+ Ia sajalah ban nelamatken kena sanga kena susah.”+
15 Tapi nina kalak Israel man Jahwe, “Enggo erdosa kami. Lakokenlah man kami kai pe si mehuli akapNdu. Mindo kel kami bas wari enda, selamatken min kami.”
16 Kenca si e ambekken kalak e patung dibata-dibata asing kalak e janah sembah kalak e Jahwe,+ emaka lanai Ia tahan ngenen kesusahen kalak Israel.+
17 Bas pudi wari, pulung kalak Ammon+ janah erkemah kalak e i Gileat. Kalak Israel pe pulung janah erkemah i Mispa.
18 Penduduk Gileat ras peminpin-peminpinna ngerana sada ras si debanna, nina, “Ise kari si minpin kita sanga erperang ras kalak Ammon,+ ia kari si jadi peminpin kerina penduduk Gileat.”
