Hakim-Hakim 12:1-15
12 Kenca si e pulung kalak Eperaim janah nyebrang kalak e ku Sapon* jenari ning kalak e man Jepta, “Engkai maka la dilondu kami sanga lawes kam ngelawan kalak Ammon?+ Emaka tutung kami kari kam radu ras rumahndu.”
2 Tapi nina Jepta man kalak e, “Aku ras anak buahku terlibat bas peperangen si mbelin ngelawan kalak Ammon. Kupindo nge penampat kena, tapi la kena nggit nelamatken aku arah tan kalak e.
3 Kenca kuteh la kena nggit nelamatken aku, kupertaruhken kesahku janah lawes aku ngelawan kalak Ammon,+ dung e serahken Jahwe kalak e man bangku. Gundari, engkai maka reh kena ngelawan aku?”
4 Kenca si e pepulung Jepta kerina kalak Gileat,+ jenari serang kalak e kalak Eperaim. Taluken kalak Gileat kalak Eperaim si mbarenda ngataken, “O kalak Gileat si lit i Eperaim ras Manase, kena labo erguna man kalak Eperaim.”*
5 Rebut kalak Gileat daerah penyebrangen i Lau Jordan+ janah timai kalak e i je gelah kalak Eperaim la banci kiam. Adi lit kalak Eperaim si lewat atena janah nina, “Bereken kami lewat,” sungkun kalak Gileat kalak e sada per sada, nina, “Kam kalak Eperaim?” Adi lang nina,
6 suruh kalak e ia ngataken, “Syibolet.” Tapi katakenna “Sibolet,” perban kalak Eperaim la beluh ngatakenca alu benar. Dung e tangkap kalak e ia janah bunuhna bas ingan penyebrangen Lau Jordan. Lit 42.000 kalak Eperaim si mate paksa si e.
7 Enem tahun dekahna Jepta jadi hakim bas Israel. Kenca si e mate Jepta kalak Gileat e janah ikuburken i kotana i Gileat.
8 Kenca ia, Ibsan arah Betlehem si jadi hakim bas Israel.+
9 Lit 30 anakna dilaki ras 30 diberu. Suruhna anak-anakna si diberu erjabu ras dilaki arah keluarga si deban, janah berena 30 diberu gelah erjabu ras anak-anakna si dilaki. Pitu tahun dekahna ia jadi hakim bas Israel.
10 Kenca si e mate Ibsan janah ikuburken i Betlehem.
11 Kenca ia, Elon kalak Sebulon si jadi hakim bas Israel. Lit sepuluh tahun dekahna ia jadi hakim Israel.
12 Kenca si e mate Elon kalak Sebulon e janah ikuburken ia i Ayalon i taneh Sebulon.
13 Kenca ia, Abdon anak Helel kalak Piraton si jadi hakim bas Israel.
14 Lit 40 anakna dilaki janah 30 kempuna dilaki. Masing-masing kalak e lit sada keledena. Waluh tahun dekahna ia jadi hakim bas Israel.
15 Kenca si e mate Abdon anak Helel kalak Piraton e janah ikuburken ia i Piraton bas taneh Eperaim i gunung kalak Amalek.+
Cataten i teruh
^ Ntah banci saja “nyebrangi lau ku sebelah utara.”
^ As. “kena kalak si kiam arah Eperaim saja ngenca.”
