Hakim-Hakim 13:1-25
13 Mulihi ka lakoken kalak Israel kai si jahat menurut Jahwe,+ emaka serahken Jahwe kalak e ku tan kalak Pilisti+ 40 tahun dekahna.
2 Sanga si e, lit sekalak dilaki gelarna Manoah.+ Ia kalak Sora+ arah suku Dan.+ Diberuna mandul.+
3 Bas pudi wari, reh malekat Jahwe ndahi diberuna e janah nina, “Memang kam mandul, tapi hamil kam pagi janah lahirkenndu sekalak anak dilaki.+
4 Tapi ula inemndu anggur ntah kai pe si lit alkoholna,+ janah ula pan kai pe si najis.+
5 Hamil pagi kam janah lahir pagi anakndu dilaki. Bukna la banci potongndu.+ Mulai kin ia lahir* anak e jadi kalak Nasir man Dibata. Ia pagi si mbebasken kalak Israel arah tan kalak Pilisti.”+
6 Kenca si e dahi diberu e dilakina, janah nina, “Lit pelayan Dibata si benar ndahi aku janah ia teridah bagi malekat Dibata si benar. Luar biasa kel. La kusungkun ja nari ia janah ia pe la katakenna ise gelarna.+
7 Nina man bangku, ‘Hamil pagi kam janah lahirkenndu sekalak anak dilaki. Emaka ula inemndu anggur ntah kai pe si lit alkoholna, janah ula panndu kai pe si najis, perban anak e jadi kalak Nasir man Dibata mulai kin ia lahir* seh ngasa ia mate.’”
8 Mindo Manoah man Jahwe, nina, “O Jahwe, suruhlah pelayan Dibata si benar e reh mulihi ndahi kami gelah ajarina kami uga cara mpebelin anak si nandangi lahir e.”
9 Emaka begiken Dibata si benar pemindon Manoah, janah suruhNa mulihi malekat Dibata si benar e reh ndahi diberu e si sangana kundul-kundul i juma. Manoah dilakina sangana la ras ia.
10 Minter kiam diberu e janah nina man dilakina, “Dilaki si reh ndahi aku sange, reh ka mulihi.”+
11 Kenca si e lawes Manoah ras diberuna. Dahina dilaki e janah nina man bana, “Kam kin dilaki si sange ngerana ras diberuku?” Nina, “Ue, aku.”
12 Kenca si e nina Manoah, “Terjadilah bagi si katakenndu e! Tapi, uga cara mpebelin anak e janah kai pagi si lakokenna?”+
13 Nina malekat Jahwe e man bana, “Arus ikutken diberundu kerina si enggo kukataken man bana.+
14 La banci panna kai pe si hasilken batang anggur, la banci inemna anggur ntah kai pe si lit alkoholna,+ janah la banci panna kai pe si najis.+ Kerina si kuperentahken man bana arus patuhina.”
15 Nina Manoah man malekat Jahwe e, “Ula lebe kam lawes, gelah tasakken kami kambing si nguda denga man bandu.”+
16 Tapi nina malekat Jahwe man Manoah, “Bicara kutimai pe, labo kupan pangan kena e. Tapi adi nggit kena, persembahkenlah e jadi persembahen tutungen man Jahwe.” La iteh Manoah maka ia malekat Jahwe.
17 Kenca si e nina Manoah man malekat Jahwe, “Ise gelarndu?+ Gelah hamati kami kam adi terjadi pagi kai si katakenndu e.”
18 Tapi nina malekat Jahwe e man bana, “Ula sungkun kena gelarku, perban luar biasa gelar e.”
19 Kenca si e buat Manoah kambing si nguda denga ras persembahen pangan* jenari persembahkenna i datas batu man Jahwe. Dung e iban Dibata kai si luar biasa i lebe-lebe Manoah ras diberuna.
20 Idah Manoah ras diberuna nangkih api arah ingan nutung* persembahen e janah malekat Jahwe e pe ikut nangkih ku langit bas api e, emaka mis kalak e sujud.
21 Lanai dahi malekat Jahwe Manoah ras diberuna. Kenca si e sadar Manoah maka dilaki ndai malekat Jahwe.+
22 Nina Manoah man diberuna, “Pasti kita mate, perban enggo siidah Dibata.”+
23 Tapi nina diberuna man bana, “Adi bunuh Jahwe kin ateNa kita, labo alokenNa persembahen tutungen+ ras persembahen panganta, janah labo ka cidahkenNa ras katakenNa kerina si e man banta.”
24 Kenca si e lahirken diberu e sekalak anak dilaki janah banna gelarna Simson.+ Anak e reh galangna janah terus ia ipasu-pasu Jahwe.
25 Mulai me erdahin kesah si badia Jahwe bas ia+ i Mahane-dan,*+ si lit i antara Sora ras Estaol.+
Cataten i teruh
^ As. “Mulai kin ia bas rahim nari.”
^ As. “Mulai kin ia bas rahim nari.”
^ Ertina “Perkemahen Suku Dan.”
