Hakim-Hakim 14:1-20
14 Kenca si e lawes Simson ku Timnah janah i je idahna sekalak singuda-nguda kalak Pilisti.
2 Emaka dahina bapakna ras mamakna janah nina, “Ngena ateku singuda-nguda kalak Pilisti si lit i Timnah, sungkuni min gelah nggit ia jadi diberuku.”
3 Tapi nina bapakna ras mamakna man bana, “La kin banci daramindu diberu bas keluargata ntah pe bas bangsata?+ Arus kin buatndu diberundu arah kalak Pilisti si la isunat ah?” Tapi nina Simson man bapakna, “Sungkuni min gelah nggit ia jadi diberuku, ia ngenca si cocokna kuakap.”
4 La teh bapakna ras mamakna perban Jahwe nge maka si e terjadi, sebap daramiNa cara guna ngelawan kalak Pilisti. Paksa si e kalak Israel ikuasai kalak Pilisti.+
5 Emaka lawes Simson ku Timnah radu ras bapakna bage pe mamakna. Sanga seh ia i kebun anggur si lit i Timnah, lit singa si erngaum ndahi ia.
6 Kenca si e iban kesah si badia Jahwe ia megegeh+ janah rigatkenna singa e jadi dua alu tanna, bagi ngerigatken anak kambing. Tapi la katakenna man bapakna ras mamakna kerna kai si lakokenna e.
7 Kenca si e dahina diberu e janah ngerana ia ras diberu e janah tetap denga diberu e si cocokna akapna.+
8 Kenca si e, sanga mulihken ka Simson ngelegi diberu e,+ lawes ia ngenen bangke singa e janah bas bangke singa e lit idahna melala lebah ras madu.
9 Buatna madu e ras panganina janahna erdalan. Sanga jumpa ia ras bapakna bage pe mamakna, berekenna madu e gelah pan kalak e. Tapi la katakenna man kalak e maka madu e buatna arah bangke singa nari.
10 Lawes bapak Simson njumpai diberu e, janah ban Simson pesta i je bagi kebiasan anak perana paksa si e.
11 Sanga seh ia i je, ibereken man bana 30 anak perana si nemani ia.
12 Kenca si e nina Simson man kalak e, “Lit teka-tekiku man kena. Adi banci jawap kena bas pitu wari pesta enda, kubereken man kena 30 uis linen ras 30 pasang paken.
13 Tapi adi la banci jawap kena, arus bere kena 30 uis linen ras 30 pasang paken man bangku.” Nina kalak e, “Kai kin teka-tekindu e, kataken man kami.”
14 Emaka nina man kalak e,
“Arah si mangani, ndarat si man pangan,Arah si megegeh, ndarat si ntebu.”+
Kenca enggo telu wari, lalap la dat kalak e jawapen teka-teki e.
15 Bas wari si peempatken nina kalak e man diberu Simson, “Rayu dilakindu+ gelah katakenna man kami jawapen teka-teki e. Adi lang, tutung kami pagi kam ras rumah bapakndu. La lah rampokndu atendu kami maka undangndu kami ku jenda?”
16 Emaka tangis diberu Simson i lebe-lebe Simson janah nina, “Segat nge atendu aku, labo atendu ngena.+ Banndu teka-teki man sada bangsaku tapi la katakenndu jawapenna man bangku.” Emaka nina Simson man bana, “Man bapakku ras mamakku pe la kukataken, engkai ka maka arus kukataken man bandu?”
17 Tapi lalap diberu e ngandung seh ngasa wari si pepituken pesta e. Perban terus paksa diberu e ia, emaka bas wari si pepituken pesta e kataken Simson jawapenna man diberu e. Kenca si e kataken diberu e man sada bangsana jawapen teka-teki e.+
18 Emaka bas wari si pepituken sope terbenam matawari,* nina kalak bas kota e man Simson,
“Kai kin si tebun asangken madu,Ras kai kin si gegehen asangken singa?”+
Nina Simson man kalak e,
“Adi la kin perban diberuku,*+Labo teh kena jawapen teka-tekiku e.”
19 Kenca si e iban kesah si badia Jahwe ia megegeh+ janah lawes ia ku Askelon.+ I je, bunuhna 30 dilaki janah buatna uis kalak e jenari berekenna man kalak si njawap teka-tekina ndai.+ Nembeh kel atena janah mulih ia ku rumah bapakna.
20 Kenca si e diberu Simson+ ndai ibereken man salah sada anak perana si nemani Simson ndai.+
Cataten i teruh
^ Ntah banci saja “sope lenga ia masuk ku kamar.”
^ As. “Adi la kena mbajak ras lembuku si nguda denga.”
